لا أحاول في حكاية اليوم الطعن في أحد، أو التشهير بشخص، وإنما أشير إلى حالة سلبية دون أن أذكر شخص، أو أشير إلى دائرة بعينه، حتى لا يزعل فلان، أو يتذمر علان، ولكنها صورة تستحق الإشارة، وتنبئ عن مدى النضج والذكاء لبعض السادة المسئولين، والتناقض الظاهر في تصريحاتهم، فمثلا يصرح مسئول في وزارة النفط الوطنية المحترمة، أن أزمة الوقود مفتعلة، ولا توجد أزمة أصل، وقد وفرنا كميات من الوقود تجعل المواطن يسبح في بحيرات من المحروقات، وعندما ترى طوابير السيارات، تحار في الأمر هل تصدق ما تسمع أو تصدق ما ترى، وعندما يظهر مسئول آخر، وينفي وجود شحه في مياه الشرب، وأن المديرية قامت بنصب مجمعات مياه تكفي سكان الصين الشعبية، فيما يسهر الكثيرون حتى الصباح للحصول على الماء(وتطك بلاعيمهم من المص) ولكن دون جدوى، وقد يصرح مسئول آخر بأن دائرته الكريمة قد رفعت ملايين الأطنان من النفايات من أحياء بغداد، وتفاجئ في اليوم التالي بأن الأوساخ زادت على سكان العاصمة، وهي في تزايد مستمر لعدم رفعها يومي، فأيهما تصدق، وأغرب ما قرأت تصريحا لمدير في الكهرباء الوطنية، عن رفع التجاوزات في مدينة الرصافة، حيث تم رفع سبعة آلاف مخالفة "أحفظ الرقم رجاء" واستولت وزارته الجليلة على ستة آلاف متر" تأكد من الرقم رجاء" من الأسلاك المستخدمة في التجاوزات ........ أوكف...أوكف....صرخ سوادي الناطور(ولكم الله ولحد، لا صايره ولا دايره،  سبع آلاف مخالفة، وست ألاف متر، هاي شلون دبرته، يعني المواطن اللي يبوك كهرباء من العمود اللي يبعد عن بيته أقل شي 500 متر، لأن التجاوز من منطقة غير اليسكنها هوه، زين أشلون ست آلاف متر، وهنه سبع آلاف مخالفه، لازم الإستاد ضعيف بالحساب، لو دارس بالأمية وما يعرف الزايد من الناقص، يعني كل مخالف ساحب كهرباء من ذاك الصوب بثلث ترباع متر، عفيه عليك شلون دبرته، والله لو بيدي جا أسويك وزير مالية، حتى ترتب ألنه راتب المتقاعدين، ولكم شنو شفتونه سود حسبالكم أهنود، ولا جنه نقره الممحي، ونعرف النغل منو أبوه، ونوديكم للشط ونجيبك موته من العطش، لكن العتب مو على السيد المدير، العتب على الصحفي اللي عبرت عليه، وما ردها وخلاه يبلعم، وما يندل حلكه من أذنه، وأحنه مثل ذاك شرد من المطر صار جوه المرزيب، وطحنه بوادم لا حظ ولا بخت، تاكل الخنزير من راسه، وما يعرفون غير بس اللغف والفرهود، وصاحو  بالعراق هرج، ولكم مو هيج الياكل ويه عميان يناصف، ورضينه تاكلون اللحم، عاد عيفوا النه العظم حتى نكركد بيه، لو أخذتوها طابو مال الخلفوكم، وصرنه مثل ذاك،  يكولون أكو واحد جاب المرته جارك لحم، وكاللها أطبخيه النه تشريب، أجه الظهر، جابتله خبز وبصل، سأله جا وين اللحم، كالتله أكلته البزونه، كام كمش البزونه وخلاها  بالميزان، طلعت جارك، كالله اذا اللحم جارك والبزونة جارك ، جا وين اللحم....!!