مقدمة صغيرة :

 حينما نقرأ هكذا عناوين.. علينا أن لانستعجل.. لانقرر.. لنتمهل قليلاَ ونقرأ المقال ..بعدها لكل حادث حديث.. نحن في بلد الديمقراطية والحرية المستوردة.. لذلك لابد من أن نتوقع كل شىء.. لاغرابة في وطننا الجريح أطلاقاَ .. إذا لندخل في صلب الموضوع بمشاركة ألأخ العزيز الغالي ومهجة القلب ونور العين/ حمدان البغدادي ... :

-------------------------

النجم/ أحمد راضي هذا اللاعب العراقي الكبير الذي كان قد متعنا العديد من المرات بمهاراته الكروية وكان سباقاَ في تسجيل ألأهداف في مرمى الخصوم .. نعم لانزال نتذكر فنونه وحركاته وأخلاصه في مجال الرياضة وتحديداَ في اللعبة الجماهيرية وألأكثر شعبية/ كرة القدم .

اليوم وعلى مايبدو أنه قد أتخذ قراراَ بأنضمامه الى البرلمان العراقي كعضو ضمن ـ قائمة التوافق ـ  بعد أن فصل أحد ألأعضاء من تلك القائمة .

في أعتقادي المتواضع أن تطعيم برلماننا ـ المتعب أصلاَ ـ بعناصر شابة ومثقفة من ألأمور المهمة والضرورية .. ولكن ياترى هل بأمكان هذا العدد القليل من الشباب والمثقفين أن يعملوا المستحيل ..؟؟ وهل أن واحدهم يحمل (عصا سحرية) لتغيير الوضع السائد داخل أروقة البرلمان؟؟.

شئنا أم أبينا.. برلماننا متعب.. برلماننا شبه مشلول.. برلماننا منشغل بتناحرات وأتهامات بين الكتل والمصالح الشخصية من حوافز ومخصصات وزيادة أفراد الحرس وسيارات وغيرها.. أما الغاية ألأساسية من وجودهم (الشعب) ..هذه تأتي في المرحلة ألأخيرة .. ومن يقول لاء ليطلع بنفسه ويراقب المشهد وجلسات البرلمان  حينها لنا معه حديث !!!.

شخصياَ سعدت بالخبر ـ أنضمام بن العراق النجم/ أحمد راضي  الى البرلمان.. ولكن ياناس .. ياعالم :

ـ الم ترون أن أنضمامه جاء متأخراَ؟؟؟.

ـ ياترى ماذا بأمكان هذا الشاب الخجول أن يعمل أمام العشرات من الحيتان الكبار والمدعومين بكتل كونكريتية بالشيش المسلح ؟؟؟.

ـ ياترى حتى لو تحرك وطرح نقاط تصب في مصلحة الشعب والوطن.. هل هنالك أذان صاغية لأفكاره..؟؟ أم بمجرد حلول وقت أذان الظهر وفترة الغداء تؤجل طروحاته الى الجلسة المسائية وحينها نصف الموجودين غياب ... وهكذا في اليوم التالي ؟؟؟.

ـ شخص نشط بين عشرات الكسالي... هل يستطيع أن يحرك شيئاَ ...؟؟؟.

وعشرات الملاحظات ألأخرى ....

 يعني أحچيها .. كَول بصراحة.. وجودة كالعدم .. صحيح ؟؟؟.

ـ لاوالله/ حمدان.. يشهد الله فرحت بأنضمامه الى البرلمان.. الرجل عراقي ومعروف ومحبوب من جميع الأطراف ..ليش لاء؟؟.

 بس أنت كَلت مايغير شىء..

ـ ولازلت عند كلامي.. شخص واحد شراح يسوي..؟؟ صحيح أنه جديد ويحمل أفكار ولكنه راح يصطدم بالكثير من المطبات ..

 زين أني عندي فكرة..

ـ كَولها بسرعة .. وينك؟؟؟

 أني أكَول بأمكان النجم/ أحمد راضي أن يسوي شىء تصير حديث الصحافة والدنيا والبرلمانات بكل العالم..

ـ يامعود.. أحچيها.. كَولها.. خلي أنخاطبة خاطر يستعجل..

 أني أكَول .. أحسن فكرة.. أن يشكل فريق كرة قدم من أعضاء البرلمان ..

ـ حمدان....!؟؟ .. شنوووو..؟؟ تخبلت ؟؟ ياكرة قدم؟؟ يابرلمان؟؟.

 لاتقاطعني.. والله العظيم هذه بيه هواية فوائد ..

ـ كَولها.. نورنا ..

 هااا.. أولاَ راح يصيرللبرلمان شعبية منقطعة النظير .. كل العراقيين يتابعوهم.. يساندوهم.. يتعاطفون وياهم... وألأهم أحسن مما كَاعدين لاشغل ولاعمل غير طلب المزيد من ألأمتيازات ... والحج والعمرة لمرات ومرات ..  هاااا... شدكَول ؟؟

ـ أخوية أنت تهذري... هذه مستحيلة ..

 ماكو مستحيل... التشكيلة بسيطة ومايرادلهة أي تعب..

ـ شلووووون ؟؟؟.

 أحمد راضي راح يصير ـ قلب الهجوم ـ وكابتن الفريق ..

ـ والبقية ..؟؟؟.

+ البقية كالأتي :

• نائب رئيس البرلمان   السيد/ خالد العطية.. راح يصير حامي هدف .. الرجل غليظ وممكن يصد أية كرة..

• النائب الثاني/ عارف طيفور..  راح يخلوا/ قلب الدفاع ..وهذه لازم لكون للكورد حصتهم في الفريق ولازم مكان متميز ..!! لعد شلون؟؟ مو أجواء ديمقراطية؟؟.

• الشيخ/ جلال الدين الصغير ..راح يصير بجنب/ أحمد راضي.. يكَولك ضرباته كلها أهداف ...

• الدكتور/ عدنان الدليمي... أيباخ أذا ضرب (كلة) والله يشكَ الشبكة.. لذلك راح يكون خارج يمنة ...

• وبقية ألأماكن راح يشغلها السادة [ صالح العبيدي، نصار الربيعي، أحمد المسعودي، سليم عبدالله، حسن الفلوجي، عباس البياتي، يونادم كنا، عبدالخالق زنكَنة، رافع العيساوي ... والبقية أحتياط مثل : المطلكَ، أياد جمال الدين، خلف العليان، هادي العامري، بهاء ألأعرجي ...

ـ زين وهذولة ويه من راح يلعبون ؟؟؟.

 ويه منتخبات البرلمانات العربية .

ـ شنهو..؟؟ والدول العربية هم عدهم برلمانات ؟؟؟.

 يعني... مرة بأسم مجلس الشعب.. مرة بأسم مجلس ألأمة .. وعلى هالجرة..

ـ تعذرني.. أني شخصياَ ماسامع ببرلمانات عربية..

 أخوية موجودين.. حالهم حال برلماننا.. الفرق أنهم مايغيبون من ألأجتماعات .. يعني ماكو أعذار مثل ألأنفلات ألأمني ومنع التجول .... والحج والعمرة !!.

ـ بس أني أكَول .. هناك مشكلة ومعضلة عويصة...

 كَولها بسرعة..

ـ زين.. ياترى بقية الكتل تقبل أن يكون/ أحمد راضي .. كابتن الفريق؟؟؟.

 وليش لاء؟؟؟.

ـ أني أكَول يعترضون.. راح يصطدمون بعدد من المشاكل ..ألأول يعني شعجب/ أحمد راضي؟؟ في الوقت الذي كتلته أقلية مقارنة بالبقية.. والثاني/ سماحة مقتدى الصدر راح يمنع الكتلة مالته يشاركون بالفريق لكونه ضد لعبة الكَركَوري !!!.. الرجل كَالها بكل صراحة بأن لعبة الكَركَوري غير مستحبة ..!!... وعيب رجال شطولة شعرضة يركض ورا كَركَوري أن صح التعبير..!!.

 أخوية هذه كرة قدم.. ما لها علاقة بالسياسة.. وبعدين يجوز للسيد/ مقتدى هساع رأيي أخر بعد أن فزنا بكأس أسيا .. هذه بيهة سمعة طيبة ممكن الجمهور .. الناس يكونون سبب في أرتفاع شعبية البرلمان.. يعني بيهه مصلحة عامة... تمام؟؟؟ ..

ـ هذا برأيك أنت.. يعني شدكَول أذا أصر السيد/ هادي العامري .. رئيس منظمة بدر ورئيس لجنة الدفاع في البرلمان .. ودكَ رجل وكَال أني الكابتن؟؟؟... منهو أحمد راضي؟؟ أني ألأولى !!؟؟... وبعدين على أي أساس يكون لاعب أحتياط؟؟؟ .

 والله صدكَ.. يعني شلون ؟؟؟.

ـ أكَول... خلي انأجل النقاش.. صلاة العصر.. وبعدين عشا... شدكَول ؟؟؟.

 والله العظيم (نقطة نظام) جيدة.. ليش لاء؟؟؟ هـُم البرلمان أجلوا مئات القضايا المصيرية بسبب الصلاة والغداء.. هي بقت علينا... نقطة نظام.. أجل أخوية أجل ... يا سبحان الله .. والله أحسن برلمان وأحسن فريق لكرة القدم ...

ـ بس كَبل ما أنأجل... فرد سؤالين بس؟؟.

 كَول وبسرعة ماكو وقت..

ـ برأيك يتفقون على لون الملابس؟؟ يعني: أسود؟؟ أخضر؟؟ أحمر؟؟ بمبي؟؟  أصفر ؟؟ برتقالي؟؟ ليموني؟؟ فستقي؟؟ شكري؟؟أزرق غامق؟؟ .. وياترى منهو راح يدربهم؟؟؟... يعني شيخ المدربين/ عموبابا .. وصار منسي.. منهو أبحالة؟؟؟ الجماعة يملكون كل ثروات العراق تعتقد يجيبون مدرب أجنبي ؟؟؟؟.

 كَتلك كَوم.. المسألة تعقدت... نقطة نظام .. أجلنا الجلسة هذه يرادلها تشكيل لجان فرعية!!!!!!!.

ـ فدوه هالسدارة.. أخر سؤال وبس...

 كَولها وخلصني...

ـ بس ما كَلتلي دور ألأخوات.. أقصد .. عضوات البرلمان..

 يهلهلن وبس ..... يعني يزغردن زغاريد.. لعد شلون معقولة نترك المرأة ماتشارك؟؟ عيب.. لابد من مشاركة المرأة جنبا الى جنب مع أخيها الرجل.. لعد شعبالك.. أذا ننساهن لعد وين المساواة؟؟؟.

ـ هساع أمشي... حمدان أروحلك فدوة .. والله العظيم تعجبني!!!.

 حطني على يمناك ...!!!.

 

العودة الى الصفحة الرئيسية