يقولون والعهدة على الراوي أن / الشرطة في خدمة الشعب !!!.

كلام جميل.. شعار أجمل.. نعم من المفروض أن تكون الشرطة في خدمة الشعب.. لمساعدة الشعب .. لمساندة الشعب.. نعم هذه كلها صحيحة .. ولكن أين ؟؟؟.

الشرطة في خدمة الشعب حينما يكون هنالك أحترام للأنسان.. هنالك حرية التعبير.. هنالك كرامة للبشر !!!.

في مجتمعاتناـ من غير أستثناء ـ لاحرية.. لاكرامة ... لا أحترام للبشر ... ومن يقول لاء.. أرد عليه وأقول :

أنت لست عراقيا ...!!!.

عراقنا.. من الشرق الى الغرب ومن الشمال الى الجنوب .. بالطول والعرض يكتظ بجموع غفيرة من الحرامية واللصوص ومن النوع الثقيل.. فهنالك :

حرامية لسرقة البترول.. نعم يمدون أنابيبهم!! من ألأبار الى خزانات عملاقة ومنها الى ناقلات بترول... وباي باي الى بلادبرة!!.. أما أثمانها فتودع بأسم أخوة وطنيون وأحرار حرروا العراق... وتودع في حسابات خاصة في البنوك الخارجية!!... الف مبروك !!.

حرامية ولد حرامية عن سابع جد.. يسرقون الملايين من أموال الدولة.. تارة بعقود وهمية.. تارة بشراء مواد غذائية للأستهلاك الحيواني ومع ذلك توزع مع الحصة التموينية ... خوش وطنيون.. خمس نجوم !!.

حرامية ونص وثلاثة أرباع... يسرقون المليارات بأسم مقاولات وتعمير المدن والقصبات... بالله عليكم زوروا أية مدينة في الجنوب وشاهدوا العمران .. يا أخي الجماعة عادوا الى العراق لفترة محدودة والله وبالله وتالله !!.

حرامية ومجرمون وقتلة.. عملهم أتلاف وحرق المستمسكات الرسمية التي تدين الحيتان الكبار.. نعم يحرقونها حتى لو كانت مودعة في خزانات ودواليب البنك المركزي العراقي وفي غرف لايمكن أن يدخلها حتى موظفوا تلك الدائرة.. نعم واحدهم / جيمس بوند وتدرب في الخارج !!!.

وعشرات لابل المئات من الحالات ألأخرى.. وهنا الشرطة والقضاء.. أذن من طين وألأخر من عجين ... خوش شرطة وخوش قضاء !!!.
-----------------------------------
ـ حمدان... طولتها.. هات من ألأخر على كَولة المصريين.. أنت تحجي أشياء قديمة.. أدخل بالجديد.. ملينة من حجي قديم !!.
لاوالله خليني أفرغ دردي..
ـ أنت محق.. عراقي أصيل.. ولكن سمعنا..
 

 شوف.. مدينة السليمانية حالها حال كل المدن.. ولكن الفرق هناك أكبر عدد من المليونيرية وبالدولار.. وكلهم من غير أستثناء حرامية.. لكون الفلوس اللي جابوهة بفترة قصيرة وعلى حساب صحة الناس.. يستوردون كلشي تالف وتفرض على الناس الغلابة.. والسبب لكون بظهر كل واحدمنهم مسؤل كبير جداً!!.

ـ هذه حقيقة ماتقبل النقاش... هذه هم مو جديدة .

 صحيح.. بالمقابل هناك ناس فقراء يعيشون بقدرة قادر .. يعني أكو ناس أذا يوم واحد ماطلعت للشغل (عمال، حمالين) ماعندهم ياكلون ..

ـ هم صحيح .. هذه هم موجديدة ..

 خذ الجديد :

في السليمانية هناك شاب أسمه / حسين عمره 22سنة .. يشتغل حمال.. بس موحمال يشيل على ظهره.. لاء.. عنده عرباني.. بركًبته عائلة كبيرة .. البارحة أجتي مفرزة من الشرطة وأخذوا عربانته وحجزوها... راد.. حاول .. توسل.. يامعودين أريد أعيش بركَبتي عائلة.. أيتام... أبدا (أبو أسماعيل) ولامن يسمع .. ينفذ أوامر السادة المسؤلين اللي كَدام الحيتان الكبار مثل الجريدية.. وأمام الناس الفقراء واحدهم جبروت وفرعون  .. كلش أنقهر من القهر كَام يبجي .. يصرخ.. يطلب العون ... شلون راح يرجع للبيت من غير عربانة؟؟؟ شراح يكًول الأهلة ؟؟؟.. باجر شراح يشتغل ؟؟ قرر أن لايرجع للبيت !!.

ـ لعد شسوى ؟؟؟؟.

 بقى بالشارع.. الليل وبرد هالأيام ، ثلوج وصقيع.. بالأخص برد/ سليمانية ما أعرف كم درجة تحت الصفر .... راح ولكًه/ صنوق خشبي بصف سينما / سيروان .. دخل بالصندوق ونام من القهر... البرد شديد ووجه الصبح أشد حتماً .. الصبح ......... لكَوه ميت بالصندوق ... كارثة !!!.

ـ ميت ؟؟؟ ........ ميت ؟؟؟.

 أي نعم .. ميت من البرد ... زين منهو المسؤل ؟؟؟ شاب بعمر الزهور يقتلوا ؟؟؟.

ـ وأنت متأكد من الخبر... حمدان كَول غيرها !!.

 أخوية الخبر منشور في موقع / سبي.. أي ـ غد ـ وصاحب الموقع سياسي كبير ومعروف جداً .. أنه ألأخ / نوشيروان مصطفى.. نائب ألأمين العام للأتحاد الوطني الكوردستاني السابق وصاحب مؤسسة {وشه} في الوقت الحاضر !!!.

ـ حمدان هذه جريمة ... جريمة ماينسكت عنها !!. أكيد.. لذلك أطلب وبأسم فقراء العراق تشكيل لجنة تحقيقية بالموضوع .. ولو متأكد ماراح يشكلون.. بس والله أظل أكتب وأكتب وأكتب ... ياناس منو يوكَف ويه شبابنا..؟؟ يشتغلون.. هذه النتيجة.. شتريدون .. يفجرون أنفسهم؟؟؟ .. يشتغلون وية ألأرهابيون والقتلة ؟؟؟.. لو يصيرون حرامية ولصوص وقطاعين طرق؟؟؟ لو يشتغلون بالممنوعات؟؟؟ لو يتوجهون للخارج عن طريق البحار ويغركَون ؟؟؟.. الله لاينطيكم ياللي بسبب ألأموال والسرقة والمصالح الشخصية والتناحرات والتكتلات  نسيتوا العراقيين اللي الهم الله وبس !!!... واليكم الربط .. نعم ولو بالكوردية.. ولكنها أثبات وماتقبل مناقشة :

http://www.sbeiy.com/ku/newsdetail.aspx?id=6283&cat=1

  ـ حمدان.. الله يستر من الجايات !!!... بطالة وفقر وعوز وملاحقة الشرطة... الله يكون بعون أهلنة وناسنا... أين المفر ؟؟؟ واللي يكتلك يكَولون العراق بخير !!!.. طيب وين ننطي وجهنة ؟؟؟؟.

العودة الى الصفحة الرئيسية