من المعلوم أن هنالك فرقاَ كبيرا وشاسعاََ بين الذين يتولون السلطة عبر أنتخابات حرة ونزيهة وديمقراطية عبر صناديق ألأقتراع وبين :

• الملوك والسلاطين وألأمراء الذين يتناوبون وتناوبوا الحكم والعرش أبا عن جد وجيل بعد جيل .

• الرؤساء والحكام الذين يتولون السلطة عبر أنقلاب عسكري .

• الذين تربعوا على كرسي الحكم بوسيلة ما..هنالك أمثلة عديدة في عدد من الدول العربية كما في / اليمنوتونس ومصر وغيرهم !!!.

للنماذج الثلاثة الحق ـ بالأكراه ـ أن يفعلوا مايشاؤن.. يتصرفوا كما يشتهون.. لسبب واحد أنهم موجودون في أماكنهم ولاتوجد قوة تقلعهم إلا أنقلاب عسكري ودموي .. وهنا أيضا لدينا أمثلة وشواهد كثيرة !!!.

أعطوا أنفسهم وعوائلهم وأقربائهم وعشيرتهم وناسهم وجيرانهم أن يكونوا مواطنون من الدرجة ألأولى... والبقية مصنفون حسب مزاج القائد ألأوحد والملك المفدى وسمو ألأمير وجلالة السلطان .. لذلك من حقهم أن :

• يملكوا القصور والمزارع ومساحات شاسعة من ألأراضي وتسيجها وبالتالي التصرف بها كيفما يشاؤن !!.

• أمتلاك اليخوت والسيارات الفارهة الثمينة والمدرعة والخيول وألأسطبلات والطائرات المتنوعة !!.

• لديهم أرصدة فلكية في سويسرا ولندن وباريس ونيويورك ومدريد وروما !!.

• أقتناء وأرتداء أفخر الملابس من بدلات وأربطة حرير وقمصان وحتى الملابس الداخلية والجوارب من / كريستيان ديور ، سان لوران ، شانيل .. مع الساعات ذوات الماركات السويسرية التي تتسم بالعراقة والفخامة مثل : رادو، برايتلنج، موريس لاكروا، تيسو، إيبل، سيرتينا، سانت أونوري، ميدو..!!... وأرقى وأغلى أنواع العطور الفرنسية من الدرجة الممتازة !!!.

• سلطة من غير حدود...فوق السلطات جميعا التشريعية والقضائية والتنفيذية !!!.

• أمتلاك أجهزة عامة وخاصة للأمن وألأستخبارات والمخابرات والشرطة السرية والعلنية !!.

• أمتلاك وسائل وأجهزة أعلامية مقروئة ومسموعة وفضائيات وغيرها !!.

• يملكون أندية رياضية وملاعب لكرة القدم والغولف والسكواش!!! ومسابح !!!.

• الى أخرى من تفاصيل مملة يعرفها الشعوب المضطهدة ..لابل أكثر من معرفتهم أصبحوا متعودين ومدمنين ومتروضين على الحالة ولايرون جديدا في المسئلة !!!.

ـــــــــــــــــــــــــــــــــــــــــ

+ أني أكَول... لو تخش بالموضوع.. على كَولة أخواننا السوريين واللبنانين.. دوغري.. من غير لف ودوران... شدكَووووول ..؟؟.

ـ والله ياحمدان ، كلامك صحيح.. بس على كَولتك لازم شوية مقدمات !!.

+ والله هريتنا بالمقدمة... هساع تفضل..أنطينة الزبدة !!.

ـ تدلل... أقصد هذولة اللي حجينة عنهم أما توارثوا الحكم.. يعني هيجي تعودوا أبا عن جد.. وأما الرجال جا بالقوة للحكم.. اللي يعجبة أهلا وسهلاَ.. واللي مايعجبه خلي يختار طريقين :

أولا : خلي يبلط البحر .

ثانيا : يتفضل خارج البلاد ويصير معارضة !!!.

+ والله ألأحسن يختار الطريق الثاني.. لكون البحر شيبلطه؟؟؟.

ـ بالحالتين يعني السكوت.. يامعود هذولة واحدهم فرعون .. منهو يكَدرلهم !!.

+ بس لحد آلآن ماخشيت بالموضوع !!!.

ـ أكيد ... يعني هذولة هيج.. عينك.. عينك.. ولكن شنهو رأيك بالأخوة اللي يدعون أنهم من والى الشعب.. وجوي عن طريق ألأنتخابات وأنهم يمثلون الشعب ويسهرون على مصالح الطبقات المسحوقة والمعدوة ............ الخ من الشعارات اللي تعودنا عليها وأصبحت / أسطوانة مشروخة !!!.

+ تقريبا أفتهمت قصدك.. بس شلون تريدهم يعني يلبسون مثل ملابس؟؟؟ لو شلون ؟؟ لاتنسى الهندام ضروري!!!.

ـ ما أختلفنا.. بس كلشي تبالغ فيه.. تنعكس سلبي.. ولازم تتحمل ألأنتقادات.. تمام ؟؟.

+ أكيدن... كلش صحيح .

ـ طيب شنهو رأيك.. رئيس كتلة.. لو وزير.. لو رئيس حزب ... الخ من المناصب اللي من تحاجي ما يتكلم إلا بالديمقراطية وحقوق الشعب والمصالح العامة وغيرها ؟؟.

+ المفروض يكون قدوة.

ـ هساع أتفقنا.. زين شنهو رأيك شعبنا باهالوضعية اللي بالداخل واللي بسوريا وألأردن وغيرهم ، وكلنا نعرف معاناتهم.. بالمقابل ألأخ / المسؤل يشتري بدلة ـ سترة وبنطرون ـ فقط بعشرين الف دولار أمريكي.. دولارأمريكي أخضر ينطح دولار ...

+ والله أني أكَول ..

ـ لاتكمل... وألأهم ما يشتري بدلة وحدة ..

+ لعد شكثرررر..؟؟.

ـ نص درزن.. لو درزن ...

+ شنهوووووووووووووووو ؟؟؟.

ـ مثل ماسمعت.. ومو بس هذه .. طبعا هذه البدلات تلحكَها ـ حباشات ـ ، مثل قمصان وأربطة وأحذية وجوارب وساعات وعطور.. ووووو

+ أخوية ......... أنت ليش ماتسد الموضوع.. يعني أكو هيج بشر؟؟؟.

ـ بالعشرات... تريد أسمائهم ؟؟؟.

+ ماتسويه؟؟؟.

ـ طبعا لكون رأسا مقالتنا في بعض المواقع الى أقرب سلة للزبالة.. وباباي والله وياك عبوسي !!!... وياريت بس الى هنا وبس... لاء.. رأساً كتاب وصحفيوا / السلطان يحملون أقلامهم المسمومة الجاهزة ـ ليلاً ونهاراً ـ يتهمونة بكوننا عملاء وجواسيس ومرتزقة وزنادقة للدول الجوار ودولة جيبوتي العظمى التي لاتغيب عنها الشمس ونستلم من هذه الدولة العظيمة ملايين الروبيات الهندية !!!.

+ والله ما حجيت غير الصدكَ .... أني هم عندي معلومات مهمة ..

ـ مادكَولها... ؟؟ شتنتظر ..؟؟

+ يامحفوظ السلامة يكَولك أكو موظف في مجلس الوزراء مشتريلة سيارتين كل سيارة بسعر خيالي.. يعني والله العظيم أستحي أذكر الرقم!!.

ـ زيييييين ؟؟؟ .. وهذا منين جاب هالفوس؟؟؟.

+ هذه موفلوس..!! هذه دفاتر من الدولارات...

ـ مايهم منين جابهن ؟؟؟.

+ يعني منين؟؟؟ قابل الرجال حرامي لاسامح الله ؟؟؟!!.. جابهن من رواتبه!!!!!!... هي كلها تسرق.. بقت عليه ... أخوان :

رعاكم الباري أسرقوا.. ترة فرصة وماتتكرر... الويل من غضب العراقيين إذا جاع فعلاً!!!.

+ كلامك شهد جبلي وذهب خاص عيار / 24 قيراط والله.. وفعلا الشعب جائع وتعبان.. وألأخوان أزرارهم من ذهب... حلوووووووووووو... خلي ياكلون بصاية الديمغراطية ... عاشت الديمقراطية والحرية .. الموت للأستعمار.. كلنا فداء للوطن.. أيها ألأخوة أننا في الوقت الذي..

ـ حمداااااان...؟؟ على كيفك ... شنو دتخطب؟؟ هو بس أني كَدامك.. ماكو جماهير محتشدة ... أمش كَدامي الى / علاوي الحلة !!.

+ أريد أخطب.. أجتني خطبة مؤثرة.. وبعدين على شنو العلاوي الحلة؟؟؟.

ـ بنطرونك مشكَوك أنخليلهة ركَعة ....!!!!!!!!!!.

+ شايل خردة ؟؟؟ .. ترة جعب شهر ولاعانة !!!.

ـ ولايهمك عدنا فلوس التركَيع ...!!!.... أنركَع والنا الله !!... ملابسنا هذه حالها وألأخوان بدلاتهم بالألوفات وأزرار من ذهب... حلووو .. قيادة حكيمة لشعب يركَع ملابسه.. أمشي أخوية أمشي.. تره الشكَ جبير والركَعة صغيرة!!.

* مثل شرقي .

العودة الى الصفحة الرئيسية