بنت الرافدين

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

قد يتسائل القارىء الكريم .. لابل يتعجب من عنوان المقال.. ياترى :

هل هنالك فانوس أحمر ؟؟ ياللعجب .. لماذا أستعمل الكاتب فانوس أحمر بدلاً من الضؤ ألأحمر ..؟؟؟... من المعروف بأن هنالك مصطلح / الضوء ألأحمر والضؤ ألأخضر ولكل ضؤ معناه وخصوصياته ..!! ......... تمام ؟؟؟... لابد هنالك سر ... لنرى !!.

للرد أقول ولكن بأعصاب باردة وكلي ثقة :

لكون العراق مظلم عالأخر... وين أكو كهربااااااااااء؟؟؟... لذلك الفوانيس مالية البلد من الشمال الى الجنوب ومن الشرق الى الغرب !!!.

ترة خوش كلام ... أقتنعتوا ..؟؟.

أتذكر قبل سنوات.. كل مسؤل بدرجة مدير فما فوق وضعوا فوق باب غرفته مصباحان .. الفوق باللون ألأحمر والتحت باللون ألأخضر.. عندما يشعل ألأحمر هذه دلالة على أن سيادته :

مشغول.. عنده أجتماع هام .. لديه أتصال مع الجهات العليا .. مكالمة غرامية ... الخ من الحجج اللي كلها ما أشتريهة ولاغيري بفلس .. أو قرش !!!.

أما عندما يشعل الضؤ ألأخضر.. فهذا يعني ممكن مراجعة سيادته ولكن عبر السكرتير الشخصي !!.

ولهذه المسألة نكتة حقيقية طريفة :

كان أحدهم مدير عام ( قد الدنيا ) وفي نفس الوقت ( أبونفس دنية ) يتناول وجبات ووجبات أثناء الدوام الرسمي.. ـ مصيبة كَشرة مايشبع ـ !!.

صادف أنه كان قد أشعل الضؤ ألأحمر.. وهذا بالتأكيد يعني أن سيادته مشغول بأمر ما.. يعني غير مسموح التقرب من غرفة سيادته مطلقاااااااا ... شلون تتقرب والحمرة مشعولة ؟؟.

صادف أن أحد زملائه ( مديرعام أيضا ) جاء لزيارته من غير موعد مسبق قد دخل على السكرتير.. بعد السلام والتحية فتح باب الغرفة ودخل ... ياللمصيبة... ماذا يرى ؟؟؟.

السيد المدير العام ( أبو الضوة الحمرة ) واكَع دك على جدر باجة ـ خمس نجوم ـ بس شلون وكَعة كافرة.. ثارد ويأكل من غير وعي ... !!.

تصور لم ينتبه بدخول زميله !!!... بعد أن شعر بوجود أحدهم .. رفع راسه وقال :

ــ تفضل أبو فلان .. خوش باجة.. مصلاوية .. تخبل !!!.

ضحك الضيف ضحك بمعنى الكلمة .. وقال :

يا أبو فلان.. ضوة حمرة.. ومشغول.. وممنوع .. كلها بسبب جدر باجة ؟؟.

رد عليه ألأفندي / أبو الباجة :

الله عليك .. أكو أهم من هذه الشغلة؟؟؟ يعني ماتستحق أن أشعل على مودها الف ضؤ أحمر ؟؟؟.

ــــــــــــــــــــــــــــــــ

ــ حمدان .. خوش سالفة.. بس ممكن تنطيني رباط الحجي ؟؟.

+ أكيدن ... بس شوية صبر .

ــ والله لأصبر عليك للصبح ..

+ خوش .. قصدي فانوس / أبو أسراء !!!.

ــ يا فانوس ..؟؟ يا أبو أسراء ؟؟.

+ الفانوس.. فانوس.. وأبو / أسراء السيد نوري المالكي رئيس الوزراء.

ــ لصتها على... وضح أكثر.. ترة دخت من صدك !!.

+ على مهلك... شوف :

هو دولته ( خوش تسمية !!) شعل الفانوس ألأحمر بوجه ألأخوة الصدريون .. تمام؟؟.

ــ يعني من كَال مايشتركون بالأنتخابات إلا يحلون / جيش المهدي .. تمام؟؟.

+ عليك نور ..

ــ وشتريد أدكَول ؟؟.

+ أريد أكَول :

أولا : أني وأنت متفقين من موقفنا من جيش المهدي ومشاكل وطلايب وتجاوزات جيش المهدي وتسيب جيش المهدي..

ــ لاتطولها... متفقين ونص ..

+ زين.. سؤالي :

ياترى بس جيش المهدي ميليشيات ؟؟؟.

ــ أكيد لاء.. يكَولك بالبصرة 28 جماعة مسلحة.. أشكال وأرناك.. يعني ميليشيا ينطح ميليشيا ..وعندك الحساب !!... بس هم لازم توضح !!.

+ على عيني.. هذه السالفة ذكرتني بسالفة ألأخ مدير عام الباجة... عفوا مدير العام اللي كان يموت عالباجة !!!.

مولانا / أبو أسراء :

يعني أنت شعلت الفانوس ألأحمر شعلتها.. طيب دكَول كل الميليشيات.. حزب الله .. ثار الله .. غضب الله .. أي مو كلهم عندهم ميليشيات .. يعني غير تعلنه بصراحة دتاكل باجة ..

ــ أمصخم ياباجة.. أشو كَمت تخبط ماي ودهن ..

+ أي والله عندي ( الكَازكيت محروك ) ... قصدي أشعال الفانوس غير تكون عالجميع.. خو مو بس على مود الباجة.. قصدي جيش المهدي !!... شعلت الفانوس حتى تحرمهم من الباجة.. أووووه .... قصدي من ألأنتخابات .. تمام ؟؟؟ .. مولانا.. لازم تشعل الفانوس بحق وحقيقي.. يعني على شغلة تسوة .. يعني حجتك قوية .. مو على مود .... وممنوع الدخول.. شنهو؟؟ ... بانزينخانة ؟؟؟... أكو الف حاجة تستحق أن تشعل على مودها الف فانوس أحمر.. ماعندي خلك جان عددتهن !!... دوفروا أدنى الخدمات وبعدين أشرطوا مسألة ألأشتراك بألأنتخابات.. يعني متأكدين الشعب راح ينتخبكم مرة ثانية ؟؟؟ ... ما أظن ... صعبة يافحل !!!، يعني شغلة الفانوس ألأحمر منطقي ولازم بس على شىء تسوة أشعال الضؤ وأكو تبريرات للمقابل !!.

ــ حمدااااااااااااااااااان ..؟

+ أشتهيت باجة ؟؟؟ موووو؟؟ .

ــ أيوالله ..

+ أمشي كَدامي الذاك الصوب للكاظم .. والله لأوكلك مدير عام .. عذراَ قصدي جيش مهدي.. أووووووه .. قصدي باجة وطرشي وبصل أخضر وخبز بيت .... تخبل ...

ــ أمشي بس على كيفك لايروح يسمعنه صاحبنا ويشعل الفانوس ألأحمر بوجهنا..

+ لاخالي.. لاء.. ناكل بفلوسنا .. فلوسنا حلال من عرق الجبين .. أمشي كَدامي أبو البلاوي.. أمشي !!.

----------------------------------------------------------------

* أرفع الفانوس ألأحمر : للمخرج الصيني / تشانغ يي مو ..

يشتهر تشانغ، احد مخرجي الصين الاكثر احتراما، بأفلامه "ارفع الفانوس الاحمر" و"البطل" و"بيت الخناجر الطائرة". وقد فاز بالجائزة الكبرى للجنة التحكيم في مهرجان كان السينمائي وحصل مرتين على جائزة الاسد الذهبي في مهرجان فينيسيا السينمائي .

وهوالذي سينظم مراسم افتتاح وختام اولمبياد 2008، ومن الجدير بالذكران المراسم ستستمر لحوالي ثلاث ساعات ونصف الساعة.

العودة الى الصفحة الرئيسية