بنت الرافدين

العراق ولبنان في الهوى سوى.. شرم ، برم ، كعب الفنجان..!!!

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

بالرغم من أننا لسنا جارا للبنان ولكن ياسبحان الله نشترك معهم في صفات مشتركة وكلها متطابقة 100% وبشكل يلفت ألأنظار ..

وحينما أقول ليسوا جيرانا حتى لا نقول أن سبب هذه الصفات المشتركة بسبب الجيرة ومن عاشر قوم أربعون يوما ..... حنطته تاكل شعيره..*!!! .

لكن للحقيقة والتأريخ أن ألأخوة اللبنانيون قد سبقونا في هذه الصفات الحميدة والتي التصقت بهم كلصقة ( جونسون ) * وأصبحت حالة أكثر من طبيعية.. ولكننا لازلنا نستغرب من هذه الصفات الحميدة التي أعدت ورتبت وطبخت على نار هادئة في بلاد برة.. والغريب هنالك من ( يركصلهة بجفية ) وفرحان أووووووي من هذه الصفات الحميدة ...!!.. شلون حميدة ؟؟؟.. تخبلللل .. وين أكو منها بالكون ؟؟!!!.

ـــــــــــــ

ـ حمدان ... ياحمدان..؟؟.. نورنا..

+ مو على عيني .. نشترك مع لبنان بصفات وأمور مشتركة منها :

أسم عاصمة البلدين يبدأن بالحرف ( ب ) وعدد الحروف خمسة .. بغداد .. بيروت .

البلدين يتحكم بهما الجمهورية ألأسلامية ألأيرانية.. فالسفير ألأيراني في عاصمة البلدين يأمر وينهي ... يك كلام.. مايصير أثنااااااااااااان .. ممكن نيست .. أطلاقا !!.

في البلدين هنالك أحزاب دينية في خدمة الولي الفقيه.. وبالمقابل المرشد ألأعلى لأيران فاتح خزينته لهذه ألأحزاب.. وناسي شعوب أيران الجوعانة !!.

المحاصصة الطائفية في توزيع المناصب.. ، شيعي وسني ودرزي.. الخ.. في عراقنا أيضا نفس الشىء ولكن بدلا من الدروز ... أكراد !!!... مافي فرق ياخيوووو!!.

عملاء وجواسيس ومأجورين في كلا البلدين والمحسوبين على الصحافة والثقافة شغلهم الشاغل تلميع وجوه ألأيرانيين... لاشغل ولامشغلة بحيث صاروا يتناسون محن أبناء شعهم ووطنهم ومآساتهم.. ألأهم ملالي أيران الجهلة.. العراق والعراقيون شكو عليهم ؟؟؟ .

محطات التلفزة ( فضائيات وأرضيات ) كلها مدعومة من ألأخوان ... الجمهورية ألأسلامية ... تدللوا !!.

برلمان البلدين... ياماشاءالله.. برلمان العراق برلمان / يمي كرصتني العكربة.. برلمان لبنان / شرم ، برم ، كعب الفنجان!!... وألأثنين لاحول ولاقوة ولاتأثير .. لكن بالأمتيازات... ياماشاءالله .

عملة البلدين... عين الحسود بيها عود على دينارنا وليراتهم !!.

الغلاء الفاحش في البلدين... وين ماتمد أيدك نار كبرة... الويل للفقير!!.

أزمة غريبة في البنزين وبقية المحروقات... بس الفرق أحنه.. نعم.. أحمممم .. أحنة أغنى بلد في أحتياطي البترول... طززززززززز باهالأحتياطات البترولية.. عاد اللي يسمعنة يكَول بكل بيت أكو بوري مال غاز .. وتانكر نفط أبيض بالباب .. دكافي من أنهجم بيت البامية !!.

البلدين يعتمدون على ألأستيراد حتى في الفجل والبصل والشوندروالبربين!!.

هم عندهم السيد / حسن نصرالله وأحنه عندنا / مقتدى الصدر.. ولكن للتأريخ السيد حسن نصرالله شجاع ومتكلم ولايبتعد عن أبناء شعبه.. أما صاحبنا أتحداه أذا شكل ونطق بجملة مفيدة واحدة..أكرر جملة واحدة لاغير.. مافي ولايمكن ..... من غير زعل ياحبيبي!!!... هاه.. نسيت .. صاحبنا يكره لعبة الكركوري .. لعبة شيطانية حبيبييي!!!!.. يعني شتتوقع من ألأستعمار غير تشجيع لعبة الكَركَوري.. هااااء .

في لبنان تم أغتيال عدد من الصحفيون وألأعلاميون.. أما حالات الضرب وألأحتجاز ومصادرة أجهزتهم لاتعد ولاتحصى.. أما في العراق فالحالة أسؤ يكفي بأن رئيس نقابة الصحفيون ( شهاب أحمد التميمي ) تم أغتياله ناهيك عن عدد كبير من الصحفيين وألأعلاميين.. أخرها هذا الخبر المؤلم :

[ نقل مرصد الحريات الصحفية في العراق، الأحد، عن مصور وكالة الصحافة الفرنسية في البصرة قوله إن ضابطا برتبة لواء في الجيش العراقي أطبق على رقبته بيديه وحاول "خنقه" لمنعه من تصوير مكان حدث فيه انفجار عبوة ناسفة بمنطقة الحكيمية في البصرة. ] .

ونحن نقول : لم لاء ففي أمس القريب قامت مجموعة من حماية السيد / رئيس الوزراء بالأعتداء على كذا صحفي وأعلامي.... ديمقراطية غريبة !!.. كلام في كلام في كلام !!!!.

اللبنانيون عندهم / هيفاء وهبي واليسا وباسكال مشعلاني.. أحنا عدنا / حمدية صالح وساجدة عبيد وصبيحة العورة.. بالنتيجة واحدة بواحدة المهم صوت نسائي على الساحة .. أصوات أتجنن ..!!.

عندهم عضو بالبرلمان أسمه / وليد بيك جنبلاط شغله الشاغل الظهور على شاشات التلفزة.. عندنا في العراق وأحد أهم أسمه / الدكتور محمود عثمان.. يموت ويخرب على المقابلات بأنواعها ـ تلفزيونية ، فضائية ، أذاعية ، صحفية ـ نزولا الى النشرات المدرسية..[ بالحقيقة .. أني أعتقد!!..] .. شتعتقد صدقة أروحلك بالعظيم هريتنا هري!!!... دجوز يامعود.. شنهو ماتعبت ؟؟؟؟... مامليت.. كلشي وتعتقد.. والقبض؟؟؟.. هم كَول من دبش!!!... أسمع نصيحة / بول بريمر وفتحلك أذاعة وظل أعتقد من ألأفتتاح وحتى ألأنتهاء... ظل أعتقد !!.. شلون لزكَة ؟؟ ... هاا نسيت ممكن تقوم شخصيا بتلاوة قرآن الكريم بالأفتتاح والختام.. وعليش ختام ؟؟ خليها 24 ساعة .. هم ياالله !!.
ألأخوة اللبنانيون يعتزون ويتفاخرون بأكلاتهم الشعبية : كبة نييي ، فتوش ، حمص بطحينة ، بابا غنوج ... نحن أيضا لنا أكلاتنا الشعبية : مسموطة ، أثخينية ، باكلة وبيض بالبطنج !!!.

أكثرية ألأحزاب اللبنانية ( أحزاب عوائل ).. أحنا كمااااااااان .. جيب ليل وأخذ عتابة.. بالعظيم أحنة أضبط من المضبوط.. تريدون أمثلة؟؟؟..لاء أخاف ماينشرون المقال!!!... يشطبوهة ويدخلون أسمائنا بالبلاك ليست.. حلوة مال بلاك ليست ... ( القائمة المصخمة )!!!... أنأجل الموضوع الى أشعار أخر.. أحنة بلية شىء ومكروهين.. النوبة مكروهة وجابت بنية... يايابة!!!.

اللبنانيين عندهم / عرق ـ زحلاوي ومستكي ـ يخبلللل ... يعني بيك واحد أطيرك أمتار ليفوكَ .. أحنه هم مامقصرين عندنا / عرق ـ هبهب أبو الكلبجة ـ .. بالعظيم والدنيا صيف اللي يجر ربع لايشوف الواحد أزدحام .. خو أذا سواها ربع وبيك.. ينام وتنام عليه طابوكة.. تعال يامن يصحي... شيصحي؟؟ الا تنكة ماي مثلج.. وبعدين وين أكو ثلج؟؟؟.. خلوا نايم أحسن !!.

اللبنانيين منذ / 1975 عندهم أزمة كهرباء.. يعتمدون على المولدات.. أحنه هم.. ولايهمكم منذ خمس سنوات نفس الشىء.. إذا الله أعطانا طولة العمر أحنة هم بعد ربع قرن نساوى وياهم... ولايهمكم أنطيكم تعهد حالتنا تستمر ربع قرن وشوية.. عاشت الحكومة !!!.

اللبنانيين عندهم جالية كبيرة في أنحاء العالم... على بختكم أحنه هم.. بس الفرق هم هاجروا طوعياً.. أما أحنة لاء... أجبرونا.. ولك داد بالقوة.. تهاجر لو.....لاء خالي لاء.. لا لووووووووو.. ولاهم يحزنون.. أنهااااااااااااجر... باااااااااااااااي !!!.. ديمقراطية مستوردة خمسة نجوم.. عاشت / الدكتورة الأنسة / كوندليزا رايز.. عاش.. عاش!!!.... قصدي عاشت.. عاشت !!!.

تمطر عليهم أسلحة من الكواكب ألأخرى... بيك خير وتدلل.. صواريخ من أسرائيل.. قاذفات من جنوب أفريقيا.. طائرات من غير طيار من ألأخوة في جزيرة / الواق واق... مدفعية ورباعيات من زحل ومشتري .. أحنه همينة... شنهوووووووووو ؟؟؟؟ وحد؟؟؟.

الأحزاب والتيارات والحركات اللبنانية المتناحرة.. مؤتمرات في الداخل والخارج.. ونفس الشىء بالنسبة الى ألأحزاب والكتل والتيارات العراقية.. والقبض؟؟؟.. القبض من دبش!!.

اللبنانيون ( الجيش اللبناني ) هدم مخيم / نهر البارد على رؤس أصحابها.. سوهة خرابة ماتتعمر بعشر سنوات.. ألأخوة النشامي في حكومتنا الرشيدة فعلت نفس الشىء في مدينة الثورة.. الفرق الوحيد أن الجيش اللبناني كلهم لبنانيون.. أما الربع / حفظهم الباري ، وياهم ألأخوة ألأمريكاااااااااااااااااااان.. بطائرات الشبح والهمر وطائرات من غير طيار ومارينز وأحدث ألأسلحة.. أخوان: شنهو راح تحررون الجزر العربية المحتلة من الجمهورية ألأسلامية؟؟ لو الجولان؟؟ لو أسكندرونة؟؟؟ بالعظيم أمتيهين ألأتجاهات... ماعليش .. خيرها.. بغيرها !!!.

رؤساء ألأحزاب اللبنانية مليونيرية... ليش؟؟؟ لأنهم يشتغلون على باب الله وعندهم علاقات واسعة و ........ ولايهمكم بالعظيم أحنة أكثر.. يعني أكثر من مليونيرية.. أصلاً أولاد وأشقاء وبنات رؤساء أحزابنا مليونيرية... وعندك الحساب... أويللللي ... أغاتي.. عيوني.. فدجاي من راس القوري ترة راح أنفجر!!!... ومنهو اللازمك.. بالجير والجهنم !!!.

بالعلن ولكن في النهار فقط .. حكومة وأحزاب يكرهون ويهددون أسرائيل.. أما في الليل... لاء .. شكل تاني.. حبابيب.. صدكوني للصبح لعب / بوكر وخمسة وخميسات ووطاولي وأزنيف ... يعني دهن ودبس... أما نحن لاااااااااااااااااااء.. عيب.. أحنة وياهم ليلن !!! ونهارن!!!... علاقات فقط... خوش ناس ماعندهم أذية !!!.

في لبنان عدد كبير من الصحف والمجلات... يايابة شكد عدهم !!!... وأحنة؟؟؟.. شنو أنتوا وين نايمين.. صدكوني أحنة هم.. أني أعرف مطرب درجة سادسة جان يغني ويدك عالتنك وقواطي مال نيدو.. هساع رئيس تحرير جريدة ليبرالية وتطبع في العاصمة... لعد شعبالكم... أحنه؟؟؟ أحنه !!!..الى ألأمام ...

من تصير مناسبة بالخارج.. لأنه ماكو تنسيق.. أكثرية المسؤلين يسافرون ، تصورا في القمة العربية الرئيس / لحود كان كاعد مثل اليتيم بوحده.. والسيد رئيس الوزراء / سنيورة كاعد ونافش ريشة مثل الطاووس وراه عدد من الوزراء... أحنه هم والله بيوم وفاة ملك السعودية ومناسبات أخرى كلهم راحوا.. يعني الجميع سافروا الى الرياض وهناك تعجبوا.. يامعودين لعد منهو ظل أبغداد؟؟؟؟.. واحد يباوع على الثاني.. ومشوهاااا.. ومشت... حكومة عظيمة هنالك تنسيق على أعلى الدرجات.. شنهو قابل فرطنة ؟؟؟.

لبنان... بلا رئيس جمهورية... أحنة همينة !!!.

ـ حمدااااااااااااااااااااان... لاء.. الف لاء... هذه زلة لسان.

+ ليش؟؟؟.

ـ أحنة عندنا رئيس.

+ أني ماسامع.. بس أعرف مستشارة جبيرة من مستشارات السيد / نوري المالكي ، أسمها / مريم الريس كالت :

رئيس العراق رئيس بالأسم..

وألأهم.. من زار تركيا أستقبله / النائب الثاني أو الثالث لرئيس الوزراء التركي .. ومافرشولله السجادة الحمراء.. ومادكَولة مزيقا... ولا جيلات بالهوا .. أيوالله.

ـ حمدان.. مريم الريس كانت مستشارة وبطلت..

+ لااااااء للساع مسؤلة جبيرة وتكَرك...كلامها مسموع وشبه رسمي !!.

ـ ومسألة السجادة الحمراء قبل فترة وضحت السبب..

+ شنهوووووووو ... نسيتها.

ـ ها.. يكَولك قبل يوم من زيارة / مام جلال.. عمال المطار غسلوا السجادة.. وشلون حظ.. هذيج الليلة مطرت مطرة.. يايابة.. أنقرة ومطرها... السجادة تبللت زيادة.. يعني شلون يفرشوها؟؟؟ معقولة رئيس دولة يمشي على سجادة أمبلله ؟؟... شلون تقبلها..؟؟ عيب.. ماصايرة.. وين ألأحترام؟؟؟ وين التقدير؟؟؟.

+ زين والمزيقا؟؟؟.

ـ مو شرحنا.. يوم لابل ساعة الوصول.. يعني قبل ساعتين فرقة / الجوق والموسيقى كانوا راكبين باص.. متوجهين من مقرهم الى المطار.. بالطريق أندعموا وية قطار الشرق السريع ( طبعا هناك ماكو قطار!!!) .. وكلهم تكسروا .. يعني تقبل هم بهالحالة ويعزفون مزيقا؟؟؟ يعني بالله بدلا من مزيقا الترحيب كَلبوا على أغنية بيه ( هز ووز ).. منهو يتحمل مسؤليتها؟؟؟.

+ والحرس الشرف ؟؟؟؟.

ـ ابو الحرس الشرف اللي ينطي أيعاز كان عنده صداع.. يكَولك بالخطأ ماخذلة حبوب منومة.. رادوا عالجوا يكَعدوا ماكَدروا.. من كعد القارداش ، الرئيس كان يريد يغادر أنقرة.. كَالوا خلوا نايم.. بعد ماتسوة !!!.

+ لعد أعتذر من هالنقطة.. عبالي أحنة هم ماعدنة.. يعني ممكن أعتذر؟؟؟.

ـ والله حتى لو ماتعتذر.. يعني شراح يصير.. حالك حال عمال المطار وأبو ألأيعاز.. ولايهمك.. كودن.. هاي حلوة مال كودن.. نعيش أجواء ديقراطية كَول شكو بيها؟؟؟.

+ بس بروح أبيك.. ولويش ما أستقبله الرئيس / كَووووووول ..؟؟.

ـ بصراحة..

+ أكيد..

ـ بصراحة؟؟ بصراحة ؟؟؟.

+ أي مو كَلنا : أي.. نعم.. بلي.. دطلع الدرة..

ـ بالعظيم أستحي ..... بس تعال أشاورك.. الحجي بيناتنا..

+ لايا ملعوون... صار معلوم.. وصلت الرسالة...

المثل الحقيقي هو : من عاشر قوم اربعون يوما صار منهم !!.

لصقة جونسون : لصقة كان أهلنا يستخدمونه بكثرة وذلك بلصقه في مكان آلآلم .. وكان يمتاز بكونه لايزال بسهولة إلا بصعوبة بالغة .. لصقة ... أما شلون لصقة؟؟ جونسون !!... صناعة أنكَليزية... أبوناجي وعندك الحساب !!.

العودة الى الصفحة الرئيسية