بنت الرافدين

حمدان يكشف بنود مهمة ومفيدة من أتفاقية التعاون مع أمريكا ..!!

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

حديث الشارع العراقي وألأقليمي والعربي وحتى العالمي وألأعلام والصحافة كلها تصب وتتحدث عن أتفاقية التعاون ألأستراتيجي بين العراق وأمريكا !!.

هنالك دول تستنكر كأيران.. وهنالك دول ترحب وهنالك دول تراقب ألأحداث .. نعم في الحقيقة كل دولة تنظر الى المسألة حسب ظروفها وأمنها ومصالحها !!!.

نحن ( أبو ألأنا ) لانعرف من تلك ألأتفاقية ـ الكَشرة ـ غير بس القشور!! أما ما خفي أعظم فالأمريكان وبعض السادة المسؤلون أدرى بها من دون غيرهم !!!.

مع هذه وتلك هنالك أنواع الصيحات بين مؤيد ـ يركصلها بجفافي ملونة ـ !! وبين مستنكر أشد ألأستنكار لحد ما ـ صوته صار بيه أنواع المشاكل ـ وهو لايزال يصرخ ويستنجد ويطلب من العراقيين رفض الفكرة من ألأساس !!!.

في الحقيقة والواقع برأيي وبرأي أخي / حمدان البغدادي الحكومة ـ أمقصرة ـ كلش وجداً .. كان من المفروض أن تنشر بنود تلك ألأتفاثية للناس ، أو على أقل عرضها على أعضاء البرلمان.. ولكن على مايبدو أن في البنود العشرات من الخطوط الحمراء المكهربة .. لذلك : خلوه سكتة !!!.

ـــــــــــــــــــــــــ

ـ حمدان.. ياحمدان..؟؟ بروح أبيك ماتشرحلي شنهو ألأيجابيات بهذه ألأتفاقية؟؟ أشو بس أنت وكم واحد راضيين عالمسألة.. ماتنورنا..؟؟؟... يجوز الناس غلطانة وماتعرف شنهو القصة ؟؟.

+ مو تدلل.. شوف :

أخوية هذه أتفاقية مع دولة عظمى.. أمريكا.. وهذه دولة جبارة في كلشي وكلاشي .. يعني بعد ألأتفاقية راح نشبع كلشي وكلاشي..

ـ شلوووووووووووون ؟؟.

+ أنطيني عطوة وراح أشرحلك..

ـ تفضل أخذ راحتك وماراح أقاطعك .

+ الف شكر.. شكر ينطح شكر.. شوف:

أول المستفيدين هو الرئيس مام جلال... الرجل اللي معروف عنه يخرب عالبوس ( قبلات) وأكيد بعد ألأتفاقية يوميا الأنسة الدكتورة / رايس رايحة جاية.. جاية.. رايحة.. ويوميا راح ياخذها فخامة الريس كَبالة وشوف ربك شخالق؟؟؟.

ـ وهذه أكيدة؟؟.

+ ليش أحلفك.. هاك شوف الفلم وأحسب كم مرة يبوسها.. بالعظيم أكثر من خمس درازن.. هاك:

http://www.youtube.com/watch?v=NLu8eUnzdVQ&feature=related

ـ عجييييييييييييييب ... هاي شنهو؟؟ بالعظيم هرها هري !!!!.. زين والشعب شراح يستفاد؟؟.

+ لا الشعب ؟؟؟ الشعب هو المستفيد.

ـ شلون؟؟.

+ شوف ..أولا الدورايات راح أتصير شكل تاني:

يعني بدلا من الجنود.. راح أنشوف مجندات بملابس البحر ( بكيني ) واكفات عالهمر ويفترن.. وتعال وشوف سينما وأبلاش.. صدكَني حتى اللي كان يستهدفون تلك السيارات راح يبطلون.. يعني كلها تباوع وتتمتع.. لعد شلون؟؟ شعبالك؟؟؟ أخوية أكو عقول تفكر..

ـ وبعد؟؟؟.

+ الجدران الكونكريتية..

ـ راح يشيلوها؟؟.

+ لااااء .. راح يعلوها شوية أكثر.. وراح يجيبون رسامين من أنحاء أمريكا وبتقنية عالية.. راح يرسمون أنواع الرسوم اللي تتلائم مع أذواقنا!!! وبعدين راح يرسمون شتاء وربيع وصيف .. يعني فوائدها :

بالصيف تكَدر تكابل الجبال وعليها ثلوج.. أكيد راح تشعر ببرودة.. وهذه شغلة نفسية.. بالشتاء العكس.. تباوع على الشمس والبحر.. راح تدفأ.. واللي يريد يتمتع بمناظر وهو مفلس.. يروح يكابل هالمناظر الخلابة اللي ترد الروح... شفت شلون أفكار عظيمة وكلها تصب في مصلحتنا ؟؟؟ يالله كَول أمريكا موخوش؟؟؟؟.

ـ وبعد؟؟؟.

+ أكيد.. راح أنشوف مئات المطاعم مالة الوجبات السريعة ألأمريكية ( ماكدونالدز ) وبالمقابل أحنه همينة راح نفتح المئات من منتجاتنا في كل الولايات ألأمريكية :

· شربت الحاج زبالة ... مئات الفروع.. وشوف ألأقبال الشديد المنقطع النظير!!!؟؟.

· كبة السراي مع الصمون والطرشي .

· خبز عروك .

· ثريد الباكَلة و باجة الحاتي. ... صدكني بس يتعودون .. لاتستغرب حتى الرئيس ألأمريكي قبل مايروح للدوام بالبيت ألأبيض يعرج على أقرب / ثريد باكَلة.. يتبنها تبنة زينة هو والحماية وبعدين رأستاً!! الى المكتب البيضاوي لو الخضراوي ( مو التمر..لاء) وهو بكامل النشاط والحيوية!!... خو أعضاء الكونغرس ..صدكَني تلكاهم ماخذين سرة عند فروع / باجة الحاتي.. بالأخص تالي الليل.. وتعال وشوف العمال بالدشاديش والعرقجينات وأبو المحل يثرد ومايلحكَ.. وهناك يجيك ريس الكونغرس ويكَول :

أخوية سوينة صينة معتبرة.. وعليها راسين وكثر اللسان والمخ ترة عندي خطار ريئس الكونغرس الكندي جاي خصوصي لضرب الباجة.. وشوية أستعجل!!!.

ـ حمدان وهذه بيها فائدة .. يعني آلآف من العراقيين راح يشتغلون بأمريكا..

+ أكيد .. لعد شعبالك؟؟؟.

ـ بروح أبوك وبعد ...؟؟؟.

+ من الناحية الفنية والثقافية هنالك عدد من ألأتفاقيات ومنها :

· حفلات ضخمة لكل من / مادونا ومايكل جاكسون في أكبر الميادين العراقية سواء بالعاصمة أو المدن الرئيسية ألأخرى !!!!. وبالمقابل أحنه هم راح نرسل / حمدية صالح وفرقتها ـ بنات الريف ـ لأحياء حفلات بنفس الوزن في الولايات ألأمريكية .. بالعظيم أذا حطت أيدها ورا أذانها وجرت سويحلي وبعدين أغنية ( لورايد عشرتي وياك) لنشوف تلت أرباع أمريكا تهز.. رجال ونسوان وحتى الشيوخ تهز الوسط.. لعد شلون !!!.

· فتح دورات لتعليم ألأمريكان ( الطكَ أصبعتين وهز الركبة ) بمصاحبة فرقة الخشابة... يااااااااااااااااااااااااه... تعال وشوف كل أمريكا تهز ركبة.. يعني سواق القطارات تهز... الباصات.. البلدية... أصحاب المحلات ، الفنادق ، المطاعم يستقبلون الزبائن بهز ركبة.. يايابة.. حتى الرئيس والسيدة ألأولى يستقبلون الضيوف بهز ركبة... أويلي تعال وشوف شلون تتقوى أواصر الصداقة وألأخوة بين العراق وأمريكا من خلال طك ألأصبعتين وهز الركبة !!!.

· الفيزا الى أمريكا... بدقيقتين.. يعني بس مسافة توصل للشباك.. رأستاً!!! مع أنغام الموسيقى يختمولك الجواز و... الله وياك عبوسي !!!!.

· أما الحصة التموينية ...يايابة شلون تغييرات .. على سبيل المثال لكل رب عائلة / شريط من حبوب ـ الفياغارا ـ .. نعم وهذه بيهه هواية فوائد .. يعني اللي مامحتاجها ممكن يبيعها بالسوق السوداء.. وهذه من تنجمع وتنباع في أسواق الخليج .. راح أدر علينا بالملايين... أخوية أكو عقول تفكر!!!.

· وألأهم من كل هذه وتلك.. كل بيت من بيوتنا حتى في أبعد قرية.. راح يسحبولهم بوري مال / كوكا كولا.. يعني أول ما تفتح الحنفية راح تجيك / كوكا كولا مثلجة.. يعني جلاب عالكَلب... هاااه .. نسيت ممكن تطلب / كوكا كولا من غير سكر.. وممكن مع سكر.. يعني أنت حر !!!.

· فتح دورات لشبابنا لتعلم / كرة القدم ألأمريكية .. وبالمقابل أحنة هم نرسل خبرائنا في لعبة المحيبس بأشراف الخبير الدولي في هذه اللعبة / جاسم ألأسود اللي كل سنة ياخذ كأس بطولة رمضان.. وهنا وتعال شوف ألأمريكان.. بكل دربونة وشارع آلآف البشر تلعب وتتفرج.. باااااااااات.. باهالعظمين... أكَعد ياولد.. أويلي هذيجيه .. شوفة ديرجف ألأخ.. كلها تكَعد بس أبوسمرة باللعب !!!.

وهذه بالأنكَليزي تخرب ضحك:

هالعدمين.. أنت أبو سمرااا... أنا أخد مهبس... يالا ياسباب.. هلووووووووووووووو!!.

· تبادل خبرات في مجال التزوير والجنائيات بين / سوق مريدي وألأجهزة ألأمريكية المختصة كـ / FBI و CIA وبقية ألأجهزة الخاصة.. يعني راح نشوف مئات ألأمريكان داخلين دورات ودورات في مجال فن التزوير وغيرها... طبعا أخوية مصالح متبادلة وفائدة للجميع... لعد شلووووووووون ؟؟.

· بعد سنوات راح يصير ألأنكَليزي ( اللغة ألأنكَليزية ) بلكنة أمريكية هي اللغة الرسمية للعراقيين.. وتعال وشوف .. مثلاً أبو الركَي يصيح بالأنكَليزي.. أبو البطيخ نفس الشىء.. وأبو اللبن... لعد شلون!!؟؟.

· الجلاب والبزازين ( كلاب وقطط ) السائبة.. كلها ياخذوها بطائرات خاصة الى أمريكا .. وهناك يدخلوهن دورات تثقيفية لتعلم ألأصول وآلآداب.. يعني الجلب اللي كان يعوي ( حوو .. حوو ).. لاء بعد الدورة بكل هدؤ وأحترام راح يعوي على نغمات موسيقية ( هو.. هو .. هو ..) أما القطط ولاتسمعهن.. لعد شلون !!!؟؟؟.

ـ حمداااااااااااااان.. الخاطر الله كافي... كافي تصنيف ترة بجيتني وحق الحق!!.

+ دقيقة.. خليني أكمل:

· رامبو... أكيد سامع بيه.. راح يجي للعراق ويمثل سلسلة أفلام عن بطولة وشجاعة الجندي ألأمريكي الذي لايقهر!!!!!... يعني كل طلقة ويقتل عشر عراقيين.. خو السكجينة مالته؟؟؟ بس يشمرها توكَع العشرات.. وهذه بيها هواية فوائد.. يعني بالآف راح يشتركون باهالأفلام ككومبارس!!!.

ـ حمدان.. بالعظيم أذا ماتسكت أروح... كافي ... وجعت راسي..

+ راح أسكت موقت.. بس هنالك حلقة أخرى بأذن الله... اللهم أحفظ العراق وشعب العراق من كل مكروه..

ـ آمين يارب العالمين ...

العودة الى الصفحة الرئيسية