بنت الرافدين

فوكً البعير الفكًر .. بس الجلب عضة ..!

جريدة العراقية الصادرة باستراليا
alyasiry11@yahoo.com

اعترف مع سبق الاصرار والترصد، اني وللمرة الاولى في حياتي اكتب مقالة بغير واهس يعني من ورة خشمي ،،مو لأن مريض وثلاجتي صارت صيدلية خمس نجوم، بس ما ادري شصار بية من خسر العراق مع فريق قطر لهاي الساعة مالي خلك روحي والدنيا طالعة من عيوني تكول واكع على عشيرتي صاروخ ارض ارض اطول من الصاروخ الايراني الي لكًاه الجيش العراقي هذاك اليوم بالعمارة بعملية بشائر السلام ،، وما ادري سبب وجود هيج صاروخ بحرب مليشيوية يعني لو يتحاربون الجيش والمليشيات بالطابوك هم يكفي ،بس الظاهر الجمهورية الاسلامية تريد تقصف اسرائيل من جبايش اهوار العمارة ،وعمتنه اسرائيل هم بلشت بالمناورات بالبحر يمكن مو حتى تضرب المفاعل النووي الايراني بس حتى تضرب جبايش الهور بالعمارة ،لان يسويها الحظ ويكولون الفكًر فوك البعير وعضة الجلب ،واحنه فكًرنا اصلي موش مزور يعني نخلة وخط وفسفورة على كولتهم، والا لوما فكًر حكمنه ابن صبحة اربعة و اربعين سنة طلع بيهن حليب امهاتنا من اخشومنه ،، ولوما فكًر وحظ ماعدنا صارت ارضنا ملعب لفريق ابن لادن وجريذيته ؟؟ عبالنه خلصنا من صدام طلعنا مليون صدام، ولوما فكًر انكلبوا معارضينا المساكين الجانوا عايشين على صدقات دول اللجوء بليلة وضحاها الى مليارديرية اقل واحد بيهم يملكله شركة لو معمل لو فندق بارقى دول العالم ؟؟ ولوما فكًر ما صعد فريقنا على بعير تصفيات كأس العالم وعضة الجلب القطري من رجلة ونزلة وكعد بمجانة ؟؟ جا مشت الامور مثل ما مرسوملها وتعادلنا لو فزنا وابوك الله يرحمه ؟؟ ولوما فكَر ما افترت الدنيا وجابوا عدنان حمد الي حقق الرقم القياسي ولازم ينكتب اسمه بكتاب غينز لان اول مدرب بالعالم طلع فريقه من ثلاث تصفيات من كأس العالم وهاي ما صايرة حتى وي فريق الغربان والططوات بس مو صوج عدنان صوج فكَرنا الخلة حسين سعيد رفيق الشهيد عدي وعدنان حمد الي يهدي فوز العراق بأثينا للمقاومة ،،على رأس هرم رياضتنا ،، ((يسولفون اهلنه يكولون يوم من الايام اكو فد واحد اخذ مرته بالعيد وراح لهلها ،كالها ولج امشينه خل انضيف اهلج ،، ونشوف شمسوين بالعيد فيكولون وصلوا استقبلوهم استقبال حار ،وكعد الزلمة وي عمة بالمضيف وعمه جان فكَر يعني حسرة عليه اللكمة بس ذبحلهم ذبيحة وكال خاف بعد يومين يعير بتي وهو يدري بنسيبة مفجوع والسانه طويل ،،فاجت ام الجهال كالتله ابو فلان خوية الذبيحة انوديها كلها الكم ؟؟ لو ناخذ حصت العيال منها ؟؟ كالها لا احنا نفرين ما راح ناكل هواي فخليها كلها كدام رجل بتج حتى يكول اعمامي اهتموا بيه ،، ومن نخلص نرجعلكم الصينية وتاكلوها كلها ،،كالتله ميخالف ,,صدك صبوا الاكل وصاحبنا وكع على الذبيحة فصخها تفصخ !! اول ما بلش بالصدر اتدور نزل على الافخاذ مرعدها تمرعد وعمه صافن عليه ما يدري شيسوي ؟ لا يكدر يكوله عمي الزعاطيط ظلوا بغير اكل على كيفك وي اللحم ولا يكدر يواكله ويخلص الاكل وياه !! فصفن عليه كاله بوية اشلونه الاكل عود يريد يحسسة ،،كاله ولله عمي زادك طيب كلش وما كو اطيب منه ،كاله أي ولله ياعمي من فكَر عمك ،، لو ما عمك فكًَر ما صار زادة طيب )) شاهد سالفتنه فكَرنا الخلة زادنا طيب بحلوك الطائفيين وسراق اموال العراق والغير موهوبين امثال حسين تعيس وربعة ،،وهذاك اليوم واحد من ربعنا كال شكو بيها يعني واذا خسر العراق هي الطوبة ربح وخسارة وثانيا شدعوة كًالبين الدنيا على حسين سعيد لعد هو مو الجاب كاس اسيا ؟ لو لأن سني ؟؟ فجاوبته (كتله الطوبة ربح وخسارة صحيح بس بالعراق الطوبة مو ربح وخسارة الطوبة لازم تصير ربح بس ) لأن الطوبة هي المنفذ الوحيد لتجميع ابناء الشعب العراقي وتنسيهم همومهم ،، الطوبة هي الي خلت الام العراقية تكول فدوة ابني للمنتخب العراقي من انكتل ابنها بالتفجيرات العام ،، الطوبة هي الي خلت الاعمى العراقي يطلع بالتلفزيون يكول امنيتي الله يرجعلي بصري ساعة ونص بس حتى اشوف انتصار فريقنا على قطر ،،الطوبة هي الموتت الطائفية بالعراق وخلت اهل الرمادي يهوسون باسم عماد محمد واهل النجف يهوسون بـأسم هوار واهل اربيل يهوسون باسم يونس ،الطوبة هي اللي خلت سبع وعشرين مليون عراقي شادين حزمهم ويردون يركصون للصبح من الفرح ،،هاي الطوبة بالعراق فعرفت يا صديجي ليش العراقيين نصبوا عزة ورة لعبة قطر لأن الموضوع عدهم اكثر من رياضي ثانيا حسين سعيد طلع براديو ساوا احمد عباس وروح اسمع شحجه على حسين سعيد وصفقاته المشبوهة وي الشركات واعضاء الاتحاد نفسهم اشتكوا على حسين سعيد من وره الاعيبه المشبوهة وثانيا عمت عينة اذا هوة جاب كاس اسيا الي جاب الكاس هوة عراقي لا يحمل الجنسية العراقية اسمه (فييرا ) والعراقيين لازم يسوون تمثال لهذا الرجل فحسين سعيد لو بي حظ جان اتعاقد وي الرجال وخلاه مو موع القضية وراح جاب رفيقة بالنضال عدنان حمد الي قبل يومين طلع على البغدادية وكال الحكومة مجرمة وعميلة والعملية السياسية بالعراق اجرامية وتابعة للاحتلال والسنة والشيعة والاكراد خونة بس هو مناضل ثانيا منو كالك حسين سعيد سني حسين سعيد اصلا مو عراقي (لان عنده علم خاص طلع هذاك اليوم بالتلفزيون وهو علم عمه صدام وعده نشيد وطني خاص وهو نشيد البعث الي انعزف بدبي والسنة العراقيين علمهم علمنا ونشيدهم نشيد موطني وهمه الي هاجوا على البعثيين والارهاب وشردوهم بليلة ظلمة،وعدنان حمد يهدي للارهابين فوز العراق باثينا )ادور همه السنة نفسهم بالبرلمان واباقي الاحزاب اول ناس وافقوا على قرار الحكومة بازاحة حسين وحل اللجنة الاولمبية فشلون حسين يمثل السنة بس تدري منو سوة هاي الدعاية الفاشلة سواها حسين سعيد نفسة من اشتكة على بلده بالفيفا وكال زاحوني لأن سني والحكومة شيعية ويردون يخطفوني ، هاي سوالف حسين ودعاياتة ثانيا يا خوية احسين سعيد قاد اتحاد وفريق العراق الي ما يمثل السنة وحدهم يمثل كل العراق وثانيا عيب ولله يجرنا حسين سعيد وجم واحد بعثي تعبان اصابعة متلطخة بدم رياضيي العراق الى فتن طائفية ماتت بالعراق من هاج البطل عبد الستار ابو ريشة وربعة على ربع عدنان حمد وشردهم بليلة ظلمة )،،المهم لكل جواد كبوة وسودة بوجه الحكومة العراقية وعيب علينا ننتخب أي واحد منها بالانتخابات الجاية اذا ما حاسبوا المسئولين عن (نكسة الاحد السوداء )الي سببها الرئيسي غباء عدنان حمد ابن المقاومة الشريفة ،،وحسين تعيس خليفة عدي ، ولازم نستفاد من الدرس بصناعة رياضة عراقية ونطلع من حالة الطوارئ العاشت بيها الرياضة العراقية طول هالفترة ،،ونبني المؤسسة الرياضية بشكل علمي وجديد نستفاد من تجارب اليابان وغيرها من الدول الي بدت من الصفر ونرتب دوري محترفين قوي مو دورينا التعبان الي يوم يفوز بالدوري الزوراء ويوم فريق الحمزة الشرجي !! لازم تترتب المؤسسة الرياضية العراقية اعتمادا على الكفاءات العراقية والعراق الي انجب عمو بابا ودوكلص عزيز وفلاح حسن وهادي احمد بيه كفاءات رياضية تستحق ان تنعطي فرصة وكافي متاجرة بأسم العراق الرياضي ،، ومن نرتب وضعنا بعد ماكو جلب يكدر يعضنا حتى لونزلنا من ابعير المنافسات والفكًر نحفرلة ونطمة وي الاسماء الي راح تنطم وتندثر بعارها لأن سببت الالم للشعب العراقي وحوبة العراقيين ما تخطي الياذيهم انشاء الله .

العودة الى الصفحة الرئيسية