بنت الرافدين

أيها العراقيون كوكا كولا بدلاً من الماااااااااااء ..!!!

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

من ضمن بنودألأتفاقية ألأمنية المشتركة التي ستفرض (حتماً) على الحكومة والبرلمان ستكون هنالك العديد من البنود المهمة والمفيدة للطرفين .. بموجب تلك ألأتفاقية سنرى العجب العجاب بالأخص من الناحية ألأقتصادية والتجارية والبازارية*وتوفير السلع المهمة و التي لم نراها إلا من خلال (الكتلوكات) والتلفزيون والمجلات ... طبعاااااا لعد شلون ؟؟؟ .. دي أمريكا يابااااااااا هو للساع شفتم حاكَة؟؟!!!.

من ضمن ألأتفاقية أستفادة الشعبين الصديقين ( جداً ) ألأمريكي والعراقي من خيرات البلدين وبشكل مفتوح وبسخاء تام لحد التخمة .. أفرحوا يا الناس الخير قادم !!!.

ــــــــــــــــــــــــــــــــــ

ـ حمداااااااااان .. يعني أمكانيات أمريكا وقدرات أمريكا ألأقتصادية من غير حدود.. طيب ياترى شراح تستفاد أمريكا من العراق !!؟؟.

+ خوش سوعال!!!... أغاتي خيراتنا أكثر.. يعني على سبيل المثال :

من المفروض أن يستغني ألأمريكان من المربيات نهائيا... يتناولون / دبس AA والمعروف عن الدبس تنطي حرارة وقوة ورجولة.. بذلك راح يستغني رجال أمريكا عن حبوب / الفياغارا اللي أسعارها نار كبرة.. بالمقابل دبساتنا !!برخص التراب وعسل تمر طبيعي .. يعني وين حبوب؟؟ ووين عسل التمر؟؟!!!!.

شفت شلون وهذه راح أتشغل آلآف من العاطلين عن العمل.. راح يصير تنسيق بين وزارات مختلفة يعني وزارات العمل والزراعة والتجارة والخارجية.. كلها تلتهي بالدبس.. أويلي من نتائج الدبس!!!.

ـ وبعد ...؟؟؟.

+ أكيد .. شوف مثلاً :

تعويد الشعب ألأمريكي على أكل ( المسموطة )* .. يعني البداية مع آلآف من الجنود وآلآف من موظفي السفارة ألأمريكية وآلآف من الجواسيس والمخبرين وآلآف من شركات الحماية.. وأخرون .. يعني بأختصار وجود مايقارب نصف مليون من ألأمريكان اللي بالعراق .. يعني شوية شوية راح يتعودون وتصير أكلتهم المفضلة.. وبعدها راح تنتشر بكل أمريكا.. وتعال وشوف .. يعني هذه مثل السلسة واحدة مرتبطة بأخرى.. يعني راح تساهم أمريكا بجد في أحياء وتطوير ألأهوار.. يعني راح يرجعون أهل ألأهوار وهم يتمتعون بكافة ألأمتيازات من بيوت محترمة ومكيفة ومدارس ومستوصفات وقوارب حديثة... عدى الجميع تعمل بالصيد.. طبعاً لعد معقولة الشعب ألأمريكي الصديق من غير مسموطة؟؟؟.. لعد وين ألأتفاقية؟؟ لاء عيوني راح تصير حركة ما تعقلها..!!!.

يعني وهذه راح تتوسع.. يعني بأنحاء أمريكا راح أنشوف بجانب كل مطعم للأكلات السريعة ألأمريكية ( ماكدونالدز ) مطعم للمسموطة .. بس أحنة مانقدم وية المسموطة / كوكا كولا... لاء أنقدم لبن أربيل... يعني شفت الشغلة شلون توسعت.. يعني بحدود مليون شخص راح يستفاد من هالشغلة.

وبعدين شوف ألأعلانات ألأمريكية.. تلفزيون.. مجلات.. صحف.. مواقع الكترونية كلها تشيد بالمسموطة !!!.

ـ حمدان.. بالعظيم إذا هيج يعني أحسن أتفاقية... وردة.. فلة والله ياريت يصادقون عليها رأستاً!!!. ... وبعد ؟؟؟.

+ يامعود آلآف البنود اللي أكثرها غير معلنة .. يريدون يسووها مفاجئة للعراقيين.

+ مثل أيش؟؟ تعرفهن ؟؟.

+ أكيدن!!!.. شوف :

تعويد نفس الجماعة على السهر والفرفشة مع الغجر ( الكاولية ) ، هذه الشريحة المهملة اللي شغلهم قليل وقليل جداً.. يعني شوف عظمة الحكومة والرئاسة والبرلمان.. ماكو شريحة وماتفكر بيها.. شوف.. السهر والفرفشة من المسائل الضرورية بالأخص أوقات الراحة وألأجازات.. تمام؟؟.

ـ تمام..

+ شوف.. هذولة نفس الجماعة راح يترددون على الكاولية.. شوية شوية راح يصير عدهم أدمان.. يعني ألأجهزة ألأعلامية ألأمريكية راح تنقل هالأخبار.. وبعدين الشعب ألأمريكي راح يطالب بقوة.. طوابير تقف أمام البيت ألأبيض تطالب بمايلي :

· أنريد / ساجدة عبيد وفرقتها !!.

· الى متى تحرموننا من أغاني / حمدية صالح ؟؟؟.

· لا لأغاني البوب والهوب والتوب والشوب والكلوب وفينك كلونك .. نعم لأغاني / غزلان وسمر ونجوم وتسواهن !!!

ومطالب أخرى.. وهذه بمرور الزمن راح تتوسع وماتشوف إلا وجلسات ألأمم المتحدة ومجلس ألأمن تفتح وتغلق بوصلة غنائية من أغاني / ساجدة وحمدية !!!... شفت ألأمور وين وصلت ؟؟؟.

كل هذه وكَول الحكومة ماتفكر بالعراقيين.. أخوية أكو عقول .. في مخ مش مهلبية.. أمااااااااااااال!!..؟؟؟.

ـ حمدااان.. هذه فكرة جهنمية... وبعد !!!؟؟.

+ والله هواية... خليني حبة حبة..

ـ زين وألأمريكان شراح يقدمون ؟؟.

+ لاء.. هم غير... شوف أمسوين خطة أصلا ماتخطر عالبال...شوف :

· فتح دورات للعراقيين بنسيان الكهرباء.. يعني شنهو كهرباء.. تعرف العيش تحت أضواء الفوانيس والشموع شكد عظيمة.. رومانسية.. مهدئة للأعصاب.. مفيدة للعيون؟؟ ..بمرور الزمن راح ننسى شىء أسمه الكهرباااااااااااااااااااء !!.

· توزيع مجلة الـ ( Play boy) على العراقيين... ومجاناً.. بالأخص على الطلبة والطالبات !!!!... والمجلة المذكورة أشهر من نار على علم!!!.

· صبغ سيارات ألأجرة ( التاكسي ) باللون ألأصفر أسوة بالوضع في كبريات المدن ألأمريكية.. والدفع بالدولار ... لادكَول ليش؟؟؟.. لكون راح يصير الدولار بفلس !! نعم صدكني راح أنشوف العجب!!!.

· توزيع سندويجات محترمة من الدرجة ألأولى من همبركر وبيف بركر والزلاطات من شركات ماكدونالدز على طلبة المدارس.. ومجاناً .. يعني مع بداية الدوام لفة.. وقبل أنتهاء الدوام لفة أخرى.. يعني الطالب ماراح ياكل بالبيت.. وتدري هذه شكد بيها مردود أقتصادي.. خوتعرف عدد الطلاب من رياض ألأطفال الى الدراسات العليا وعندك الحساب!!!.

· أفتتاح عدد من صالات ألألعاب مثل الموجودات في ( لاس فيغاس) ..يعني صالات لعب القمار بأنواعه..البوكر .. البقرة.. الروليت ..بلاك جاك .. طرة وكتبة!! ..وراح أنشوف العجب.. حسناوات (لاس فيغاس) بملابس ....... يروحن ويجن وألأبتسامة!!! أويلي على هالأبتسامات ..بالعظيم أدوخ...بليس.. بليس.. كوم.. ويلكومن ... ويلكومن ..!!!... ربيع دائم.. صدكني لو تخسر الملايين ومايهمك.. تخرج وأنت الممنون ... موعيب تتأثر... باجر تروح ولكن شوية من وكت!!!!.

· ألأهتمام بجيل الشباب وأحتضان ذوي المواهب وذلك بأفتتاح دورات لتعلم العزف على ألة / الجاز والسكسيفون.. بالمقابل أحنه همينة نفتح دورات للمحاربين القدماء ألأمريكان لتلعلم العزف على آلة ( الربابة ) وألأغانية البدوية كأغنية / ياذيب ليش تعوي حالك مثل حالي... وبأشراف جبارعكار!!.

· فتح باب الهجرة وقبول لجؤ كل ذوي أختصاص في العراق من علماء وأساتذة جامعات وأطباء أختصاص.. يعني بس يقدم أوراقه وأثباتاته رأستاً!! يقبل كلاجىء في أمريكا ومع أول طيارة ... باي.. باي !!!... وطز بجامعاتنا !!!.

· ألأستغناء عن الماي!!.

ـ حمدان أبختك.. هاي شلون دبرتها ؟؟؟ هذه لايمكن أطلاقاً ..يستحيل !!... بلامااااي؟؟؟ ما أظن هيجي كلام .

+ هيواشك علي .. بروح أبوك ياهو ألأطيب الماي مال البواري وبالصيف لو / كوكاكولا المثلجة اللي ينزل عالكَلب ويبرد ألأمعاء الدقيقة والغليضة ؟؟؟.

ـ أكيد الثانية.

+ شفت... يعني ماي موجود.. للغسل والطبخ.. بس للشرب لاء.. يعني شركة كوكاكولا تكفلت بتوزيع منتوجها على كافة العراقيين .. وهذه راح تكون بكل محلة تنكيات كبار بيها كوكاكولا باردة.. يعني بس تفتح الحنفية!!!.. يايابة... بيك خير وتشرب.. أشرب ..أشرب.. عساك تغتسل بيها.. وأبلاش.. تصور !!!.

ـ حمدان وإذا فرغت التنكيات؟؟.

+ ماكو أسهل منها.. هناك تلفونات خاصة.. بس تخابر.. رأستاً!! تجيك سيارة ألأطفائية..

ـ حمدان.. يا أطفائية.. شنهو عدنا حريق؟؟؟... أنت متوهم.. أخوية سيارة الحريق لأطفاء الحرائق!!!.

+ لاااااااااااااااااااء .. ولك بابة سيارات ألأطفائية بيها / كوكاكولا مثلجة .. يعني يجوك ويترسولك كل السطولة والطشوتة والجدورة مع ألأعتذار وتقديم علبة حلويات وبوسة من الراس!!!.

ـ حمدااان.. هذه جنة!!!.

+ بابة لعد شكَال بهلول؟؟؟ موكَنالكم وافقوا... وبعد وين ووين؟؟!!.

ـ بعد هم أكو..........؟؟؟.

+ أكيد.. بس خليها الى الحلقات القادمة..

ـ حمدان.. أبو البلاوي أنت ظل صنف..

+ ألأيام القادمة تثبت أقوالي... اللهم أخزي من يلعب بمشاعر أهلنا وناسنا..

ـ آمين يارب العالمين .........

---------------------------------

· بازار = سوق أو أسواق

· المسموطة : سمك تتجفف عالشمس لعدد من ألأيام في الصيف بعدها تخزن.. تطبخ في أوقات الحاجة.. أما رائحتها يامن يتحملها!!.

العودة الى الصفحة الرئيسية