جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

tcharmaga@hotmail.com

راديو سوا - هددت كتل نيابية غير منضوية في الحكومة برفض قائمة مرشحي الأحزاب الحكومية لتولي السفارات ومناصب وكلاء الوزارات خلال جلسة التصويت على ذلك، في حال استبعدت الحكومة أسماء مرشحيها لتولي هذه المناصب.
وأكد النائب عن الكتلة الصدرية بهاء الأعرجي في مؤتمر عقده أعضاء جبهة التنسيق البرلمانية التي تضم عددا من الكتل النيابية غير المنضوية في الحكومة أن الأخيرة أبعدت أسماء جميع المرشحين المقدمين من الأحزاب غير المشاركة في الحكومة لتولي هذه المناصب.
من جهته، اتهم النائب عن جبهة التوافق ظافر العاني من سماها الأحزاب الكبرى باعتماد "منهج تخريبي في بناء الدولة العراقية".
في غضون ذلك، قال النائب عن الكتلة العربية للحوار الوطني مصطفى الهيتي إن الكتل النيابية في جبهة التنسيق البرلمانية رشحت شخصيات كفوءة لتولي مناصب السفارات ووكلاء الوزارات.
وكان رئيس لجنة العلاقات الخارجية النائب عن الائتلاف همام حمودي أكد في حديث لـ"راديو سوا" أن رئاسة الوزراء ارتأت قبول المرشحين من الكتل النيابية المشاركة في الحكومة واستبعاد مرشحي الكتل الاخرى نتيجة مواقفها السلبية، على حد قوله !!!!.] .

خوش كلام.. صريح وشفاف ومفهوم من غير شرح أطلاقاً !!.

السفير والسفارة يمثلان الوجه الحضاري للبلد.. فكلما كان السفير نشطاً وله نشاطات ولقاءات وحوارات وعلاقات وأتصالات وغيرها كلما نظر الناس الى المكانة الرفيعة لبلده وناسه .. أما العكس فواضح تماماً...

هنيئا للدول التي تعرف كيف تختار سفرائها بدقة وعناية  .. هذه نعمة ومابعدها نعمة ..

ـــــــــــــــــــــــــــ

ـ حمداااااااااااااان .. من أكَولك أبو البلاوي تزعل .

+ مو على طول.. من تكون على حق لاء.. ليش أزعل ؟؟؟.

ـ بروح هذولاك الطيبين.. هذا ألأسم حقيقي ؟؟؟ ... لو من عندك ؟؟؟. .. أسم غريب .

+ أولا راح تسمع المرسوم.. وبعدين شنهو العجيب في ألأمر الرجل ( حزبي ) وتعين سفير يعني وين الغرابة في زمن الغرائب !!!؟؟؟؟.

ـ زين تعرف نبذة من حياته ؟؟؟ تحصيله العلمي؟؟ أمكانياته ؟؟ وظائفه السابقة.. ماضيه ؟؟ ..  يعني هالأمور !!!.

+ هو مال أعرفه.. كلش زين أعرفه.. يعني فد فترة من جانت عندي البعيرة ..

ـ هيواااااااش .. يابعيرة؟؟؟ شنهو بعيرة وبوسط بغداد؟؟؟... شنو جنت تبيع ملح؟؟؟ لو بعرور ؟؟؟.

+ لا ملح ولابعرور .. أفتهمت غلط .. بعيرة  تعني سيارة فولكا الموديل القديم بالستينيات من القرن الماضي  اللي أستوردت أيام حكم الزعيم الشهيد /  عبد الكريم قاسم.. لكونها محدبة سموها بعيرة.

ـ يامصخم .. وهذه سيارة لو بلية سودة؟؟.

+ هالموجود.. بعتها من زماااان.. وراسك للساع هذيجية تشتغل نفرات بين باب الشرجي وباب المعظم.. عمر الجلب.. قوية ولا كالت آخ راسي !!!.

ـ حمدان.. أني ردت معلومات على سفيرنا الجديد.. أشو كمت تخلط  وتخربط بالحجي عالبعيرة وباب المعظم...؟؟ وين وديتنه ؟؟.

+ غير أنت ؟؟؟

ـ خوش كمل..

+ أخوية ( شبوط جعمقة أبو البعيرة ) كان عنده محل بمنطقة الشيخ معروف ( المنطقة الصناعية قرب /  سينما زبيدة ) .. مصلح خاص للبعيرات!! .. يعني صار خبير بمعنى الكلمة .. تصور من جنا أنروحلة.. هذه أخر ألأيام كَام ينطينة سرة.. يوم.. يومين ومرات تلاث أيام.. سرة.. كتل ومايلحك .. الله لايجذبني كان عنده ست عمال وأسطاوات!!.

ـ حمدان.. جيب خبزة أحلفلك أنت اليوم مو طبيعي.. أخوية أني سألتك عالسفير الجديد وأنت تحجيلي على فيتر وسينما زبيدة وميكانيكي مالة البعران والبعيرات... شجاك؟؟.

+ أخوية بس أنطيني عطوة.. صدكني صاغ سليم.. راح تجيك.. شوية صبر .

ـ تفضل آغاتي وأمرلله.. اللهم طولك ياروحي.. تفضل بروفيسور حمدان .

+ هو أثاري مع أنه أسطة مضبوط بس كان عنده علاقة .. تعال دأشاورك ويه جماعة ( ....) وهذه العلاقة أنه .. تقرب مرة أخرى لايسمعونا القراء أن السيد ( ......... ) هم كانت عنده بعيرة ويوميا عاطلة وشالعة كَلبه.. بس ألأسطة /  ( جعمقة ) كان يحترمه ويصلحلياها رأستاً!! نعني !! من غير سرة ومواعيد وشلعان كَلب و أنتظار وتحمل الحر والبرد مثلنا .

هذا السيد ( اللي كَلتلك بأسمه ) فديوم صاح ( جعمقة ) على صفحة لزم شواربه وكَالة :

( شوف يا أسطة جعمقة ) وحق كل المقدسات بصل نوصل للحكم لأخليك سفير العراق  بروسيا ... حتى فعلا تزور الشركات الروسية وتتعرف على عالم سياراتهم ومن قرب ومن موقع مسؤلية كسفير للعراق هناك!!!.

ـ وجعمقة شجاوبه؟؟.

+ خرب من الضحك.. يايابة شكَد ضحك حتى راد يختنك.. بس بعدين أعتذر منه وكَاله أشكرك بس فدوة الجدك خليها بيناتنا ترة عندي درزن جهال ماعدهم غيري !! بيش تطلبني ..أني والسفارة كجة مرحبا؟؟ .. لاتيتمهم .. خليني بصنعتي اللي كافية وزيادة .. وهذاك اليوم ما أخذ منه فلوس التصليح بس كَالة بس اليوم لكون أكيد باجر هم ترجع!!!.

ـ وبعدين.. والله هذه خوش سالفة.. كمل .

+ أكيد .. مو كَتلك أصبر...

ـ كمل رحمة على هذولاك ..

+ والله راحت أيام.. أجت أيام.. أسطة ( جعمقة ) بعد ما أنتهت البعيرات تقريبا كَلب عالموسكوفيج واللادا والوازات* .. نعني!! هم سيارات روسية !! .. والله فديوم جان بالمحل.. بس تدري بسبب الظروف ألأمنية الشغل مو هذاك الشغل .

طبكَت سيارة رباعية الدفع ( مصطلح جديد ) ومظلله.. وكَفت أباب المحل مال ( جعمقة ) ونزلوا شباب مسلحين.. سلموا وكَالوا من هو أسطة ( شبوط جعمقة ).. الرجل أخترع.. بس شيسوي.. كَال أني أغاتي تفضلوا أمر خدمة .. بخدمتكم !!!؟؟.

كَالولة تفضل ويانة ألأستاذ ( .......... ) رايدك!!!.

المسكين راد عالج.. تدري يخاف.. شباب وأمسلحين وهيجي سيارة.. الله يستر .. المكَرود يتوسل.. تالي كَالولة بالسر اللي بينه وبين هذاك اللي كانت عنده ( بعيرة ) وبين ألأسطة.. نعني شوية أرتاااااح وماكو جارة صعد وياهم .. بس هم زين تذكر القصة..مرت عليها سنوات وسنوات !!!.

ـ وبعدين؟؟.

+ ورا ساعتين .. تلاثة  رجعوا للمحل وجهه كله يضحك.. ومرتاح.. وكَال للصناع: بابة المحل الكم أني بطلت راح أستلم وظيفة بالحكومة !!!؟؟

ـ سفير؟؟؟.

+ لاء بعد.. أولا السيد ( الفلاني ) ناطي رزمة دولارات .. وكَالة تتذكر وعدنا .. وأنت  من خربت من الضحك...؟؟؟.

أسطة جعمقة أعتذر وكالله : مولانا أنت كنت تعرف الوضع لاتلومني .

المهم قبل أعتذاره.. حمله هالدفاتر مالة الدولارات وكَاله هذا رقم تلفوني الخاص.. وأنتظر راح تتعين بوظيفة يحلم بيها كل أصحاب الشهادات العليا والتنكقراط !!.

ـ وشكَال جعمقة ؟؟.

+ جمعقة رأستا!! كَالة : مولانا أني مو تنكجيقراط !! أني فيتر مالة السيارات الروسية خو جنابكم تعرفون .. التنكجي وحد.. يعني مهنة مختلفة تماما. !!!... بعدين مولانا وبعد ما خرب من الضحك ....  فهمه شنهو التكنوقراط !!.

ـ وبعدين..؟؟.

+ أنتظر حوالي سنة بس كل شهر عنده ذاك الحساب.. والمهم ألأسطة ( جعمقة ) كَام وحسب التوجيهات يلبس بدلة وربطة ودخل دورة مكثفة للقرأة والكتابة .. يعني صار يقرأ ويكتب مضبوط .. بس هو هم جان يعرف شوية يقرأ ويكتب.. يعني خومو أمي بمعنى ألأمية.. الله لايجذبني دارس الى صف الرابع ألأبتدائي.. أي لأنه كَال ما أعرف طكة من ألأنكليزية .. هذا يعني ماواصل الى الخامس ألأبتدائي وميعرف حتى أسماء الحروف بالأنكَليزي ..

ـ وبعد؟؟.

+ بعدين دخلوا دورة في معهد الخدمة الخارجية التابعة لوزارة الخارجية..

 وهناك يعلموه أنواع ( ألأتكيت ).. يعني شلون يتصرف كدبلوماسي مع ألأخرين .. شلون يكَعد.. شلون يستعمل الشوكة والسكين.. أنواع الخواشيك.. ياهي مالة الزلاطات؟؟ ياهي مالة الحلويات وألأيس كريم ؟؟ أسماء عدد من ألأكلات ألأجنبية  وبعض المصطلحات الضرورية .. شلون يستقبل.. يودع .. يبتسم .. يتكلم بالتلفون .. يختار الملابس وينسق ألألوان ... يأشر بأيده ...  وهكذا .. لكون السفير واجهة ويمثل بلده لذلك أية غلطة تنعكس على البلد والحكومة ووزارة الخارجية .

ـ وبعدين..؟؟

+ المسكين ثاني يوم من التطبيق.. ويدخلك جطل ( شوكة ) بعينة اليسرى .. والله ستر ماراحت عينه.. أخذوا للمستشفى وربك ستر وظل يعاني لأيام  !!!.

ـ وبعد..؟؟.

+ ورا كم يوم.. شايل قلم الحبر.. وينفظها نفظة قوية وبعيون المدرسين.. هم ربك جابهة عدلة.. يكَولة رشقة حبر عالجماعة !!!... و اليوم التالي ديعلموا شلون يشد ربطة العنق.. الله ستر وما أختنك.. يعني بعد ثوان وينتهي المسكين !!!.

ـ والتالي..؟؟

+ تالي رسبوا.. يكَولك .. مثلاً :

بالتطبيق مالة ألأكل.. بس يندار المشرف على الموضوع .. رأستاً!! شمر السكين والشوكة وكَام يضرب بالخمسة.. حاولوا ويا كَال مستحيل أدبرها.. ما أكَدر ولاتلحون .. !!.

ـ النتيجة؟؟.

+ النتيجة يتدخل ( عمه أبو الواسطة ) ويخلوا ألأول عالدورة وفي كل المجالات والدروس وغير الدروس .. !!!.

ـ حلووووووووووووو ... يعني راح يصير سفير !!؟؟.

+ أكيد.. أكَولة ألأول عالمجموعة كلها وبأمتياز  ... نعني راح يخلوا بدولة محترمة .. كودن طلع ألأول عالجميع!!!.

ـ ووين راح يعينوا أنشاءالله تعالى ؟؟.

+ مايعرف بالضبط .. طبعا مو بروسيا .. كودن روسيا مخصصة لغير حزب وجماعة .. بس أكيد بمملكة بنص أوربا ..الواسطة مالته بشرته أن أسمه موجود ضمن أسماء السفراء في أوربا.. يعني وين مايخلوا جنة ..!!.!!!.

ـ حمدان على بختك.. هذه كارثة؟؟.

+ شنوووووووووو ؟؟ عليش كارثة؟؟ هي مو كلها واسطات ؟؟؟ .. ها نسيت.. بس بعدين صار عنده ماجستير بالرياضيات !!!.

ـ  زين وهذه شلون دبروها؟؟؟.

+ أنت غشيم ؟؟ لو دتنصب علي؟؟؟ .. بابة أشترى شهادة بجم دولار من سوكَ / مريدي بمدينة الثورة  .. بس جماعة ألأستاذ  نصحوا وكَالولة أختار أختصاص بعيد عن أختصاصك حتى لاتنحرج.. يعني لو مختار قانون لو علوم سياسية مثل أكثرية المسؤلين كان يجوز ينحرج في ندوة.. أجتماع .. لقاء دولي .. مقابلة تلفزيونية .. بس الرياضيات شغلة محد يتحرش بيها.. نعني بعيدة عن أختصاصه كلش ......  تمام؟؟؟.

ـ والله ياحمدان شأكَولك.. بس سؤال ؟؟.

+ كَول؟؟.

ـ ليش ما سووله شهادة دكتوراه على وجه؟؟ مو أحسن؟؟؟؟... أقلاها كان أكثر أبهة.. معالي السفير الدكتور / شبوط جعمقة أبو البعيرة ..!!.

+  أخوية يابعيرة..؟؟ على كيفك.. على كيفك .. بعد ماكو بعيرة.. لاء.. بس شبوط جعمقة وخلاص وبعدين السبب الرئيسي أن الرجل  متواضع.. يعني كَالك شنهو الفرق ؟؟.. الماجستير هم شهادة عليا.. ونهائيا ماقاصرة!!.

ـ لايابة لاء.. فعلا متواضع.. خلف الله عليه ما سوى شهادة بروفيسورية في علوم ألأقتصاد والسياسة الخارجية والدولية .. والله خوش أدامي.. فدوة أذا شفته سلمللي عليه وكَولة الف مبروك معالي السفير .

+ المن؟؟؟.

ـ جعمقة.. أكو غيره؟؟.

+ تحجي صدك؟؟.

ـ لعد قابل بن عمه؟؟.

+ أخوية / جعمقة بالمنطقة الخضراء.. سكن خاص.. خدم وحشم سيارات مظللة ورباعية الدفع وحماية وسكرتارية ومكتب ومدير مكتب وسكرتيرة  .. منهو يوصلله؟؟؟.

ـ الف عافية.. سؤال أخير.. شنهو معنى / جعمقة؟؟؟ يعني أسم جده؟؟ لو لقب؟؟ لو عشيرة؟؟ أشو أسم غريب!!.

+ أكيد.. جعمقة قطع غيار مالة سيارات البعيرات الروسيات صايرة أبطن المحرك ... لكون ألأسطة .. العفو سعادة السفير كان أختصاص بالجعمقة ، يعني ماكان يكلف أبو السيارة ويكولة أشتري ( جعمقة ) جديدة.. لاء كان يصلحها وينطي كَرنتي لمدة سنة .. وعلى هذا ألأساس مشت عليه التسمية .. أي كلمن ياخذ نصيبه!!.

ـ حمدان.. من عابت هالنصيب اللي كلها حيل وكلاوات.. هذا يانصيب حمدان؟.. زين هذا صاحبكم /  سعادة السفير( الجعمقة ) شلون راح يقدم أوراق أعتماده كسفير لجمهورية العراق للملك أو الملكة ؟؟؟.

+ وعليش حارك أعصابك ؟؟.. خو أكو واحد أخر أضرب من / جعمقة.. تريد أسولفك قصته...؟؟
ـ حمدان بالعظيم أضرب روحي بهذه السجينة.. كافي الله عليك... كَوم خلي نشربنة أستكانين جاي و أمرنا لله الواحد القهار .. شلون زمن دخيل الله ؟؟ ... وسلمنة على الجعمقة...

+ وعليكم السلام.. بعد الجاي أحجيلك عالثاني.. هذاك أصلاً  فلته!!!.

ـ ليش لاء.. عشنا وشفنا.. أسطة / جعمقة سفير العراق في أوربا ...

+ أخوية لاتتعجب.. يعني المن تريد سفير...؟؟ ألأساتذة وأصحاب الشهادات العليا اللي واحدهم ماعنده أية واسطة ؟؟؟ لو اللي مثل ألأستاذ / جعمقة؟؟؟ .. الرجل هم عنده نضال وتعب وعمل.. يعني خومو جابوا رأستا !! وخلوا سفير.. هم أكو أعتبارات !!.

ـ تمام.. لازم نكَلب المسألة  180 درجة ، جماعة / جعمقة أساتذة وأختصاص.. وأصحاب الشهادات الحقيقية لاء.. ليش لاء؟؟ كلشي يصير .. زورق مقلوب.. رزم نوري بريدي ..

+ هاي شجاك؟؟؟.

ـ يمكن تخبلت... دزلي على أستكان جاي لأكَوم أجرللي مقام / حكيمي وبستة وفراكَهم بجاني!!.

+ جايين وطاسة ماي ياولد...

--------------------------------------------------------

* وازات / جمع واز .. سيارة جيب روسية عسكرية بالأصل ولكن الحكومة باعت المئات منها كخردة .. ولكن أهل الخبرة جمعوا تلك الخردوات وجعلوا منها سيارات قوية ومتينة .

ـ { وأنت عزيزي القارىء.. يمكن أكو حلقة أخرى على الفلتة الثانية اللي ما أعرف لقبه لحد آلآن ........... الله يستر بس لايطلع لقبه جملغ !!} ـ

العودة الى الصفحة الرئيسية