بنت الرافدين

جمعية التفكير فى الهجرة

خلاص هانت كلها كام يوم ونقول وداعا للانترنت وللأخبار الصادقة هنودع المدونات والمواقع الجميلة اللي بتتكلم بمصداقية وحيادية خلاص مصر هتبقى سجن كبير اى حد هيفتح فمه هيتقطع لسانه خلاص اللي عنده كلمتين يلحق يقولهم قبل ما النائب إياه انتوا عار فينة يعزم نواب الحزب فى فندق ويمرروا قانون البث والعملية تتم فى ديمقراطية تامة والموافقة تتم والتصويت فى بهوا الفندق ويتم إعدام الأقلام وإلغاء كلمة لا من جميع قواميس اللغة فى مصرنا الحبيبة خلاص هنبقى أشباح وعبيد حتى الكلام بقى ممنوع حتى السكات بقى ممنوع نحن عبيد المحروسة خلاص هنغير التقويم وسوف نبدأ من عام 1890ميلادية خلاص مش هنتكلم فى التليفون مش هنشوف غير قنوات الكرتون والمسلسلات والأفلام الهابطة خلاص أطباق الدش (الستالايت)

هيتم إعدامها واحتمال نلبس الشبشب الزنوبة والجلبية خلاص كل شيء بقى واضح هيعدمونا لأننا بنكتب كلام محدش بيقراة أصلا أنا قررت اعمل جمعية اسمها جمعية التفكير فى الهجرة ايوة لازم نفكر فى الهجرة ونسبلهم البلد ونمشى ندور على وطن تانى ومكان تانى وطن جديد يحترمنا وطن يحترم الإنسان ويعاملة كانسان مش عبد وطن ميكونش فية حوادث وجرائم بدون مجرم حقيقي يقدم للعدالة

وطن فية وزير يبقى عندة دم ويستقيل لما تحصل مصيبة فى وزارتة

وطن بدون محاكم عسكرية للمدنيين

وطن ميكونش اللي بيحكمة الداخلية والقهر

وطن يكون فية فصل بين السلطات

وطن من حق اى حد فية أنة يحلم يبقى رئيس

وطن ميكونش فية تلفيق تهم وترزية قوانين

وطن لا يضطهد فية الأقلية

وطن يكون فيه إعلام محايد نزيهة

وطن يكون فية الخبز متوفر بدون طوابير ومهانة

وطن يوفر وظائف لمواطنية تتناسب مع ارتفاع الأسعار والحياة

وطن يكون متوفر فية بنزين 80 من غير ضرب نار

وطن يحاكم وزير التعليم ازاى تسربت الامتحانات ويحاكم وزير التعليم لما يلغى مادة القيم و الأخلاق من المناهج

وطن يوفر حرية انى أقول لا فى ميدان عام من غير اعتقال ومن غير ما حد ينتهك عرضي ويرميني فى الصحرا ء من غير هدوم

وطن ميكونش فية الإنسان رخيص ولا محافظ بيكدب ولا مدير امن بيعمل فتن بين الشعب

وطن ميكونش فية واحد محتكر الحديد والدولة بمزاجها ساكتة وراضية لأنة اى إجراء ضدة هينشر غسيلهم كلة

وطن ميكونش فية رقابة على الكلام ولا التليفونات بدون إذن قضائي

وطن اقدر أغير فية ديني وحريتي وعقيدتي وافكارى فى اى وقت لان دي حريتي وحياتي وشخصيتي

وطن ميكونش فية جماعة محظورة وفى نفس الوقت ليها أعضاء فى مجلس الشعب

وطن ميكونش حد فوق القانون

أنا مقهور أنا مضطهد أنا عازيين يخرسوا قلمي وموقعي باسم قانون البث

يلا نسبلهم البلد ونشوف مكان تانى بس بشرط يكون اسم الدولة الجديدة مصر ايوة مصر بس هتبقى مصر من غير فساد مصر الحرية مصر أم الدنيا معا من اجل التفكير فى الهجرة

على الأقل الهجرة من السلبية سوف نقف وقفة رجل واحد ضد كسر الأقلام وإغلاق المواقع والرقابة على الإعلام الهادف سنكتب وسنظل نكتب ولن نتوقف عن الكتابة والإبداع إلا عندما ينتهي الفساد أهلا بالاعتقال والإعدام فى سبيل حرية الفكر لن يمر هذا القانون يا سادة ولن نسمح بتمريرة فنحن لا نملك سلاح سوى القلم فلن نسمح بكسر أقلامنا سنفعل الاتفاقات الدولية ومواثيق حقوق الإنسان أنا هكتب وهفضل اكتب أنا هكتب وهفضل اكتب لحد أخر لحظة فى عمري

السادة المسؤليين فى بلدي رجاء من وطني مخلص ويعشق تراب مصر بلاش القانون دة هنبقى مضحكة بين الشعوب

بلاش القانون دة هترجعونا 1000 سنة لورا خلوا الناس تتكلم براحتها وتطلع الغضب فى الكتابة بدل ما يتحول الكبت إلى انفجار صدقوني كلنا هنخسر والنار هتحرقنا كلنا خلو الناس تتكلم وقربوا منهم بدل توسيع الفجوة اكتر واكتر لية عايزيين تحرقوها؟

لية عايزيين تأخروها ادونا فرصة نحب بعض ونبنى بلدنا بجد

العودة الى الصفحة الرئيسية