بنت الرافدين

حكومتنا الوطنية تخصص ترليون دولار لأنشاء مجمع سياحي على سطح المريخ !!

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

لأننا شعب كسالى الى أخر درجة، لانريد أن نتحرك ونتعب أنفسنا قيد أنملة.. لذلك ترى الحكومة (المركز + أقليم كوردستان) لايعترفون بأية موارد أخرى سواء كانت سياحية أو سياحة دينية .. زراعة .. صناعة.. وغيرها.. أطلاقاً لقد أمسوا يعتمدون على البترول والغاز فقط .. نعم فقط البترول ومشتقات البترول ولأسباب معروفة جداً!!.

حتى السلطات في أقليم كوردستان أصيبوا بنفس الداء ، فبعد أكتشاف المزيد من حقول النفط والغاز في مناطق متعددة من ألأقليم بات ألأخوة النشامى هناك يعتمدون أعتماداً كليا على الذهب المصخم!! ولأسباب معروفة وواضحة أيضاً للجميع!!!!!!!.

ـــــــــــــــــــــــ

ـ حمدان شنهوا ألأسباب ؟؟؟.

+أنت ذكرت السبب ألأساسي والرئيسي.. شعبنا شعب كسلاااااااااااان.. وسبب الكسل هو بتشجيع من الحكومة .. وهذه لاتقبل أية مناقشة .. لكون الحكومة ماتشجع أية مشاريع إلا للأعلان والدعاية !!.

ـ وبعد؟؟؟.

+أخوية العراق يسبح على بركة لابل على محيط من البترول.. الحكومة أدكَول عليش هالوجع بالرآس!! يستخرجون بالملايين من البترول ورأستاً!!! يشحنوها الى بلاد برة والمدخولات بالملايين لابل بالمليارات.. وألأخوة اللي بالسطة ماخذين راحتهم.. منهو يقرأ منهو يكتب؟؟ يعني شوف ألأثنين من جماعة أحزاب متنفذة بالسلطة ..!!.

ـ منهم؟؟.

+ألأخ وزير المال حجة ألأسلام والمسلون / جبر صولاغ ـ دام ظله الشريف ـ وألأخ الدكتور الشهرستاني .. هم دام ظله والوارف.. يعني الشعب شيعرف من الأستخراج والشحن والقبض بالمليارات؟؟ غير من خلال ألأجهزة ألأعلامية الكذابة والمعوقة الى درجة العجز واللي تعمل ليل نهار من أجل ألأخوة النشامى وتحسين صورتهم القبيحة جدا !!!.

ـ حمدان .. ممكن توضح أكثر..؟؟.

+المسألة واضحة للجميع مع ذلك :

الحكومة ما تكلف نفسها بتشجيع القطاع الزراعي.. وإلا التمور في العراق ثروة ومابعدها ثروة.. الرز بأنواعها..الثروة الحيوانية .. من تسأله وتعقب المسألة الرد هذاااااك هو.. أخوية ألأهتمام بالقطاع البترولي أفضل وأسهل وأربح ... وأني أضيف : السرقة أكثر والمال أوفر والناس نايمة ورجليها بالشمس!!!.
بقية القطاعات.. منها السياحة!!... ياسياحة؟؟؟ وشلهم باهالدوخة؟؟؟ أخوية السياحة يرادلها جهد.. صرف.. متابعة... أهتمام... مراقبة..

ألأخوة في الحكومة مامستعدين يشغلون أنفسهم بالهاطراهات.. عليش سياحة؟؟؟ أشو البوري مالة البترول أذا أشتغلت ساعة واحدة بيها ربح مال سنة مالة أبو السياحة وغير السياحة !!!.

ـ حمدااااااااااااااااااااان... والناس؟؟؟... وراحة الناس؟؟؟.

+أخوية ياناس؟؟؟ المهم ألأخوة النشامى اللي واحدهم أجانه على ظهر دبابة ويريدون يحصلوا على أكبر رقم من الدولارات وبعدين.. الله وياك عبوسي !!!... هو أكو من يفكر براحة الناس ؟؟؟ ماكان دبرولهم كهرباء وماي صافي!!.. ياناس؟؟.

ـ بس السياحة بالمنطقة الشمالية وأقليم كوردستان بيها خوش مورد.. وللعلم السياحة عبارة عن :

أولا : المناظر الخلابة والجميلة .

ثانيا : أقامة مشاريع سياحية.. مطاعم.. فنادق.. دور أستراحة.. خدمات .. تسهيلات .

ثالثا : دعم ومتابعة من الدولة ووضع أناس مختصون وأكفاء .

+ عزيزي.. النقطة ألأولى موجودة.. كوردستان جنة الله على ألأرض.. مياه.. جبال.. خضار.. أشجار .. ينابيع.. فواكه.. أعتدال بالجو .. وحتى الخبرة موجودة.. بلاكد الحكومة ( المركز وألأقليم ) مالهم شغله بالسياحة لكون مابيها خبزة دسمة للحيتان.. وحتى لو بيها مو كَد الطموح!! .. هم يريدون يكرفون الملايين دفعة واحدة.. وهذه ماموجودة بالسياحة !!... يعني شتعتقد.. لو يخصصون كم مليار لهذا القطاع ماراح يستفاد منها الآف من أهالي المنطقة؟؟ ماراح يتمتع آلآف من العراقيين الغلابة؟؟ ماراح ينطي سمعة جيدة للبلد بنظر العرب وألأجانب؟؟؟ .. بس ويه من تحجي؟؟؟ وية بن عمشة العورة؟؟؟ لو فطيمة أم اللبن ؟؟؟ .

ـ زين يعني المصايف الموجودة والمعروفة والمشهورة للجميع واللي كنا نتعنالها كل صيفية ...هم تعطلت؟؟.

+حتى أقطع شكك باليقين.. أني شخصيا زرت أجمل مصيف / شقلاوة.. التقيت بالناس أبو ألأنا ( أصحاب المشاريع السياحية من فنادق ومطاعم وكبرات ).. وبالناس العديين.. يعني ما تصدك..!!.

مع ذلك هاك خلي أنشوف هذا الفلم سويا.. وبعدين الك حق تعلق!!.

ـ وين الفلم..؟؟.

+تفضل شوف :

http://www.elaph.com/ElaphWeb/Video/2008/7/351090.htm

ـ حمدااااااااااان .. على بختك.. والحل؟؟؟... يعني لاكهرباء.. لاماي صالح للشرب.. لاخدمات.. النوبة حتى السياحة .. ماكو؟؟ !!!!.

+أكيد مو شخصتلك الأسباب.. أما الحل؟؟؟... الحل؟؟؟ أسأل الحيتان في بغداد وأربيل... ماكو حل لكون أحنة شنهو بيدينا؟؟؟ كل الحل والربط بيد الحيتان الكبار اللي مايعجبهم العجب ولا الصوم في رجب !!! غير واردات البترول والغاز!!!.

ـ حمداااان.. أدعوا دعاء كَول آمين :

اللهم ياربي يبسها.. ولاقطرة !!! يعني شمستفادين من البترول غير الجوع والتشرد والمشاكل والبلاوي وألأحتلال والقتل والتناحر !!؟؟.

+اللهي آمين يارب العالمين ... يبسها عالأخر!!... وينك يا ملكنا الغالي المرحوم / فيصل الثاني اللي ماكنت تتصيف إلا بسوارة توكة وسرسنك وسولاف ؟؟ تعال وشوف حالة السياحة بالعراق... شوف السادة المسؤلين واحدهم مايعجبه يتصيف ويه العائلة إلا في أوربا وأمريكا!!!... ليش لاء أشو خيرات البلد كلها الهم من غير حسيب أو رقيب... أكلوااااااااااا.. مليون عافية.. هي فرصة وماتتكرر عليش مايتمتعون ؟؟؟؟.

ـ حمداااااان .. ياتمتع؟؟ بالعظيم هذه كلها وقتية.. لابد من يوم الحساب.. التأريخ مارحم أحد حتى يرحم حكومة المنطقة الخضراء !!. ... ألأيام بيننا !!!.

+رحم على هذاك الجد الطيب.. سؤال.. بلاكد جوابني بكل صراحة .

ـ تدلل.. شتعرفني؟؟.

+ صريح ونص.. مادكَولي شنهو شغل وزير السياحة أبغداد ؟؟ وألأخر بأربيل ؟؟؟ وياترى هم عندهم خطط ؟؟ مشاريع ؟؟ توصيات ؟؟ أقتراحات ؟؟؟.

ـ للرد على سؤالك أكَول :

الوزيرين كَاعدين بمكاتب خمس نجوم .. النهار كله يكَلبون باهالقنوات الفضائية .. لامو بس هذا يوميا ثلاث ساعات يتكلمون بالتلفون لتبادل ألأراء والوصول الى نتيجة ترضي الحكومة والبرلمان والعراقيين والعرب والمسلمون والعالم اجمع!!!.

+حول أيش؟؟؟.

ـ بعد دراسات.. أجتماعات.. توصيات... سفرات بالعشرات وأيفادات الى الخارج وأستشارة كبار ألأختصاصيين في مجال السياحة قرروا رفع مشرع للحكومة والبرلمان بتخصيص ترليون دولار لأنشاء أكبر مجمع سياحي على سطح المريخ !!!... بس المشكلة هناك أعتراض.. يعني وزارة السياحة مالة بغداد تصر على أنشاء المجع على المريخ.. وبالمقابل وزارة السياحة مالة أربيل أدكَول لاء..الف لاء.. شمعنى عالمريخ؟؟ ليش مو عالمشتري؟؟ الزحل ؟؟ .. عطارد؟؟ الزهرة ؟؟ .. يعني إلا المريخ؟؟؟؟.

وهذه المناقشات هم راح نسمعها في البرلمان.. لكون الجبهات والتكتلات في البرلمان هم عدهم وجهة نظر.. لعد شلون؟؟ مو دنعيش حالة ديمقراطية فنف ستارس؟؟؟؟.

+على بختك... صدكَ؟؟ جذب؟؟ عليش عالمريخ؟؟.. يعني هالعراق الواسع وهالمناظر الخلابة وهالطبيعة الساحرة ..... وتاليها عالمريخ؟؟؟.

ـ أرد عليك :

أولا : هذه تسجل للسياحة بالعراق.. أول دولة هيجي تفكر !!.

ثانيا : أكتشاف جديد.. وبيها خوش ربح .. يعني خلال قرن راح أنصير أغنى دولة في العالم وبالأخص في مجال السياحة .. لكون بعد قرن بعد ماكو بترول.. وبما أن الحكومة وطنية ويهمها مستقبل ألأجيال لذلك لابد من وجود بديل للبترول.. لعد شلون؟؟ شعبالك قابل الحكومة نايمة ورجليها بالشمس ؟؟؟.!!.

+شلووووووووووووووووون ؟؟.

ـ بسيطة.. مركبات فضائية واكَفة أباب الشرجي وعلاوي الحلة والكاظمية وألأعظمية وبغداد الجديدة ومدينة الثورة والكرادة .. وتسمع سكن المركبة يصيح :

مريخ .. مريخ .. مريخ.. مريخ.. نفرين وأنقبط ... يالله وينهم السياح؟؟؟ راح أنقبط .. أسرع ترة لو تلحكَ .. لو ماتلحك!!!.

وألأهم راح تستفاد ناس بالأف لابل بالملايين.. مثلا:

راح تنترس شوارع أمريكا وأوربا وكندا وأمريكا الجنوبية وأسيا بأعلانات جميلة وملونه.. بالشوارع ومن على شاشات التلفزة والسينما وكالأتي:

×أخي السائح.. لاتنسى.. قبل التوجه الى العراق وحجز مكانك في المركبة.. لاتنسى أن تزوروا محلات شربت / الحاج زبالة.. الحاج زبالة يقدم لكم شربت زبيب خالص... زبيب الحاج زبالة يجعلكم مرتاحين طوال السفرة الى المريخ!!!... زوروا فروعنا هناك!!.

×أخي السائح.. أختي السائحة... لابد من أن تتناولوا وجبة دسمة من / باجة الحاتي .. جربوا باجة الحاتي والتجربة أكبر برهان... وجبة واحدة من الحاتي سوف تظلون شبعانين لأربعة أيام... جربوا.. شعارنا ألأخلاص بالعمل !!... ملاحظة : لنا فرع في المريخ وبنفس المواصفات لابل أفضل !!.

×سيداتي وسادتي.. رحلتكم لن تكمل دون أن تتناولوا ( كم كباية ) من كبايات السراي مع قدح من لبن أربيل المدخن.. جربوا ماراح تخسرون!!.

×أيها المتوجه الى العراق ومن هناك الى المريخ.. هل جربتم بقلاوة وزلابية الحاج جواد الشكرجي... لانعلق إلا أن تجرب .. أرجوكم عند الوصول الى هناك.. جربوا حلوياتنا.. لنا زبائن في الكواكب ألأخرى أيضا.. عاشت الحكومة !!!.

×أيها ألأحبة... كلها كذب إلا بيض وباكَلة الحاج نظومي بكل فروعه في الكسرة وألأعظمية والكاظمية والكرادة وعلى سطح المريخ .. وجبة واحدة.. بس أتبنوها تمام وشوفوا ربكم شخالق.. مقدما نقول لكم : صحتين وهناااا.

×أعزائنا... من غير مقدمات.. من غير شربت / جبار أبوالشربت رحلتكم ناقصة.. بالمناسبة مستعدون بتزويدكم بقاني وعلب من الكارتون الجيد لتأخذوها معكم الى المريخ.. قبل فترة أفتتحنا فرع في المريخ.. لذلك لاتنسوا أن تجربوا شربتنا على سطح المريخ !!.

×أيها السائح.. أيتها السائحة.. عند وصولكم الى سطح المريخ لاتنسوا أن تزوروا محلاتنا... محلات الحاج حمودي للكاهي والكَيمر... كَيمر السدة... أول ما تترجلون من المركبة وبجوار المحطة لاحظوا القطعة..{كاهي وكَيمر الحاج} .. طبعا لنا أكثر من فرع على سطح المريخ... جربوا مرة سوف تعودون الف مرة ..آيبااخ شلون كاهي وكَيمر.. يخبببببببببل !!!!.

+ كاااااااااااااافي.. ترة راح أنفجر... هي هذه تاليتها.. يعني حتى السياحة دمروها؟؟؟؟.

ـ لعد شعبالك؟؟ بعدك وين؟؟ ووين؟؟؟ .. بس وزارتي السياحة هساع هم مامقصرين!!.

+شلون ؟؟.

ـ قبل أيام قرروا فتح دورات صيفية للمواطن الكريم والعزيز والغالي لتعليم وتدريب فنون الدومنة بأنواعها ( العدلة.. الطيرة.. ألأزنيف ) .. موبس هذه.. لاء.. دورات أخرى للعبة الطاولي .. يكَولك المتخرج من الدورة شلون مايذب الزار يطلعلة دوشيش!!!... هذه نعمة وماصايرة بكل العالم.. أخوية أكو ناس تفكر وتشتغل.. وإلا ماسألت روحك وين تروح هالملايين مالة تصدير البترول ؟؟؟.

+أويليييييي.. كافي... بالعظيم صرنا فلم هندي !!!.

ـ أكيد.. اللهم أحفظ العراق وشعب العراق .

+آمين يارب العالمين ..

العودة الى الصفحة الرئيسية