بنت الرافدين

لنجرب النفاق ... هكذا يريدوننا .. أيها المنافقون أتحدوا وساندوني ../ ح1!!

جلال جرمكا/ كاتب وصحفي عراقي/ سويسرا

عضوألأتحاد الدولي للصحافة وعضومنظمة العفوالدولية

خلال فترة بقائي في معتقل / أبو غريب تعرفت على عدد كبير من ألأساتذة والسياسيين وألأكاديمين وغيرهم .. هكذا هي المعتقلات حيث ترى العجب العجاب !!.

من بين الذين لايمكن نسيانهم هو الدكتور / عبد الكريم هاني * ـ أختصاص في أمراض القلب والصدر ـ ووزير سابق في عهدي عبدالسلام وعبدالرحمن محمد عارف .

للتأريخ أن الرجل ـ عين الحسود بيها عود ـ عبارة عن / موسوعة متنقلة حيث له أطلاع والمام واسع في مختلف ألأمور السياسية والثقافية وألأدبية والعلمية ... نعم أنه ومن غير حسد موسوعة بمعنى الكلمة ... أطال الباري في عمره .. يارب .

ذات مرة وكالعادة كنا نتمشى في ساحة المعتقل ( وهل هنالك وسيلة أخرى غير المشي؟؟).. روى لي حادثة طريفة عن النفاق والمنافقين.. ولكن وللأسف الشديد نسيت شخصيات تلك الحكاية..!!.

راسلته ( كنت مستمر بالمراسلة معه ومع أخرون في نفس المعتقل ) وأنا في سويسرا عام / 2001 عن طريق عنوان زوجته ألأخت الكبيرة الدكتورة / أم هاني وكان حينها لايزال في المعتقل.. ما أن وصلته رسالتي حتى رد على وهو يحكي لي تلك الحكاية .. حيث قال :

[ تلك القصة حدثت قبل أكثر من ثمانين عاماً ، عند تشكيل أول وزارة في العراق بعد الحرب العالمية آلآولى وكان عدد الوزراء بقدر عدد اصابع اليد الواحدة ، وكانت برئاسة السيد / عبدالرحمن النقيب ( الكيلاني ) وكان في الثمانين من عمره تقريبا .. وقد أشرف الحاكم البريطاني العام على تشكيلها وجرى أختيار / طالب باشا النقيب ( من البصرة ولاعلاقة له بعبدالرحمن غير علاقة النسب النبوي ) وزيرا للداخلية ، وكان النقيب شخصية قوية جداً بحيث كان يطمح بعرش العراق أو بأنتخابه رئيساً للجمهورية ، إذ أتفق على أقامة نظام جمهوري وقد سبق له الخدمة في الدولة العثمانية كمتصرف في البصرة وألأحساء.. الخ وكانت وزارة الداخلية الجديدة أكبر وزارة وأكثرها أهمية ومسؤوليات ، وعندما جرى الحديث على رواتب الوزراء بدأهذا النقيب يطلب راتبا أكثر من بقية الوزراء مبررا ذلك بالمسؤوليات الكبيرة التي يقوم بها وتنوع فعاليات وزارته .. الخ .

وبدأ الضغط على الوزراء ألأخرين كي يوافقوا على هذا الطلب ، وأستمرت هذه الحملة وراء الكواليس فترة من الزمن ، وحين كان الوزراء يلتقون خارج الجلسات الرسمية كان بعضهم يحرض البعض ألأخر على رفض هذا الطلب ويلح على ألأخرين الا يكونوا جبناء! على أساس أنهم جميعا وزراء.. فلماذا يفضل بعضهم على ألأخرين ؟؟؟.

وحين تقرر أن يناقش الموضوع بصورة رسمية وعقدت الجلسة ، طرح سكرتير المجلس هذا الموضوع وتلى كتاب الداخلية في طلب تمييز راتب وزيرها!!.

فبدأ أشد الوزراء تحمساً ضد ألأقتراح حين كان خارج الجلسة الرسمية ، فطلب الكلام وقال :

أن ضخامة العبء الملقى على عاتق وزير الداخلية وسعة مسؤوليات دوائرها ومقام السيد / طالب النقيب وشخصيته الفذة توجب أن يكون متميزاً عن الباقين ولذلك فأنه ـ أي المتكلم ـ يؤيد طلب وزارة الداخلية بقوة !!!.

وتكلم متحمس أخر فقال : أنه موافق !!.. وألأخر موافق .. وألأخر موافق .. وكذا ألأخر.. فوصل الدور الى / عبد المجيد الشاوي ( وربما جعفر العسكري لتشابه شخصيتيهما وأشتهارهما بالنكات القوية ) فقال : أني هم منافق ..!!!!. ] . ... حلوة ؟؟؟... بالتأكيد .. خوش كلام !!!.

ـــــــــــــــــــــــــــــــــــــ

ـ حمدان ... عندك تعليق ...؟؟؟.

+ أكيد.. لعد عليش كاعدين وفتحنا الموضوع ؟؟.

ـ نورنا.. الله ينور دربك..

+ يعني.. هناك من يريدنه أنكون منافقين.. نمدح مجلس الرئاسة و الحكومة.. الوزراء.. رؤساء ألأحزاب.. أعضاء البرلمان.. ألأجهزة ألأمنية.. والجارة المسالمة / الجمهورية الأسلامية أيران .... بالعظيم ولا واحد منهم يستحق المدح.. شنهو اللي قدموا حتى نذكرهم بالأيجاب؟؟؟ .. يعني لو أنقارن السلبيات وفي المقدمة السرقة وأنعدام ألأمن وتصفية العلماء وأساتذة الجامعات والخدمات بما قدموه.. ماكو نسبة تذكر .. مع ذلك لنجرب ......

ـ تفضل.. خلينه أنشوفك منااااااااااااااااااااااااا فق درجة أولى .

+ مو تدلل.. بس بالأخير لازم أعلق.. أتفقنا؟؟.

ـ وهو شوكت مامتفقين ؟؟؟.

+ خوش..:

الحكومة..؟؟ أحسن حكومة.. يعني أموفرة كلشي للناس.. كهرباء.. ماي صافي وبارد جلاب للشرب.. ماي للحدائق.. ماي لغسل الملابس والسيارات.. ماي معقم للكوي وغسل الوجوه !!.. يعني بأختصار بيك خير وأخذ مياااااااااااااات !!!.
المجاري..؟؟ بالأخص بالعاصمة.. أصلا تفوت بيها لوريات محملة.. يعني لا طوفان ولا أبد.. تمام التمام.. ما أدري شلون بهالسرعة قياسية خمس سنوات وشوية سووا كل هالمجاري؟؟؟.. أخوية حكومة حريصة على متطلبات الشعب.. لعد شلون؟؟.
الغاز ..؟؟؟ يامعود ذاك الزمن أنتهى.. أصلا بكل منطقة محطة غاز.. يعني بس تخابر ..خلال خمس دقائق تجيك قنينة الغاز للباب.. وهنا العامل يسألك : يا لون تريدون.. أحمر؟؟ بمبي؟؟ أزرق؟؟ أخضر؟؟ أبيض؟؟ .. يعني قناني بالوان قوس قزح.. وبيش؟؟؟ .. بسعر التراب... بروبية فقط .. خمس وسبعين فلس!!!!... وفوكاها.. والمهم.. هدية مع كل قنينة غاز.. يعني علبة شكولاته... بقلاوة بالدهن الحر... باكيت تايد.. زوج قنادر! من الجلد ألأصلي.. سيت قلم باركر.. يعني بأختصار أنت وحظك !!... وكل شهر هنالك قرعة يانصيب والرابح يحصل على جهاز كهربائي مثل / مجمدة .. ثلاجة.. تلفزيون.. جهاز ستلايد... الخ .
النفط ألأبيض...؟؟؟ أنت وين نايم..؟؟ محد بحال النفط.. غاز موجود للطبخ.. كهرباء على مدار 28 ساعة خلال الـ / 24 ساعة.. يعني كلها صوبات زيتية ومركزية.. على شنهو النفط ؟؟؟؟؟؟ ............. أنت غير قديم !!!.
الحكومة دستوريا وقضائيا وقانونيا .. حكومة صحيحة مضبوطة وقانونية ولاشائبة عليهم.. عاشت الحكومة .. عاشت .. ليرتاح جماعة الحكومة من هذا النفاق !!!.
عاطلين عن العمل ... ياهوووووووووو ... أنت تحجي قبل سنوات.. الصحف مليانة أعلانات يطلبون عمال مهرة وغير مهرة وموظفين... وين أكو؟؟ أصلا قريت بأن الحكومة تنوي جلب عمالة من بنغلاديش وسريلانكا والهند.. وين أكو عراقي يشتغل عمالة؟؟؟.. لا يابة لاء... الدنيا شكل تاني!!!.
المقاهي كلها عزلت.. يعني الجايجي المسكين طول النهار حاط أيده على خده وكَاعد.. ولانفر يكَولة فد أستكان جاي.. خطية كلهم لاشغل ولا عمل.. يعني قوري الجاي ينجب بالزبالة ... حرامات !!!.
ألأحزاب الدينية يكرهون أيران.. يموتون من أيران.. أصلا واحدهم وبشكل علني يكولها بصراحة..كلا.. كلا.. لأيران.. طبعاً.. خو السيد / هادي العامري رئيس قوات بدر في المجلس ألأعلى ماكو يوم ومايصرح ضد أيران وأطماع أيران في العراق.. الرجل وطني غيور ويحب وطنه وأبناء شعبه.. عافرم سيد / هادي العامري والنعم منكم !!!!... أما مسألة وقصة وجود السيد / مقتدى الصدر في قم.. أكذوبة ودعاية.. الرجل هذااااك هو بالكوفة وممكن تتأكدون من وجوده.. أصلا الرجل يموت من أيران ويدرس بالنجف.. معقولة حوزتنا بالنجف قاصرة ـ لاسامح الله ـ ؟؟.
آيران.. مسكينة.. مالها علاقة بالعراق ولابدعم المليشيات ولا تدرب ولا تقدم أسلحة.. كلها دعاية أمريكية... لاء أبدا خوش جار وخوش ناس!!!.
البرلمان..؟؟؟ أحسن وأقوى وأصدق وأشجع وأجرأ وأنزه برلمان في العالم.. بالعظيم فلا أكو هيجي برلمان... فلتة ووردة !!!!!!!... نومي حامض ياولد.. تقرب ...ملح وأكل..يايابة شلون نومي حامض ... يخبل !!.
كل المسؤلين يحملون شهادات عليا.. كلهم خريجون من جامعات معروفة وراقية.. أما مسألة شهادات مزورة من جامعة / مريدي بالثورة.. أكاذيب ودعاية وأي كلام من المنافقين وأعداء الحكومة من جواسيس وبقايا النظام وحاقدووووووون !!!.
الرئيس / مام جلال 98 % من دوامه في بغداد.. ولايزور سليمانية إلا في ألأعياد.. عيد نوروز يوم واحد.. عيدي ألأضحى والفطر يومان فقط ... ويعطيك العافية.. الرجل وين عنده مجال يبتعد عن المنطقة الخوضراااااااااااااء!!!... أصلا ماعندة مجال يحك راسه.. مرة عادل عبد المهدي ومرة الهاشمي يحكون راسة ومرات رئيس الديوان يقوم بالعملية!! .. ماكو وقت.. رئيس العراق.. شنهو قابل كَوترة !!؟؟؟... وألأهم يموت من النكات.. مايقبل ولا واحد يحجي عنه وعليه نكات.. وكلها دعايات منهو يكَول هو يحجي نكات على نفسه!!؟؟؟ ماكو هيج كلام ... أنتهى !!... شخصيا لاشايف ولا سامع !!!.
السفير ألأمريكي مهمل الى درجة أنه في ألأسبوع الماضي الشرطي ـ الحارس ـ بباب المنطقة الخضراء منعه من الدخول.. يعني لولا الناس والمراجعين بالباب والتوسل بالحارس لظل ساعات ينتظر موافقة الدخول... يابة الدنيا غير.. أنتهى زمان حكم / بريمر وغير بريمر !!!.. حكم وطني خالص.. يعني مو قضاء الخالص بديالى !!!! لاء يعني 100% من غير شوائب !!!.
القوات ألأمريكية لاشغل ولامشغلة.. يعني القوات العراقية أمسيطرين على كل ألأمور... تصوروا في ألأسبوع الماضي شفنا عشرات الجنود ـ ألأمريكان ـ يبيعون ملابس قديمة ـ لنكات ـ بسوق باب الشرجي.. والبقية عدهم عربانات .. ناس تبيع لبلبي.. وناس تبيع باكلة.. وناس تبيع فلافل وعمبة.. والغريب في ألأمر تعلموا كلشي.. أبو العمبة ينادي : خوس أمبة ياولد.. أمبة أسلي.. هندي درجة أولى.. جرب ياولد.. أرب ياولد !!!.. لعد شلون صارلهم خمس سنوات وشوية !!. .. وألأخر ينادي وبعلو صوته : سلون ساية مهترمة ( شلون صاية محترمة ).. ماملبوس ياولد.. برخس التوراب .. بلاش أيوني.. بلاش.. وين مسترية؟؟ ( ياولد برخص التراب .. بلاش عيوني .. وين المشترية؟؟) !!... تصوروا صاروا أستاذية بالصاية والزبون واليشماغ !!!... أما هالأيام والصيف ماينجرع.. تشوف بشارع السعدون والكفاح والجمهورية العشرات من / المارينز .. يبيعون ماي بارد وينادون : سلاب ياولد..( جلاب ياولد ) .. خوس مااااااااي .. مسلج يا ولد.. آاااااه سلون مااااي يرد الروه ـ آخ شلون ماي يرد الروح ـ !!!... وشفت بعيني واحد منهم عنده عربانة ويشتغل / حمال بسوق جميلة.. يعني يوصل طلبات.. الغريب عربانته تجرها زمااال.. نعم زمال صغيرون.. شكَد خطية !!!.
الهمرات... يعني أشبه بالكذب.. تصور حولوها الى سيارات أجرة ـ تاكسيات ـ والمستر صار خبير بالشوارع وألأزقة العراقية.. وين تريد؟؟؟... سوك العورة؟؟ السفارة؟؟ سوك جمالة؟؟؟ نعيرية وكَيارة ؟؟ زعفرانية؟؟؟ سلمان باك؟؟ كمالية ؟؟؟ مدينة الرشاد؟؟؟ أبو سيفين؟؟ أبودودو ؟؟ الصدرية؟؟ ساحة النهضة والوثبة؟؟ حافظ القاضي؟؟ شواكة؟؟ رحمانية؟؟؟ كراج ألأمانة؟؟ كمب سارة؟؟ الغدير؟؟ العلوية ؟؟ كرادة ؟؟ أرخيتة ؟؟ البلديات؟؟ المشتل؟؟ الصليخ؟؟ راغبة خاتون؟؟.. بيك خير وتدلل.. ورخيص.. أرخص من عربانة الربل !!!... والمهم / همر أمكيف.. هوا يرد الروح أصلا مايعجبك تنزل .. والموسيقى.. كلها / مايكل جونسن وحضيري وداخل .. يعني أمريكي على عراقي .. يراعون ألأذواق!!!.. لعد مو يكَولك أجوي لخدمة العراقيين ؟؟؟.
البرلماني الدكتور / محمود عثمان عن القائمة الكوردستانية مايقبل أجراء أية مقابلة وياه.. يامعود دكتور ولو جملة واحدة.. أبداااااااا.. مايقبل ..لايصرح ولاهم يحزنون.. يكره المقابلات الصحفية والتلفزيونية!!!... يعني وكالات عالمية جايين من تلفات الدنيا لأجل تصريح.. نص تصريح.. والدكتور أمعاند ولايتفوه بكلمة.. الرجل من زمااااان هيجي يموت من اللقاءات والمقابلات.. طبعه كده !!!!... وطبع بالبدن مايغيره ...سلمتهم يا أم حسن !!ـ مثل عراقي مصري مشترك ـ !!.
لاعلاقة ولا أتصالات بين ألشيطان ألأكبر وأسرائيل من جهة والجمهورية ألأسلامية من جهة أخرى.. سيأتي يوم يضغط الرئيس / أحمد نجاة على زر ويمحو أسرائيل من الوجود.. لاتصدقوا كلام هذا الكاتب ولا هذا الكتاب!! :

واشنطن: كشف كاتب أمريكي للمرة الأولى عن حقائق مثيرة حول العلاقات والاتصالات السرية بين إسرائيل وإيران وأمريكا التى تتم خلف الكواليس !! .

ويشرح الكاتب الآليات وطرق الاتصال والتواصل بين الأطراف الثلاثة، التي تبدو ملتهبة على السطح ودافئة خلف الستار في سبيل تحقيق المصلحة المشتركة التي لا تعكسها الشعارات والخطابات والتصريحات النارية بينهم.

قال الكاتب "تريتا بارسي" أستاذ العلاقات الدولية في جامعة "جون هوبكينز" في مقدمة كتابه "التحالف الغادر: التعاملات السريّة بين إسرائيل و إيران والولايات المتّحدة الأمريكية"، إن إيران وإسرائيل ليستا في صراع أيديولوجي كما يتخيل الكثيرون بقدر ما هو نزاع استراتيجي قابل للحل، مدلالا على ذلك بعدم لجوء الطرفين إلى استخدام أو تطبيق ما يعلنه خلال تصريحاته النارية، فالخطابات في واد والتصرفات في واد آخر معاكس !!.

نفط العراق للعراقيين.. لا سرقة ولاشفط ولا لفط.. كلمن يكًول أن سماحة السيد ( شاب ) في مقتبل العمر كان أمسيطر على موانىء البصرة.. كَولة لااااء.. نفط العراق للشعب وأكبر دليل شوفوا وضع أهالينا.. بخير.. ربيع دائم !!!.
ماكو عضو بالبرلمان أمساهم بسرقة البترول.. دعايات مغرضة.. هم النواب وين عدهم وكت يسرقون؟؟ يعملون ليل نهار لمصلحة الشعب.. أخوية هذولة نخب مختارة من حرامية ولصوص ومرتزقة.. عذراً لزة لسان.. هذولة ناس وطنيون ومخلصون جدااااااااااااا !!!..ـ أنهجم بيت البامية نفاق خمس نجوم ـ !!.
لا فساد أداري ومالي ولاهم يحزنون.. أصلا العراق أنظف دولة من هذه النواحي أما ما يعلن هنا وهناك.. كلام جرايد.. وأما لجان المتابعة والنزاهة.. كلام فارغ..إذا ماتصدكون أسألوا السيد / جلال الصغير وووزيري المالية والنفط.. والله واحدهم يحلف مية أمام أن الحكومة أنظف وأنزه حكومة في الكون.. أخوية كلها حسد.. ما غيرها!!!.
التربية والتعليم العالي... يالسلااااااااااااااااااااام ... أصلا من كثرة عدد المدارس أكو مدارس موجودة بس المشكلة ماكو طلاب.. حدائق.. نافورات.. مختبرات.. أجهزة حاسوب.. تغذية مدرسية.. ملابس للطلبة الفقراء.. الصحة المدرسية.. يعني أحسن من سنوات الخمسينيات من القرن الماضي بعشرات المرات!!.. أما الجامعات.. ياصلاة النبي.. يعني شىء مذهل... تعيش الحكومة ..!!.
المؤسسات الصحية... شىء لايصدق.. أدوية مسلفنة ومن الدرجة ألأولى.. أصلا المستشفيات الخصوصية عزلت.. وماكو واحد يسافر للخارج.. عليش والحكومة أموفرة كلشي وكلاشي ؟؟.. أصلا أفتريت كل شوارع وأزقة بغداد مالكَيت أدوية تباع عالأرصفة.. يستحيل.. شنهو ولاية بطيخ ؟؟؟؟.
الزراعة ...؟؟؟ من غير أدوخكم.. تصور أستراليا وكندا يتوسلون أنصدرلهم قمح ـ حنطة ـ عراقية.. أما أسبانيا وأمريكا ينتظرون شوكت أنكَوللهم راح أنصدرلكم حمضيات !!.. خو الركَي والبطيخ... يعني برخص التراب.. والتمر.. محد بحاله!!! والحجي عن الطماطة والشجر والبيذنجان والفلفل والبصل.. لاااء.. هذه أصلا أصبحت تباع بالحكَكَ.. مو بالكيلوات.. والحكة بدينار !!.. تصور الرخاء والرخص وألأبداع والجهود... حكومة من صدك !!!.
المااااااااااااااي ؟؟ لاعيوني لاء.. وزارة الموارد المائية حفرت بكل قرية بير مال ماي .. لا مو بس هذه مدت أنابيب لكل بيت.. يكَولك أصلا فيضان بالأخص في مناطق / كَرميان يعني بالقرب من كفري وكلار وسنكَاو وغيرها.. أخوية الخير جثير لعد وين يودوهاااااااا !!؟؟.
أزمة النقل والتنقل بين المحافظات وأرتفاع ألأجور والحر والبرد وألأنتظار.. كلها أنحلت.. يعني ما تتصورون.. قطارات / أكسبريس من اليابان والمانيا.. مريحة.. مكيفة... الى كافة أنحاء العراق.. يعني شأكولكم.. كل ساعة وقطار.. قطار ورا قطار.. والمواعيد... يايابة عالمواعيد.. بالثواني.. غرف نوم.. مطاعم.. كافتريات.. أجمل المضيفات مع أجمل ألأبتسامات .. ورود معطرة .. محلات.. يعني مدينة متنقلة .. بيك خير وتدلل.. أخوية ثروات العراق الها بداية ومن غير نهاية والمسؤلين / رعاهم الباري همهم ألأول وألأخير راحة الشعب.. والنتيجة هذه ... عاشت الحكومة.. عاش أبو أسراء وصولاغ يبر!! والبرلمان ومجلس الرئاسة وجيراننا شرطي المرور وأبوالنجدة والدفاع المدني و كل منتسب من منتسبي حكومتنا المنتخبة.. موكلنا أصبروا.. أويلي عالعراقيين ماعندهم صبر !!!.
السجون والمعتقلات فارغة.. الا اللهم كم واحد من القتلة والحرامية.. والسرقات بسيطة ماتذكر.. مع ذلك : يعني واحد سرقلله دجاجة مالة الجيران وأنحكم سنة.. ألأخر سرقلله سيارة من أجل النزهة لاغير.. ومن هالحوادث البسيطة... أما المحاكم.. لاء.. طفرة نوعية قضاء مستقل... شعبالكم ؟؟؟.

ملاحظة / لنا حلقات أخرى بأذنه تعالى...

التوقيع ـ منافقون حتى العظم ـ لو هيجي نفاق لو مالازم !!!...التعليقت خلوهة للحلقات القادمة أنشاءالله تعالى ....

-----------------------------------------

* الدكتور / عبد الكريم هاني وزوجته الدكتورة / أم هاني وأبنته الدكتورة / بلسم وزوجها وأطفالها ، الجميع هاجروا وأستقروا في العاصمة ألأردنية / عمان... تألمت كثيرا بالخبر لكوني أعرف مدى محبة و تعلق الدكتور / أبو هاني بالعاصمة الجميلة بغداد ...إنا لله ...

العودة الى الصفحة الرئيسية