بنت الرافدين

حقيقة نقل ألأمريكان لوكالة (ناسا الفضائية) الى أبوغريب

جلال جرمكا

ألأتفاقية ألأمنية مع أمريكا

ــــــــــــــــــ

حقيقة هذه الاتفاقية لا تخدم مصالح العراق، كون هناك طرفين طرف محتل بيده زمام الأمور ولديه القوة على الأرض ومسيطر على كل الأجواء مهما كانت هذه الأجواء نوعها، وهناك طرف آخر متمثل بالجانب العراقي وهو طرف ضعيف يعيش تحت ويترنح تحت ظل الاحتلال، فكيف تكون اتفاقية متوازنة، هناك طرف قوي يدعم الاحتلال بل هو القائم على الاحتلال وهناك طرف ضعيف، حقيقة لا يمكن أن تخدم هذه الاتفاقية الجانب العراقي ولا يمكن أن تخدم الشعب العراقي... (محمد الدايني / عضو في البرلمان العراقي ) .

أعتقد أن هذا الاستعجال لا علاقة له بالانتخابات الأميركية، وإنما يرتبط ارتباطاً مباشراً بمستقبل القوات الأميركية في العراق، وفي ضوء الأحاديث الكثيرة والضغوطات الكبيرة التي تمارس على الإدارة الأميركية سواء كانت جمهورية أو ديمقراطية لسحب هذه القوات بعد أن منيت بخسائر كبيرة، وبعد أن فشل المشروع الأميركي برمته في العراق، فهناك محاولة أميركية لتثبيت جذور الاحتلال في العراق من خلال هذه الاتفاقية، على اعتبار أن العملية السياسية التي صنعوها في العراق يجب أن تتوالد بعمليات سياسية أخرى تخدم ذات المشروع ولكن بطريقة غير مباشرة... ( وليد الزبيدي / كاتب ومحلل سياسي ) .

المرجع الديني آية الله العظمی السيد كاظم الحائري قد أصدر في وقت سابق فتوی يحرّم فيها العمل بنصّ هذا الاتفاقية واصفا إياها بـ"الجائرة".

ودعا الحائري الحكومة العراقية إلى عدم التوقيع على الاتفاقية، وقال إن الحوزة لن تعترف بشرعية هذه الاتفاقية، وأنها لن تكون ملزمة لأحد، معتبرا أن الاحتلال يهدف إلى تقنين وجوده غير المشروع، والعبث في أمن البلاد ومواطنيه والاستمرار في نهب ثروات العراق.

وهناك كلام منسوب الى سماحة السيد / علي السيستاني تناقلتها وكالات ألأنباء حيث نقل أحد ممثلي سماحته مايلي:

انتقد المرجع الديني آية الله العظمى السيد علي الحسيني السيستاني (دام ظله) بشدة عزم الحكومة العراقية توقيع اتفاقية أمنية استراتيجية مع الولايات المتحدة الأمريكية.

أعلن ذلك مصدر مقرب من المرجع السيستاني في النجف الأشرف وقال أن سماحته أكّد علی عدم سماحه بعقد الاتفاقية الأمنية بين العراق وأمريكا.

ونقل المصدر عن سماحة المرجع السيستاني قوله "لا أسمح بعقد الاتفاقية الأمنيّة مع أمريكا ما دمت حيّاً". .. [ نص الخبر من شورى نيت ] : http://www.shoura.net/?act=artc&id=802

التيار الصدري وعلى رأسهم السيد / مقتدى أنتقد لابل رفض ألأتفاقية جملة وتفصيلا وأعتبرها مؤامرة كبيرة ضد وحدة العراق وأنها محاولة لأحتلال العراق الى ألأبد ودعى أنصاره بالوقوف ضد ها بكافة الوسائل المتاحة !!.

أما عامة الناس فأغلبية العراقيون يرفضون تلك ألأتفاقية جملة وتفصيلا ولكن الواضح تماما أن الحكومة وعلى رأسها السيد / المالكي في وضع حرج تماما حيث أنه بين مطرقة أمريكا وسندان الجارة أيران ... كان الله في عونكم يا / أبو أسراء!!.

ـــــــــــــــــ

ـ حمدان.. سمعت أنه عندك معلومات جديدة وخطيرة عن ألأتفاقية.. ماتنورنا..

+موعلى عيني :

كل المماطلات والتصريحات المختلفة من هنا وهناك كلها لاتسمعها.. شخصيا مامستعد أن أسمع كلام مابيها خير لوطني وناسي.. هذه كلها هواك في الشبك!!.

ـ ماتوضح من صدقة هالجهرة.. بس لاتتفلسف.

+خوش.. بأختصار جداً.. المعاهدة لازم تتوقع.. بس شنهو يرادلهة شوية صبر.. ألأمريكان رادوا يجيسون نبض الشارع العراقي عبالهم الجماهير المليونية راح تخرج للشارع وتطالب بالأسراع في توقيع ألأتفاقية.

ـ بس اللي حصل هو العكس.

+أكيد ولذلك كَاعد دنشوف مماطلات و( هات وخذ) بس الله وكيلك راح تتوقع مثل مايريدون ويكَولك ألأمريكان حالفين بروح ( جورج واشنطن!!) بس تتوقع ألأتفاقية ورا خمس سنوات راح تنقلب ألأية!!.

ـ على بختك يعني شلون؟؟.

+ نعني!! العراق راح يصير مثل أمريكا وأمريكا مثل عراق اليوم!!.

ـ حمداااااان .. الف مرة كَايلك لاتحجي أمبطن.. دوغري ... أحجي عدل !!.

+ليش لاء .. شوية صبر ..شوف :

ألأمريكان يحلفون ويتكفرون ويكَولون بس وقعوا ألأتفاقية ألأمنية وشوفوا شراح أنسويلكم.. مثلا على صعيد الزراعة :

×يحولون كل الصحاري العراقية الى مساحات خضراء لزراعة الفراولة والزهور والنباتات العجيبة والغريبة بشكل راح أنافس الزهور الهولندية في الكمية والتصدير !!.

×الطماطة راح تصير الحكَة ( أربعة كيلوات ) بدرهم .. والممرودة أبلاش!!.

×الركَي والبطيخ.. محد أبحاله .

×يطورون التمور بحيث تصبح التمرة الواحدة مثل الخيارة وهذا الصنف راح يطلقون عليه أسم ( كوندليزا ) تيمنا بأسم الدكتورة ألأنسة / كوندليزا رايس!!.

×أنكل بينز .. صاحب أشهر وأكبر مزارع الشلب بالعالم راح يتحول هو وخبرائه ومزارعيه الى العراق.. والله ليسوي تلتأرباع!! العراق تمن عنبر ونكَازة أم الريحة.. يايابة شلون حكاكة عليها... حكاكة وعليها بامية لو يابسة .. تعال وشوف... عاشت أمريكا !!... ويكَولك راح يوزعون على الطلبة .. كل طالب ماعون حكاكة ( تمن العم أنكل ) وعليها يابسة.. لو بامية.. هنا الطالب حر ممكن براحته يختار .. أخوية الديمقراطية موجودة في كل مكان !!.

×الخيار... يعني شأكَولك.. راح ينتجون عشرات ألأنواع.. وكل خيارة بطول نصف متر وهذ راح يطلقون عليها أسم ( جورج بوش ألأب ) .. نعني!! أبو الرئيس ألأمريكي الحالي !!.

وعلى صعيد ألأمور ألأخرى :

×راح أنزود الدول ألأفريقية الفقيرة جدا مثل ( بتسوانا!! وموزنبيق وبوركينافاسو .. أوغندا .. ساحل العاج .. جيبوتي والصومال .. الخ ) بالكهرباء .. نعني !! رأستا من المحافظات العراقية بواسطة ألأقمار الصناعية الى أفريقيا.. خطية ماعدهم كهرباء لازم أنساعدهم .. عدنا زيادة وين أنوديها قابل بالشط ؟؟.

×لكون مواد الخام بأمريكا راح تخلص ( نشكر الباري ) لذلك راح يحولون الشركات الكبرى لصناعة السيارات في المقدمة ( جنرال موتورز) الى العراق وهنا وتعال وشوف.. نعني!! راح ننتج الشوفرليت والفورد والجيمسي والكاديلات ... يوووووووه .. نعني بأختصار أقل واحد بينا راح مايركب إلا كاديلااااااااااااااااااك .. حلووووووووووو !!!.. التاكسيات كلها بيوك وكاديلاك .. شوفر أخر موديل .. عمي لشوكت (لادا وبرازيلي وموسكوفيج ؟؟!!) يزي خلوني أنجرب ألأمريكي توماتيك .. توماتيك !!!.

×أنتاج البترول راح توصل الى أرقام قياسية.. وين يودوها ؟؟؟.. لذلك راح يعلنون بوسائل ألأعلام أعلانات وكالأتي :

أخي المواطن الغالي .. أختي المواطنة الغالية .. تفضلي زوروا أقرب محطة تعبئة وقود وتمتعوا بضيافتنا وأخذوا معاكم الكمية اللي تريدوها من البانزين والنفط .. ولابأس أن تأخذون نفطات أسود وشوية قير أيضا !! .. لاتتردد أخي المواطن العزيز .. ملاحظة :

مع كل عشرة لترات من البنزين ساعة يدوية سويسرية من الماركات العالمية !!.

من الناحية الفنية والعلمية :

×وكالة ( ناسا الفضائية ) بقواعدها وأجهزتها وعلمائها كلها راح تتحول الى منطقة (أبوغريب ـ غرب بغداد ) .. نعني راح يفلشون المعتقل ( الله يلعنها ) وينصبون القاعدة هناك.. وراح أنسيطر على كل ألأقمار ألأصطناعية بالعالم ... شفت شلون فائدة جبيرة ؟؟ شلون أنجاز علمي !!؟؟. .. عاشت أمريكا .

× الدراسة كلها بالأنكَليزي.. نعني القرأة راح يترجموها للأنكَليزي.. تعال وشف الترجمة :

قدري قاد بقرنا .. حوض.. ضفدع.. رياض يأكل البيض(Qadry led the cornea .. Basin .. Frog .. Riad eating eggs) .

لبيد من لبنان .. البلبل الفتان.. يطير في البستان .... عندي خروف أبيض أتبعه فيركض .. نوري .. رزم نوري بريدي .. الى متى يبقى البعير على التل؟؟.. يبقى البعير على التل حتى المساء ....... الخ من الجمل والمفردات .. كلها بالأنكَليزي .. لعد شلون .. والله لأنراويهم نجوم الظهر وأنصير أحسن منهم بألف قاط !!.. موكَالوا أصبروا.. الصبر مفتاح الفرج!!.

×هوليوود .. نعم هوليوود .. راح تتحول الى العراق... ياحبيبي على هالأفلام.. كلها أكشن .. نعني لاتستغرب أذا شفت خيرة ممثلي هوليوود يلعبون طاولي وأزنيف بكَهوة/ حسن عجمي والبرلمان والمربعة والكسرة والصليخ !!!... وراح يطورون السينما العراقية يوصلوها للقمة.. نعني حتى التمثيليات القديمة مالة المرحوم / حاجي راضي وغيرها راح يعالجوها وتتحول الى أفلام عالمية !!.

×راح يطورون ( المقام العراقي) .. نعني البنجكاه .. راح يسووهه ششكَاه .. لو حفت كَاه .. وعلى هالرنة.. والبهيرزاوي راح يطورها الى التكساسي ( نسبة الى ولاية تكساس) والحكيمي الى ( جورج نتن ) نسبة الى رئيس المخابرات ألأمريكية .. خو خان مرجان ماراح يغني بيها غير ألأمريكان.. يلبسون ( صاية وزبون ) ويحط الجراوية صفح.. والله العظيم بعد نصب بطل ( أبو الكلبجة ) ليجر مقام للصبح.. خو البستات.. أشكال وأرناك.. من دشداشة صبغ النيل .. الى كَهوتك عزاوي.. أخوية خبرة وتصميم وتقديم خدمات .. لعد شعبالك ؟؟؟.

مو بس هذه .. لاء يكَولك أكو دراسة لتحديث ( المربعات البغدادية ) مصحوبة بالمطكَة وطكَ أصبعتين .. نعني ماكو واحد يتحمل يكَعد.. نعني لو يهز .. لو على ألأقل يصفك !!.

من ناحية العمل والبطالة :

×راح تنتهي حالة أسمها البطالة .. كل العراقيين راح يصيرون أغنى بهواية من أهل الخليج .. لذلك لابد من جلب عمالة أجنبية من الخارج.. وتدري ألأقربون أولى.. نعني لازم نجلب ألأخوة ألأمريكان .. خطية وضعهم مزري و( عزيز قوم ذل ) .. لاشغل ولاعمل.. لذلك راح أنشوف بكل بيت عراقي :

×أمريكي حدقجي.. يشتغل فلاح بالحديقة ويزكَي الثيل والورود وغيرها .

×أمريكي مسواكَجي ( يتبضع ) من ألأسواق.. عنده عربانة ومن الصبح للسوكَ .. رايح جاي مليانة ركَي وطماطة وخيار وتمور .. يسوك ويرجع !!.

×أمريكي لغسل السيارات والكَراج والطارمة والحوش والسطح والشارع ألأمامي!!.

×أمريكي.. طباخ .. بس هاااااه .. نعني مو بس يطبخ ( تمن ويابسة ) .. لاء أغاتي لاء راح يدخلوا دورة في فنون ( الطبخ والنفخ ) .. الطبخ العراقي.. يكَولك يلفلك الدولمة بربع ساعة.. خو تشريب الباميا..أحم.. أحم .. أحم .. تاكل أصابعك .. دير بالك يااااااااااااولد!!.

أما خلطة ( العمبة ) هذه ماتسولف.. نعني يكَولك صارلهم سنة يتدربون بولاية ( بنجاب) الهندية على هالشغلة.. يكَولك كودن ألعراقيين يحبون ( البيض والعمبة والفلافل ) ... لذلك راح يسوون طفرة نوعية في هذا المجال الحيوي !!.

×أمريكي سائق للعائلة .. وألأخر سائق لرب البيت .

×أمريكي حارس بالباب.. نعني يرحب بالضيوف ويدليهم الدرب !!!.

×بأختصار حتى أبو الصمون والخبز راح يكونون أمريكان .. خطية لعد غير أنجازيهم ؟؟ نعني موأحسن من الهنود والباكستانيين والبنغاليين والسريلانكيين ؟؟؟ أكيد هذولة أنظف وأرتب .. بعدين ربعنا !!!.

ـ حمدااااااااااااااااااااااااااااااااااااااااااااان .. الخاطر الله كافي.. مو كتلتني.. كافي نصب وضحك.. علينا؟؟؟ أي موملينا... حتى الثلج كَلينا وبسمار بالهوا دكَينا !!!.

+نعني شتريدني أكَولك ؟؟؟؟ .. عمرك طويل وأطول من عمري أنشاءالله .. خلي يوقعون ألأتفاقية.. إذا ما أحتلوك طول العمر كَول حمدان مايفتهم !!!.

ـ والله تفتهم ونص... اللهم أحفظ العراق وشعب العراق..

+آمين يارب العالمين ..

-------------------------------------------

* وكالة ناسا : الإدارة الوطنية للملاحة الجوية و الفضاء (بالأنكَليزية : National Aeronautics and Space Administration)، و تختصر ناسا NASA. هى وكالة تابعة لحكومة الولايات المتحدة ألأمريكية. وهى المسؤولة عن البرنامج الفضائي للولايات المتحدة. وأنشئت في العام 1957. وكان تمويلها السنوي يقدر ب 16 مليار دولار. بالإضافة للمسؤولية عن البرنامج الفضائي فإن وكالة ناسا أيضاً مسؤولة عن الأبحاث المدنية والعسكرية الفضائية طويلة المدى. ووكالة ناسا معروفة على أنها وكالة الفضاء الرائدة للوكالات الأخرى حول العالم.

العودة الى الصفحة الرئيسية