سويلفات معدان **

 

 

احمد الياسري/ مدير تحرير

جريدة العراقية الصادرة بسدني
alyasiry11@yahoo.com

((مزا كًــــط برلمــــاني .....!))

__تناقلت الصحف العراقية والعربية الحدث الذي اثار ضجة كبيرة في الاوساط السياسية وهو حضور النائب مثال الالوسي لمؤتمر مكافحة الارهاب في اسرائيل وقد اجمع البرلمان العراقي وللمرة الاولى على قرار واحد الا وهو قرار رفع الحصانة عن النائب المذكور ..ورفع النائب مثال الالوسي هو ايضا بعد رفع حصانته على سدية الاسعاف حيث تعرض للضرب حتى الاغماء من قبل النائب عبد الكريم العنزي عضو كتلة الائتلاف بعد مشادة حدثت بينهما داخل مبنى البرلمان ..!!

(( صلوات على محمد ..خوش برلمان وخوش برلمانيين ..الديمقراطية كلشي راوتنه بس مزاكظ البرلمانيين بعدنه ما شفناه الله يطي العنزي العافية الزكظ مثال الالوسي زكًطة برلمانية شالوه على اثرها للمستشفى بوية فاندام ما يسوي سوايتك يبو رياض المهندس ..جا اذا هيج سبع ما زكطت مشعان الجبوري الجان كاعد بصفك وسوة فضائية الزوراء الارهابية وسرق اموال شعبك وشرد بيها لسوريا ..صعدت براسك الغيرة لان مثال كفر زار اسرائيل مو رئيس جمهوريتك هذاك اليوم مشابكً وي رئيس وزراء اسرائيل السابق ما هفيته بوكس ؟ لو لأن عدة عشيرة برلمانية ما تكدر تفك حلكك وياه ( وبس ظلوا الماعدهم عشيرة ) ..ثانيا خوية يالعنزي انته مو طبيت على ظهر دبابة امريكية بعد ان كظيتوا عمركم تشتمون بامريكا وهسه تردون تسوون وياهه معاهدة جا ادري اذا العراق وقع الاتفاقية مع امريكا اوتوماتيكا راح يكون حليف استراتيجي لاسرائيل حتى اذا العلاقات الدبلوماسية مقطوعة فشنو هالنفاق ..ثالثا هو منو قطع العلاقات صديم والبعثية لان انظمة عروبية والعرب كلها نامت بحظن اسرائيل وظلينة احنه وجه كَباحة ..والاخوة العرب تدري يالعنزي شسووا بينا بس شفتلك اسرائيلي فجر روحة بعراقيين كلهم لو مصريين لو فلسطينين لو اردنيين لو سوريين والمثل يكول الف صديج ولا عدو واحد فعليمن نخلقنا عداء وي دولة نووية مثل اسرائيل وعداء ما مبرر ولا مستفادين منه شي ..لا نسبهم ولا نحبهم ..رابعا انتم يالبرلمانين اذا هيج زلم وكلكم صوتوا بالاجماع على هذا المكرود ما تصوتون بالاجماع على قانون الانتخابات الي واحد يجر بالطول وواحد بالعرض ..العنزي وربعة يردون يحررون فلسطين والاكراد يردون يحررون كركوك من الاحتلال العربي التركماني ويضمون الفرع للأصل وصايرة بالنعل ..والعالم الي انتخبتكم تعضعض باصابعها على هالمصيبة ..وانته يا مثال الالوسي يخوية شعبالك انته عضو بالكونغرس الامريكي وتفتر وتصرح بكيفك يعني ماكو غير اسرائيل تعقد مؤتمر ضد الارهاب وركضتلها يخوية وهاي الديمقراطية الكتلت روحك عليها وزير التعليم كتل ولدك الثنين والعنزي كتلك فشلك بيها خل يرفعون الحصانة عنك هو هيج برلمان منو يتشرف ان يكون عضو بيه..وانشالله قريبا راح انزل مقارنة بين ابن مثال الالوسي الشهيد وابن العنزي الي جان يفتر بشوارع اوبرن ورجع للعراق وتحول الى ملياردير بقدرة قادر ونترك الناس تقرر منو يشتغل ضد المصلحة العراقية العنزي لو مثال الالوسي ....بعد جولة المزاكط البرلماني الاخيرة ؟؟؟

((ديمقراطية الكوليرا ...!))

__ الكوليرا تكتسح العراق !! هذا العنوان رددتة اكثر من محطة اعلامية عربية وعالمية ..بعد تفشي المرض في مناطق وسط العراق وبغداد، وازدياد نسبة الوفيات... والاسباب الرئيسية لتفشي المرض الذي تحرص الحكومة العراقية على عدم نشر الاعداد الحقيقية للمصابين وعدد ضحايا المرض ..اهم سبب هو تلوث مياه الشرب، وسوء مشاريع الصرف الصحي وازدياد نسبة الفساد التجاري ببضائغ ملوثة تباع للناس على انها سليمة دون رقابة حكومية ...!!

n (( اذا جانت هاي مثل ذيج ...خوش واوي وخوش ديج ...! عمي شجاي تحجون عدنه حكومة حديدية ديمقراطية مظبوطة ..هاي يا كوليرا الجاي تحجي عليها الفضائيات المسودنة ..صدك جذب مو عيب ..لا بس تدرون احنا بلد ديمقراطي والدستور يكول بالبلدان الديمقراطية الكل متساوي بالحقوق والواجبات ..فعدنا حرية حقوق الانسان مكفولة مية بالمية ..وحقوق الحيوان بالعراق هم انشالله بلشنه بتأسيس جمعيات لضمانها ونتيجة للتطور الديمقراطي الكارثي راح انسوي جمعيات حقوق الجراثيم وبالخصوص جراثيم الكوليرا ..مايصير نظلمها ونكافحها واحنا دولة ديمقراطية لو دولة دكتاتورية بيها باب وجواب .فبرقية شكر لوزارة الري ووزارة التجارة الافسد من البيضة على مساعدتنا في ضمان حقوق الجراثيم وراح نسمي هذا المشروع ديمقراطية الكوليرا ..واليموت يكون شهيد من اجل اثبات ان الحكومة العراقية ساعية في مجال بناء المؤسسات الديمقراطية وبالتالي حتى ماكو داعي نذكر عدد الشهداء .. الشاعرة نازك الملائكة كتبت قصيدة الكوليرا وكًلبت الدنيا من صارت بالريف المصري بداية القرن العشرين ..جا هسه اذا طلعتي من كبرج ينازك وشفتي ابداية القرن الواحد والعشرين شمسوية الكوليرا باهلج شتكتبين ...!

((بيتنة ونلعب بيه ..شلها غرض بينا الناس ))

__اثار نشر جريدة لبنانية لتقرير مفاده ان مخططا سينفذ بالعراق لأرباك الوضع تقوده الاطلاعات الايرانية والمخابرات السورية وحزب الله لخلخلة الوضع الامني تزامنا مع الانتخابات القادمة ودعم الخلايا المسلحة النائمة بالعراق ..وقد علقت الكثير من المحطات الاعلامية على هذا الخبر ..!

n ( خوية عليمن احدث ضجة كبيرة وسويتوهه قصة عنتر (بيتنة ونلعب بيه شلها غرض بينا الناس ) البيت بيتهم واحنا العراقيين ضيوف عد الاطلاعات الايرانية بالعراق ..اذا البرلمان بيديهم والحكومة كاظيها كظ ..والمليشيات تسرح وتمرح بجال الله وجالهم ..واليفك حلكه من الكتاب رأسا يصدرون فتوى يكفرونه .هاي اللغوة عليمن بعد .ذاك اليوم واحد ايراني الجنسية يكول اني عراقي نجفي ..كتله السنة يحبون الامام علي وهذا دليل على انهم مو اعداء الشيعه كالي السنة يحللون دمنا احنا شيعة العراق كتله خويه ماكو هيج شغله كال لا انته بطران وتدافع عن السنة ..كتله ادري انته جنسيتك عراقية لو ايرانية؟ كال ايرانية ؟؟ كتله جا شلك شغلك بالعراقيين سواء كانوا سنة لو شيعة ؟؟ لو الا تدكون اسفين الفرقة يالله ترتاحون ..انته ايراني وعشرين سنه تشتغل وي الحرس الثوري واجيت لاستراليا كلت اني عراقي وحصلت جنسية استرالية وتدافع عن الاطلاعات وتشتم بالعراقيين عمي وين نشرد بعد حتى نخلص من شجولاتكم اكو دولة ابعد من استراليا ...!

**هذه المواضيع تكتب باسلوب شعبي لانها تنشر بصحفة شعبيات بعمود (طك بطك ) الخاص بالكاتب في جريدة العراقية بسدني .

العودة الى الصفحة الرئيسية