بنت الرافدين

ديـــــوان العيد

الشاعر احمد الياسري/ مدير

تحرير جريدة العراقية بسدني

طبعا كل عام وحضراتكم بخير ، وبمناسبة عيد الفطر السعيد اتقدم ،،بالتهاني والتبريك لكل اهلنا في العراق وخارجه وجعل الله عيد الفطر هاي السنة عيد خير وبركة والله يجفينا شر المفخخات والمفخخين ،والبعثيات والبعثيين والمجرمات والمجرمين ..واللوكًيــات واللوكيين ..والله يطيح حظ كلمن يريد السوء بالعراق والعراقيين امين يا رب العالمين ..

اتذكر ويتذكر اخوتي المعدان قبل جان بأول ايام العيد يطلعون برنامج مشهور اسمه (ديوان الريف )جان يقدمه الاعلامي السابق جاسم الياسري ..وجان العيد بدون هذا البرنامج ماله أي طعم ..وجنا نتابعة بحرارة لان يطلعلك اغلب مطربي الريف العراقي سيد جليل ،فرج وهاب ،سعدي البياتي ،،والحجية حمدية صالح وبناتها ،،وتعلكَ خالي ((طو ططو ,,طو طو ططو ..لا لالة ايييييي حميد يا مصايب الله )) ((وبالعيد بالعيد انه بالعيد ياعمة )) ((حبيبي حبيبي طر الفجر هدني ))((الولد نام يمة يا يمة علتك بكلبي احووه دولاب دولبني زماني )) والخشب يركًع خالي والكمان مال فالح حسن يغرد ،،وجان المقدم بين فقرة وفقرة يشرح عن اطوار الريف بمدينة العمارة والجنوب _طور المحمداوي ..طور الصبي ..طور الفراتي ..وهلم جرة ،،فاليوم قررت ان اخذ فكرة البرنامج واسمي المقال ديوان العيد واقدملكم جم فقرة بديوان العيد هذا واهم المحطات والطراكًيع الي رصدها طك بطك وراح يقدمها الكم اليوم بمناسبة العيد .........

المحطة الاولى ((الغاء المادة _50_الدستورية ...كًدرة ابوي على امي ..!!!))

n يكًولون اكو فد واحد جان بالجنوب زلمة مخربط وجبان ..كلما يتعارك ينبسط ،،وكل ما ينبسط يرجع للبيت يكمش مرتة يشبعها بوكسات وجلاليق والمرة كلشي ما مسويتله ،،فد يوم كالتلة ابو فلان خايب اني شعلية انته تطلع تنكتل ترجع تطلع مراجلك علية ،،كَاللها ايي كدرة ابوي على امي ..فصار مثل يا هو اليوليله واحد ضعيف يكًولون عنه كًدرة ابوي على امي ... فشاهد سالفتنة الاحزاب الاسلامية الشيعية والاحزاب الكردية اتماطلوا على كركوك واخروا اقرار قانون انتخابات المحافظات اشهر ..ومن انعلسوا والوادم كلها حجت عليهم عالجوا الموضوع ولغوا حقوق الاقليات _المسيحيين والصبة والشبك والايزيدية_ المكًاريد الي لا بيها ولا عليها ..ومام جلال الله يطي العافية ما يوقع على اعدام صدام الدكتاتور ويوقع على اعدام الاقليات العراقية ..هاي شلون مفارقة ..خوية بعد اخوكم يالمسيحيين والصبة والشبك الشغلة بسيطة ومحلولة ,,كلمن يجيبلة اربع مخربطين ويسويلة مليشيا ..وترحون تكمشون شيخ البرلمان محمود ابو حلكً المشهداني ..وتعلسونة علسة تطلعون حليب امة من خشمة ،، وتكًولولهم ما نهد صويحبكم اذا ما ترجعون المادة (50) والعباس ابو فاضل يسلمونكم حتى رئاسة الجمهورية وكولوا كًالها ابو عليوي بعد احنا عايشين تحت قانون كدرة ابوي على امي الديمقراطي ..وخوش عيدية اطاها البرلمان للأقليـــات ...

المحطة الثانية ((المالكي يقيل مجموعة كبيرة من السفراء..... عرس الكاولية ...!!! ))

n قناة الشرقية من القنوات المبدعة بمجال الدراما والبرامج الفنية ،،بس بمجال السياسة والاخبار ما تعرف راسها من رجليها ،تحس بيها جريدة مو قناة تلفزيونية ،،شغلة تعجبها تكًلب الدنيا حتى تثبت صحتها حتى لو جانت مو صحيحة ،،ومن هاي الشغلات خبر اقالة السفراء الي سوتة الشرقية مثل عرس الكاولية ،،انكًلبت الدنيا واليسمع الخبر من الشرقية يكًول صار انقلاب عسكري ورجع عزت الدوري يحكم العراق ..خو ربعنا بسدني بس شافوا اسم غانم الشبلي بالقائمة اشتغلت التلفونات ونسوا العيد وكًام واحد يهني الثاني بأقالة عدو الامة العربية السفير غانم الشبلي ,,وهي كلها قبل يومين تلوكًلة ..خو واحد من ربعيتنا جنه عود بخور عدة قاعة جان مأجرها للقمرجية ومسوي روحة متدين وهوة ماكو سكرتيرة تشتغل بعيادته الا وحاول التحرش بيها الى درجة الوادم بطلت تودي نسوانها يمه ..هذا ياهو اليلاكًيه ويكولة اني راح يعينوني سفير بمكان الشبلي ونسة الاخ انه من سابع المستحيلات يتعين واحد سفير بدولة يحمل جنسيتها ..صار اتصال بيني وبين السفير الي رايح لبيرث يحضر العيد وي الجالية هناك كًتله خوية شنهو السالفة كًَال ماكو أي شي رسمي وصلنا ..والامر لحد هاي اللحظة اعلام والموضوع لا يقدم ولا يأخر واني اصلا ممهتم لأن القضية وظيفية عادي جدا .نتمنى ماتصير امور الاقالة والاستقالة بعراق الديمغراطية الجديد مواضيع للتشفي والشماته الله لا يجعل اقالة أي موظف عراقي شماته ....

..المحطة الثالثة (( تقديم اول بعثي عراقي للمحاكمة في سدني ...... الحبل على الجرار..!!! ))

n اتصلوا بينة الكثير من القراء يسألون عن نتائج حملة (صكاكة دوت كوم ) الي وجهناها ضد هتلية سدني من البعثية والمرتشين وسراق القروض وبعض الناس عبالهم الشغلة انست والعراقية غلست ..مايدرون كل الوثائق الي وصلتنا والادلة قدمناها للشرطة الاسترالية وقد علمت جريدة العراقية انه تم تقديم واحد من ذولة الهتلية واتهامه بدعم الارهاب والتأمر على الامن القومي الاسترالي ،،وهذا البعثي القديم هو الي جان يركص بحفلات ميلاد صدام بالثمانينات وجابولنه الشرفاء صورتة يبوس بصورة صدام وقدمناها من ضمن الادلة للاستراليين وبعدين كًَلب وصار عضو بحزب اسلامي عود حتى يضيع ماضيه الاسود ،،هذا الساقط مسويلة ميت جمعية وهمية باسمة وباسم بناته وحبوباته ويا مكرود يجي من العراق يلغف براسة فلوس الا ان ابيوته وملايينه ترست سدني ..شفناه هذاك اليوم بحفلة السفارة الرمضانية وتدرون اخواني احنا بالعراقية البعثيين والهتلية ما نطلع صورهم حتى نساهم بعزلهم فدسنا صورته بالحذاء وما طلعناها بالعدد ..كًام يمشي ويحشم ربعنا مروتكم خل يطلعون صورتي بالعراقية حتى ياخذها يوديها للاستراليين ويكوللهم اني مو مجرم والجالية تحبني وهو قبل كم سنة راد يسوي فتنة بين المسلمين والمسيحيين بسدني من كًال لمسئول استرالي المسيحيين مو عراقيين !! .وعلى اساس احنا ازواج وننطيه هيج فرصة ..فكَلنا لربعنا انطلع صورته بالجريده بشرط يطلع يعتذر من الجالية ويعترف بالجرايم الي ارتكبها من جان يشتغل ويه المخابرات البعثية ..والشخصية الثانية الي راح انقدمها للمحاكمة انشاء الله نفس النموذج واحد جان بعثي واجه صار عضو بحزب استرالي ولأن الغدر يسري بعروقة بس صار مسئول بلش دكً رشاوي من ربعنا بفيرفيلد ومن انكتل واحد من اعضاء حزبة قبل كم سنة راح للسجن يحتفل وي القاتل مالته بعيد ميلادة والدنيا انكلبت الصحف الاسترالية والتلفزيون حجوا بالموضوع شلون هذا يروح يحتفل بعيد ميلاد واحد مجرم كتل صديق وعضو وياه بالحزب وانشاء الله قريبا انطلعلكم وبالقلم العريض تفاصيل كل القضية ونقدمه للمحكمة حتى لو يصير رئيس وزراء استراليا والحبل على الجرار ......

.المحطة الرابعة ((عجوز عربية تحصل على بوي فريند في سدني ....... عينوني يجدة موش حيلي الأولي ))

n هذاك اليوم جنت اتمشى بفيرفيلد فالتقيت بعجوز حتى عيونها تركيب مو بس سنونها ،،خطية جانت تدفع بعربانة متسوكًة من _الشوبنكً_ حشة كَدركم وتمشيلها خطوتين وتوكًف من التعب ..فانكسر خاطري عليها اجيت يمها كتلها ( كان أي هيلب يو حبوبة ؟)كالت اووه يو فري نايس ...كتلها دوونت ووري حبوبة ..ولله خوية دفعت العربانة ومن مشينا عرفت ان العجيز لبنانية ..فبديت احجي وياها عربي ..كالت العرائييين كلكم زوء ..كتلها يعطيك العافية ثانكيو ..الا ان وصلنا يم بيتها دكيت الباب طلع واحد شايب بس معتور اتعتور وصماخة تكول دوبة وقوي ما شاء الله ..فكتلها هايدا اخوكي ولا ابنك يا ماما ..كًَالت لا هيدا البوي فريند تبعي ...كلت انا اخوج جــا اني صارلي ساعتبن منتعل سلفه سلفاي وادفعلها بالعربانة بالشمس وتالي طلعت تتسوك للبوي فريند الحجية ..بوية بلوة سدني حتى عجايزنا اتخبلن بيها ..خايبة وينج وين جروخج اسنونج واكعة وتدورين بويات فريندات ما تستحين ..وتذكرت هوسة لوحدة من عجايزنا بالجنوب من رادوا يعرسوها وكًامت هوست (( عينوني يجدة موش حيلي الاولي ))

يالله خالي دوخناكم ويانه بس انشالله اتكون محطات ديوان العيد هذا العدد مو مملة وانتظرونا بالعدد الجاي اذا عدلين انشالله ومحطات جديدة من محطات عمود الفقراء والمعدان ( طكً بطكًَ ) والحجي ما يحلى يبعد عمكم اذا ما يصير طكَ بطكَ ....انشوقكم انشاء الله

العودة الى الصفحة الرئيسية