بنت الرافدين

هلة بيك هـــلة .. يالمالكي .. وبجيتك هلة!!

احمد الياسري/ مدير تحرير جريدة

العراقية الصادرة بسدني / استراليا

اتذكر من جنة زعاطيط ..جان السيد النائب ابن الحاجة صبوحة هستوة صاير رئيس للعراق بعد ان جابلة كًشر موز مظبوط وخلاه جوة رجل القائد المــو ضرورة احمد حسن البكر وصار هوة قائد العراق الضرورة بمجانة .. جنه ما نعرف بس الشعارات الي يعلمونه اياها بالمدرسة :بذاك الوكت ..الي جان مراقب الصف يرددها من يدخل المعلم واحنا انردد وراه مثل الببغاوات وكلشي منفتهم من الحجي الي نكولة ..مو لأن جنة زعاطيط ؟؟ بس لأن سياسة القائد الضرورة تؤكد على زعططة المجتمع ..! يعني على الاقل احنا الزغار جنة نكدر نتناقش بامور حتى اذا منفهم بيها محد يكتب علينا تقرير ولا واحد يودينا للأمن ..بس الكبار خطية اذا كًح كًحـــة وما كًَال عاش القائد يبتلي على عمرة وعمر الخلفوه ..فجان مراقب الصف يختارونه اختيار يعني لازم يكون سوسة وشيطان مثل ابليس يالله يسوونه مراقب ..لأن اذا محبوب ما يفتن علينه ،، اول ميطب المعلم يتلكًاه استاذ فلان سوة وكاحة ..وفلتان هيج كال ومن هالسرسرلوغيات ..ومن الشعارات الي اتذكرها خصوصا بداية الحرب العراقية الايرانية يكًول المراقب قيام وي طبة المعلم ..انكًــــول كل احنه (عاش القائد صدام ) ..اتدور يدخل المعلم يصيح المراقب جلوس ..نكول كل احنه ( يسقط الفرس المجوس ) وبذاك الوكت مو مثل هسه ينتعل سلفة سلفاك اذا تجيب طاري الفرس المجوس ويتهموك ضد الاسلام والتشيع والعلماء ...بذاك الوكت جان.ممنوع على الانسان ان يسب حتى روحة بس مسموحلة من الصبح لليل يسب بالفرس المجوس وبالملالي الايرانية حسب تعليمات القائد الضرورة .

ومن جان القائد الضرورة يفتر بالولايات العراقية تطلع الوادم كلها تهوس ( هلة بيك هلة وبجيتك هلة ) واغلب ربيعتنا الي هسه صاروا ضد النظام ومتضررين منه جانوا يلبسون الشمغ المضبوطه المعدلة ..والافندية يلبسون سترهم وقمصانهم السفاري مال الاورزدي وتطلع كلها تردح للقائد الضرورة وهمه لا واحد كايللهم ولا واحد مودي عليهم خط مصخم ، ومن تكوللهم بوية مو سودنتوا القائد ..يكولك شتسوي خاف يعدمونا ..وجنه زعاطيط بسرعة ينضحك علينه فنمشي هاي الملاعيب بسرعة وما ناخذها بنظر الاعتبار ، شلون هسة بسدني مثلا يجيك واحد بعثي ساقط يوزع مفاتيح سلام ومحبة على العالم وهوة مملطخ بدم الوادم الفقرة من راسة لقندرتة وما تعرف ياهو الاكثر عفونة قندرته لو راسة !! ،وهم نمشيها وفق نظام الزعططة الاجتماعية الي اتربينه عليه من ايام القائد الضروة الى ايام القواد الضروريين .

ارجع الى شعار ( هلة بيك هلة وبجيتك هلة ) الي سبحان الله اتذكرته اول ما قررت اكتب على الزيارة المرتقبة للأستاذ نوري المالكي الى دولة استراليا الصديقة ..الى قادتنا ما يتذكروها الا من تخلص الحنطة ..لو تنباكًَ كوبونات النفط ..وهسة واحد من عندكم يكولي ادري شنو علاقة زيارة المالكي بشعار ( هلة بيك هلة وبجيتك هلة ) اكوللكم شنو العلاقة ...اتذكرت الموضوع من شفت الزلم الخشنة اتعدل بعكلها ورباطاتها وواحد يوصي الثاني (.اكـولك ولا تكـول ؟؟ شنهي السالفة بوية ؟؟؟ اطيني اذنك ..بوية هاك اذني شنهي السالفة يبعد عمك ؟ ترة الاستاد نوري المالكي جاي لسدني !! لا بروح ابوك ؟؟ والحمزة الشرجي ....اي همزين كتلي بس دير بالك واحد يدري بهاي السالفة ،،، هاي شبيك جا اني مسودن واخلي واحد يستقبلة كدامنا احنا وجوه الجالية .. وحتى نسولف وي ابو اسراء اشوية بلجي الله والحسين لنه معينه بسفارة بطركاعة ... أي ولله بعد اخوك خوش احجاية ..)

من شفت بعض هالشجولات تسولف بهاي الطريقة وهذا المنطق _رأسا اتخليتهم شايلين صور المالكي وواكفين بمطار سدني وكلمن محشم ربيعته ويصيح هله بيك هلة .. يالمالكي ..وبجيتك هلة ..) والمالكي هم رجال طويرجاوي مكرود وابن عشاير من يشوف هاي اللوكًية تهوسلة يجوز يعوف الطيارة مالته وينزل يهوس وياهم ( ها خوتي ها ها .. اجيت لسدني يحبابي وزرك هفيت ..ايييي... من هلت لواكَتكم انه هليت .اييي.. جبت الأمن كله وعمريت البيت ..و ردونة خل نعمر الباقي )) وتردح الرداحة وياه بالمطار والعراضات تشتغل والتفك والرصاص ..والسيكيورتي والكوماندو كلها تكًلب دقلات ..عبالهم صار انقلاب عسكري بمطار سدني ..وخاف اكو جم عراقي بمعسكر فيلاوود عدهم امل يحصلولهم فيزا الطام ثاني يوم هم تحطهم وزارة الهجرة بجنطة المالكي وتردهم للعراق .

هسه عرفتوأ ليش اتذكرت هذا الشعار الخالد ؟ واني اليوم ارد اوجه رسالة الى الاخوة اللوكية الي حضروا بيارغهم وعكلهم وتفكهم واكولهم خيرها بغيرها يبعد اخوكم ..لأن الاستاد المالكي غير موعد الزيارة الى اشعار اخر فضموا اغريضاتكم وروحوا شوفولكم سويلفة اتفيد اكثر من ثقافة الزعططة واللواكة الي اتعلمناها من حمورابي العصر والقايد الضرورة صوصو ابن الحاجة صبوحة (ام الرجولة ) .

ولو فرضنا ان المالكي فعلا وصل الى سدني بالموعد المحدد..فأحنا لازم نرحب بيه كوننا رعايا البلد الي انتخب المالكي رئيس وزراء ..بس مو نتلكًـــــــاه بالهوسات وهله بيك هله وسوالف اللوكًية ..لا ..نتلكـًــــاه بالاسئلة المنطقية .عن بلدنا واهلنا ..! نتلكًاه بمن اين لك هذا ؟؟ مقولة ابو ذر الغفاري الخالدة ..نتلكاه بماذا فعلت وماذا ستفعل ؟؟ نتلكاه بالسؤال عن قضية اللاجئين الي راح الى اوربا يبشر بعودتهم وخل الوادم ابهاتها احتركًت وكلها اجاها رفض ! وما انطت حكومته ضمانات حقيقية لحماية اللاجئين ! نتلــكًاه بماذا حصل بملف الامن بعد التصعيد الخطير ضد المسيحيين بالموصل وشنو نتائج عملية ام الربيعين !! نتلكـــــاه بقضية الغاء المادة خمسين الي صارت دم جليب حتى الصوتوا عليها بالبرلمان طلعوا مظاهرات ويهوسون ضد الغائها ؟؟ نتلكـًـــــاه بمشروع الخدمات الي اتبنته حكومته شلون ووين صار ؟؟ نتلكًــــــاه بطلب شرح عن تفشي وباء الكوليرا بالمدن العراقية خصوصا الجنوبية اسبابه وشنو شغل وزارة الصحة الي جزء من حكومته ؟نتلكَاه بمعرفة اهم نتائج قضية كركوك وهل سيوقع السيد المالكي على عودة الفرع الى الاصل ؟؟ نتلكًاه بطلب شرح عن تفشي الفساد الاداري بوزارة النفط والتجارة واسباب اغلاق هاي الملفات ؟؟ نتلكــــــاه بوين وصلت الاتفاقية الامنية مع امريكا وشنو هاللغوة والهوسة الي مسويتها الاحزاب الايرانية العراقية وليش الحكومة مشتهية ومستحية ؟؟ ومغيبين المنطق بشرح الموضوع للناس وليش الاستاذ المالكي دائما يحاول يتهرب من موضوع توقيعها وكلساع ذابها براس مجلس الرئاسة لو البرلمان ؟؟ انتم حكومة الشعب اذا الموضوع يفيد الشعب العراقي اطلعوا واشرحوا بشكل علني واذا ميفيد العراق وينظم استعمارة مثل ما تدعي بعض الاصوات الدايحة بدرابين الفضائيات الي كلها صارت محللة سياسية وموقعة معاهدات عالمية واحنا طلعنا معدان كلشي ما نفتهم !!

هاي الامور الي نريد نعرفها من السيد المالكي ونستغل تواجده بيناتنا حتى نسمعها منه ..وبالمناسبة لا يعتقد البعض انه اني عندي عداء لو جاي اتهجم على ابو اسراء بالعكس ، الرجل موظف حكومة انتخبناها حتى يديرلنا امورنا وجاي نتحاسب وياه شنهو الاله وشنهو الالنة ..واكًولها للامانة وهذا رايي الشخصي ما اريد اقحمة على مخيلة القراء ..اني ما جنت متفائل بهاي الوزارة للامانه وجنت اعتقد انه راح تكون نسخة من وزارة السيد الجعفري الله يذكرة بالخير الي خله الوادم تترحم على صدام ،، بس السيد المالكي حقق شعبية جيدة وحكومته حققت نجاحات مو لازم نغض الطرف عنها خصوصا بالجانب الامني والعنف الي قل بالعراق ..يعني يكفي المالكي فخر انه رئيس الوزراء العراقي الوحيد الي كَدر (يزيح الجعفري من حزب الدعوة _ويزيح حبيب الصدر من شبكة الاعلام العراقي ) واني شخصيا اعتبر هذا الشي انجاز على المستوى المحلي بس حسين سعيد فلت منه وجلب بلحية بلاتر ،، وكذلك كدر ينفتح على العرب وينظم علاقة العراق بيهم وكدر يسوي بروتوكول اقتصادي وي تركيا ..وكدر يتخذ قرارات جريئة بخصوص مجالس الصحوات وتنظيم العلاقات الامنية ..ويكفيه فخر ايضا انه عراقي طويرجاوي معيدي مثلي من بني مالج العشيرة العراقية الاصيلة ،،يعني مو عجمي مكطم ما ينعرف اصله على الاقل اذا بعد يومين خربنا وي السيد المالكي انروح لشيخ عشيرته بطويريج ونطالب وياه على الحكًَ ..بس الاصله اصفهاني منين نلكيله شيخ عشيرة ؟؟؟ فيا خوية يا ابو اسراء اهلا ومرحبا بيك بيناتنا بس مراح انهوسلك هوسات لوكًية نراح ندخلك مضيفنا ونصبلك اكهوة باليمنة وتشرب فنجانك ونسولف على طلايب مضيف اهلنا الجبير العراق بس تدري يا سيادة رئيس الوزراء اذا كدرت تحمي ارواح اخوتك العراقيين وتأمنلهم الخدمات وتخلي العراقيين ما يمدون ايديهم لغير العراق اني اول الناس الي راح يهوسلك _هلة بيك هلة وبجيتك هلة _ وبغير هاي السالفة ترة كهوتنه مرة ما تنجرع..واحنا ما متعودين نقدم لضيف فنجان كهوة بالايد العسمة يابو اسراء .لأن هاي السالفة عليها حشم والعراقيين محشومين كلهم انشاء الله ..نشوفكم العدد الجاي اذا عدلين .

العودة الى الصفحة الرئيسية