ياابو الهواجس .. وفاءً الى رحيم المالكي

 

ضرغام العراقي/ العراق _ الديوانيه
dhrgamaliraqi@yahoo.com

الشاعر چذب مامات عايش بالگلوب .. مثل الضوه ياناس عاشگته الدروب !

واهس بالشعر ما يشغل البال
من يوم الرحت مكسور واهس

وهاجس ما بقه عندي ولااحساس
بعدك ما بقت ياابو الهواجس

شتظن اقتنع لو اقبل بهاي
ما اشوفك بعد ما طب مجالس

...

يا فارس قصيده بعدك اشلون
نقراهه يتيمه ابلايه فارس

ليش بلا ذنب واختارك الموت
صار الموت مختص بالنوارس

طلاّب الشعر تتعلم منين
من الحاقد اغتال المدارس

صح عدنه سمير وعدنه جبار
وابنك حيدره باچر ينافس

بس المشكله بيت الشعر راد
شاعر للقوافي اتصير حارس

...

ومن أجل الوطن طبعاً فقدناك
وطبعاً تفتخر بيك الشهاده

يا أجرء قلم في ساحة الخوف
يعني الموت في رأيك ولاده

وشحچيلك شگلك كلهه بحزان
هم يرتاح الحتلوا بلاده

لازم ننتفض وانعيد شعلان
نفس المشهد ونكتب اعاده

ولو عاده الغدر عند اليحقدون
ناخذ ثارنه هم عدنه عاده

ما نقبل بعد يوميه عنوان
نتأسف عليه نعلن حداده

وخل نقسم قسم من هسه والله
وشاهد عالقسم رب العباده

كل احنه رحيم بدون اللقاب

وكل احنه فخر يوم الشهاده
كل احنه فخر يوم الشهاده

العودة الى الصفحة الرئيسية