حلم

نضال الحار / سويسرا

alhaarnedhal@msn.com

فزيت غبشه من الحلم فرحان
وجن الوطن مثل شدة ورد
بوسط بستان
وجن دجله تنثر هيل
وي الماي للعطشان
وجن الفرات العذب غرك هورنا
والبيادر خير والتمر حلان
وجن العراق جزيره خضرة وعايمه بالماي
تضوي مايحيطها الجيران
وجن لاكاتل ولامكتول
ولاتفجيرات لادخان
وجن لاتفكه عدنا ولامسدس
نحب بعضنا ايد بيد اخوان
وجن لاشيعه احنا ولاسنه
ولااكراد ولامسيح وتركمان
وجن مذهبنا الحب و الاخوة
وهويتنا العراقي الطيب الانسان
وجن اهل السماوه صيفوا بأربيل
وجن اهل الرمادي حطوا بميسان
وجن اطفالنا الحلوين راحوا للمدارس
وجن شعبنا مصرفن أردانه
يبني يشيد العمران
وجن لاصدام صار ولابعث
ولا ارهاب اجانه ولا امريكان
وجن كاعنه حره وعزيزه
تزهي بالحب والامان
وجن الكمر دومه بدر
يطلع علينا يرافك العشاك سهران
ريت الحلم يصبح صدك
بعيوني ومااظل حلمان