القصيدة

لافتات .. عراقية

رحيم الغالبي / الشطرة

raheemalghalbi@yahoo.com

= 1 =

أحس جفك لهسه ,

أيدك عله بابي

و أتشوف ,

كمت بمرايه ..مكسوره

شفت وجهي ,

عشر مرات

و لا واحد صحيح ...

ألعشره جذابي

= 2 =

لا ...

لا تسد ألباب , للوجهه مليح

... و لاتكل للزين : زين أنت و صحيح

خاف يخرب ...!!

, مثل حايط طين وأتهدمه..

..... و يطيح !!!

و لاتبدل وجهك , بأول سلام

. . . و لا أتغير ثوبك بأول زعل

خاف

يركد

ثوبك ..

أترد للسمل...!!

= 3 =

أل ماله بالدنيه... ضمير ,

يحلم أيخلي أثر

أل ماله بألدنيه جرف...

يحلم : أيسموه نهر

سكف بيتك كاغد ؟

, أو ترجه ألمطر ....!!!؟

= 4 =

أو أحنه ... أزغار

نرسم

نكتب..

عألحيطان, أحروف الطين

واحد + واحد

بس أنسينه أنحط أثنين

وصارت ..غلطتنه أمن أسنين

ـــــــــــــــ

أواسط ألثمانينات

 

 

 

 

 

Google


 في بنت الرافدينفي الويب

 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com