|
|
 |
 |
 |
 |
ماي .. من نهران أهلنه (ألى الشاعر والرمز مظفر النواب) رحيم الغالبي / الشطرة
طبع وردة ألنرجس، لونها من ابعيد يل طبعك اجيسه ... خاتل بروحي.... ورد صبّير , أشمنّه ..!!! أشم حلمان, ضعت بنص حلم، بي موكد.... . . . ودخان سكران...!!!! مثل هذا ألزمن وأتكررت ..أزمان .. و أيام... بشليل ألوكت، شالت كل خسارتها، ....تكتبه ارفام سوده .., أرقام . . . وتكتبه أقلام...... سوده من الكتاب البيه أخطاء الخساره.... ألصورتها أحلام ما..ننلام ما ننلام...، لمينه ألفراش ألسحكته الايام . . مثل أعمه أللي غنه ( أسويت ..لله و عمه عيوني..؟؟؟!!! ) ...... كسرت اويه ألشمس.. في زاهي . . .لاجل ألناس شلت بيدي ألملامه، بيوم .. بجه بنص ألصواني ألياس، ما شفنه ألشريعه..أتلكت اشموعك... أشكد صلبه أشوف بعينك..أدموعك..!! صلبه،بعينك..دموعك!!! صلف .. كلب ألزمن,,,, شبعان، من جوعك !! شفت أل كل أذن حايط، ترسم كل ألمها أنسان و ألبستان...., أوراده صخر منحوت ...... أبّطن يونس.. ندوّر ..نسأل اعله ألحوت...!! ....... خذلتنه ألسفينه ودورة ألسكان فاهي أللون، فاهي......وما نشوف أعله ألبرتقال ألوان..!! فاهي، ألوكت، وألديره.. و ألدنيه بس : خذلان . .!!! وعبّاد ألشمس أزهاره..بيضه أللون، مسودّ ألوجه... . . . دارته، أعله ألجيران.. و أحنه أزغار ..بأطراف ألاصابع من نحطها أبطين نكتب...دار دور، وتزهي عالحيطان ونكتب : بس يعيش...وبين أدينه، ألحلم مات
كسرنه ألعمر ..لن بالكيش ... ....... غركانين..!! وأليعرف يفوج...ألطين كدّامه... فضبحه..أغلاط...يم ألجرف، نفس الجرف :
.. ... عريانييييييييييين
أغسلوها ألوجوه أللوّثاهه ألطين و بدلوهه..ألثياب ألجنتوا.._ بالعمله.._ ولك عمله..عملها أسنين...!!! ما سوّاهه بن وادم، دفن بالماي نصه ...وباع سر الطين؟ رجع فرحان..للسبّاح سولف، = كضك ألسبّاح . . جلّب حيل .!!! = سولف سرّه ..للسباح كله عليك خفت ألموت...أنت ألواكف بعيني كله بعيد آني..!! و راسك ألينلاح خفت أعليه..؟؟ أفه !! مفضوح فوك ألماي.... وأيعفّن مثل دوده ألتمد أخيوط بألتفّاح... و أنمديت.؟؟ خرّبت.. ألحديقه، وخسّرتنه أسنين
جم فلاّح ذب عمره طعم بالخيط نص ألماي... عود من ألزمن يرتاح. . .!! عود....ألبيته من أيعود... يلكه ألخبزه وألتتنات * يلكه ..ألطفله ... يلكه ألنخله يلكه ألباب وألمفتاح.. يلكه أسوالف ألحبّاب، يلكه ألكمر... ما عاف ألسمه ألزركه.. و لا عن ألعيون ألحمره.. . . . بطّل ..غاب..!! يلكه ألزنده، حيل أيلاوي جف ألحيف ما تتعب أيديه.. لو جف يساره..أنعاب جذاب ألزمن حط سولته..وياي، يواعدني..أعله موسم جاي...!!؟ و ألموسم ألراح أمصوفر ألحاصد.. ويتشمت بروحي، ألحاصل أتراب..1 أتراب، أتشمّت ..بتاريخ، صفحاته ذ هب. . . و الكمر..دنّك مستحه.. ومن يومها . . . شكّت سمانه أثيابها وحمل ألوديع..أشماله..شال أنياب ؟؟ عاف أمه و أبوه...وأسمه.. . . . بشريعة غاب، لمّ أذياب .. جاباها ألسلفنه، أوجوهّه، ألخنزير..من يخزر و جاباها ألسلفنه..!!!
وسلّماها أكتاب، من ديره أعله ديره، والعشيره، ألبارده أتخلت سفينه .. و سلّمت ربّانها، وباعت نبيهه، نوح من سنّت سنينه،
روحي،خلّت روحها أبطول ألنخل بلكي ألخلال بنار روحي يستوي، و ألبلبل ألتايه، يجينه روحي مسكينه من أمس كالولها.... و كالولها، و ردّت حزينه، ظلن ألشمعات وي جرف ألنهر و أتلفّت ألماي أعله خطوات أنرسم بيها ألجدم.... آثار ممشه أسنين يابو أسنين .! يتلفّت نهرنه..أسنين ما ردّت تغمّك بيه..مساحينه...!! ( يا نهران أهلنه..)* ألجاريه و روجاتج أويه ألريح كضتها ألكناطر، من زغرنه أشكد نغني أعله ألكناطر ( أمشي و أكول أوصلت، ألكنطره...)* فكّتني ألسوالف باب أشوف ألناس شفت سعف ألنخل مدفون وسط ألطين..!! و سبّاح ألنخل ليفوك.. هوّ ألشايل ألراس .. وشفت خرسان، بس هيّ ألتغني و كاضّه ألاعراس وشفت عميان.... يقرون بتعاليم .. ألنبي، بأوراق سود أثيابهم بيضه، و أيصفّك وراهم .. . . . واكف ألفحّام . . !!! وشفت اعله .. ألخريطه، أللي وراه أشكد نخل مبيوع لاهل ألشام شفت أوهام.. سور من ألسعف يلتف عله ألتنّور، و أيخازر ألنار، أيدلي بيها ألريح شفت فوك ألخريطه أورام وشفت فوك ألجرح فوك ألذبح . . . أعلام شفت أقزام، رادت بيدها أتجر ألكمر أقزام....!! و أتنوش ألكمر ؟ بجيوبها أتظمك ..!! آخ من ألوكت، ذاك ألوكت هذا ألوكت ؟ . . . . . . أفلام !! نبي أبراهيم..ضم ألمعول و جايب جديده أصنام .. جايب خرزه للخيره، سد بابه، وغرفته .. وراح بطّل نام
|
|
| |||||||||||||||||||||||||||||||||||||||||||||||
|
© حقوق الطبع و النشر محفوظة لموقع بنت الرافدين Copyright © 2000 bentalrafedain web site. All rights reserved. info@bentalrafedain.com | |||||||||||||||||||||||||||||||||||||||||||||||||||
