عريان عايش من دونك

بلحمي الحي واكع كل جلدي

مهموم وكل ذكرى

منك تمرد جبدي

أشهك كل مايمر طارييك

يل حسنك حلم مطرّز بالنجمات

ولابس وردي

يل طبعك ورد ومليان أشواك

وكل صبحيه روحي أعليه تندّي

يال حبك مالي كل كلبي

وسايح عل الريه ومتبّدي

ياعراق ماحبيتك صدفه

أنت عيوني ومن غيرك عيون ماعندي

وأنت بكل أحزانك شما كثرت

تبقى فرحة روحي وسعدي

أضحك من جروحي ألمّنك

وأني كل جروحي ألمّنك تدّي

ماملّك يابلادي والله شما ملّوك

لو أبقى بس أني أحبك وحدي

بكوخ أرضه أعيشن بيك بس مأمن

من سعفات النخله وكصبات وبردي

وأرضه شما تشرط أبصملك

وأنطيك العندي وماعندي

بس خلّصني من هاي الغربة

الأكلت كل سنيني الحلوات

وعل الباقي من سنيني راح تعدّي

ردينّه يادنيا زغار خل نضحك

ونشوف الفرحه بالله عليج ردي ردي