وين إنروح *** ﮔلب مجروح
ضاﮔت بينه دنيانه
 

خضير المسيباوي

ali@dashti.org.kw

(1)
علينه ضاﮔت الدنية ... وضاعت كل أمانينه
وظل موج البحر هايج ... ياخذنه ويرد بينه
جرحنه يكبر ويصعب ... ضعنه ومن يدلينه
نحلفك بالظلعهه إنصاب ... علينه ألحﮒ يمهدينه
نهل أدموع *** نظل أنلوع
ﮔلبنه هاجت أحزانه
(2)
يمولانه الذنب شنهو ... كلهم هالصفوا ضدنه
وإحنه بدونك بغربة ... علينه زادت المحنه
ونظل لشخصك إنتاني ... الفرج منك تأملنه
وإذا أنته أﮔطعت بينه ... غيرك من يخلصنه
الوكت خوان *** الﮕلب حيران
وهاي الدنية خوانه
(3)
تحملنه ألم وأحزان ... وصحنه إمن الﮕلب وينك
علينه طالت الغيبة ... منهو إيحصل أسنينك
يريتك حاضر بهاليوم ... تشوف الموقف بعينك
جرعنه المر يمهدينه ... شوكت نلتم على إيمينك
الدنية إدور *** بظلم والجور
علينه إلتمت إعدانه
(4)
يسمعونه نسولف بيك ...وندعي بالفرج تظهر
يچذبونه اليسمعونه ... وجرحنه بالﮕلب يكبر
يمهدينه الﮕلب مجروح ... والعيون بحزن تسهر
نتاني إنعاين لنورك ... ﮔلبنه إشتاﮒ ألك أكثر
العمر خلصان *** بألم وأحزان
يريتك حاضر إويانه
(5)
نشوفك بالمنام أطيوف ... ونحلم بالعدل وياك
نحس بالغربة من نﮕعد ... نصحه ويمنه مانلﮕاك
يريت لشخصك إنشوفه ... حقيقة وكلنه نتلﮕاك
نعيش بعدلك وعلمك ... خيمة ونحتمي بحماك
الزمن دوار *** وﮔلبنه إحتار
والدين مهدمه أركانه
(6)
جرحنه ينزف بحرﮕة ... من يوم الفﮕدنه حسين
وعلمنه بالطفوف الطاح ... يمهدينه الصبر ليوين
نظل من غيرك بغربة ... عمرنه إنعيشه متعذبين
يمهدينه الفرج ننخاك ... ودمعنه نشفه إمن العين
بدمع يجري *** خلص عمري
دمعتي بعيني حزنانه