هلي و الغربة
هلي ذبني الوكت و انتم
بعيدين
انادي و لا سمعتوا بعالي الصوت
مثل العبرت بس طفل شطين
و الاخر حال بينه و بينها الموت
اود عمري بعجل يحدي بهالسنين
ويعجل من يخاف بدنيته الفوت
اباري اضعونكم ياهلي الط يبين
مثل ام الرمت بالبحر تابوت
سريت و مادريت شوين لاوين
وصفنتي لاهلي صفنة صنم منحوت
هلي روحي بجسدها انحبست اسنين
و مدري بياوكت تحرر الروح
طعم روحي طعم روح المساجين
نزيل وعمري بيد اليجي ويروح
هلي دمعي جزه دمع المساكين
تايه ياهلي ومئواي مذبوح
هلي حطيت جدمي بدرب مجهول
مبهم كل طريقي وجدمي هالمات
لون همي اعله عيس الدنيه محمول
ما حملن ثكلهن و لو ساعات
امتمت بالصبر ولساني مخذول
ونفسي يهزني لو مرن النسمات
انه العديت عمري وصفه المحصول
شهيكي هموم والزفرات حسرات
هلي كفخات دهري امرادف وياي
شمشكف بيه برماحه رماني
شمشلن هاي تسكط هاي من هاي
خلابيص وعلي يضحك زماني
انه المسكي صرت للناس سكاي
واسكي الجان بجفوفه سكاني
شبه عيس البوادي اليحمل الماي
اروي و لا بشر منهم رواني
جنت يهلي اواسي الروح ببجاي
خلص دمعي وبواجيهن عماني
الف طعنه بدليلي و طعنه بجلاي
وصرت ارغب لون موتي لفاني
