|
|
 |
 |
 |
 |
حال الناس کاظم الوائلي
هذا حال الناس تركض عالدسم * * * واللي ما متيسر الله ايعينة مو مهم الاصل موجود الاهم * * * واليعيش بفگر گرت عينة
هذا حال الناس تلهث عالدبگْ * * * تمشي وي دگ الطبل رجليهه رِخت لآهل الباطل وچفهه صََُفگْ * * * من تشيّخ عالسبع واويهه
هذا حال الناس تفرشلك ورد * * * بس تهِّيس بيك همة چم فلس كلهه باسمك ناسنة تهز او تشد * * * بالتقشمر ماخذة الدنيا بعكس
هذا حال الناس من تسمع خبر * * * على كل اِلِلسان متغير النَص وللي اسمة بزين لو شين انذكر * * * هذا تتركب عليه كل القصص
هذا حال الناس تزحف عاُلرِكب * * * حتى لو بالصين تشتم الزُفر شِبعَت ابطون الجواعة أمن الطرب * * * و تدِّعي بقصور وتنام ابحَفر
هذا حال الناس عاميهه الطمع * * * ماكو خط رجعة ولا بُعد النظر منهو من هالدنيا دام وما طلع * * * ومنهو من النعمة بس لله شكر
هذا حال الناس مليانة ابحسد * * * والرزق لو بيدهه چا گطعتة ِودهه كل الصار بي خير او صعد * * * يوگع او طمغة تِصير ابگصّتة
هذا حال الناس للخير انكرت * * * وماكو للمعروف خط او لاسبيل قرٍن متأخرة وتظن اتطورت * * * تريد تاخذ اكثر او تنطي القليل
هذا حال الناس مبدأهه الحلال * * * ولله يستر لو طلع خافيهه نية سودة او تخبط الماي الزلال * * * وذاك من ذاك الشرب صافيهه
هذا حال الناس تعرَک بالشته * * * وبجفاف الصيف جفلَّهه الجحيل لَفَت المدغوش والحق رفضته * * * ويّة ريح الدنيا لو مالت تميل
هذا حال الناس سلاّية گفة * * * وبالوجة مراية وتصعدك للسمة بالظهر عگرب او مامنه شفة * * * وكل شي عالگاع بخبثهه اتسممة
هذا حال الناس بس حچي او جدال * * * ومامش بهالوادم أبداً فائدة صار شان او كلمة لشباه الرجال * * * وبن الاجواد بوكاحة اتعانِدة
|
|
| ||||||||||||||||||||||||||||||||||||||||||||||||||||||
|
© حقوق الطبع و النشر محفوظة لموقع بنت الرافدين Copyright © 2000 bentalrafedain web site. All rights reserved. info@bentalrafedain.com | ||||||||||||||||||||||||||||||||||||||||||||||||||||||||||
