إنتي حال و آني حال  *   *    *  وحبنا في حكم المحال

أنا جيت أهديج ورده  *   *    *  شفت بيتج كـرستال
إستحيت ودرت وجهي  *   *    *  رحت..صحتيني :تعال
أنا وين وإنتي وين  *   *    *  ماكو بيها أي مجال..
إنتي مثل الشمس تزهي  *   *    *  وآني عايش بالظلال
ألتقي ويه اصدقائي  *   *    *  بغرفه أضيق من سؤال
المحبه شمس بيتي  *   *    *  والفقر دائي العُضال
ورغم إنتي حلم روحي  *   *    *  بس حلم صعب المنال
إنتي موبس وحده حلوه  *   *    *  إنتي دنيا وكرنفال
وبطريق الصدفه مره  *   *    *  بصدفه ما تخطر ببال..
بعيني شفتج ويه غيري  *   *    *  ثري إلحد الإبتذال
إيده جانت على إيدج  *   *    *  وإبتسمتي وهو كَــال
 راح أزرع لـج جنائن  *   *    *  ترتوي بماء الزلال:
والورد ما إله قيمه  *   *    * . بالذهب نملي السلال
وقبل ميّكــمل كلامه  *   *    *  وقبل ما أفهم إشكَــال
..رحت لاتفكير عندي  *   *    *  ولادمع بالعين سال
الوردة ذبلت بين إديه  *   *    *  وموسم الآلام طال 

وخايف أذبل ويه روحي *   *    *  إبلا حبيبه ولا وصال
وخايف الأيام تمضي  *   *    *  وكفي قابض عالرمال
أنا جيت أهديج وردة  *   *    *  ورده يابنت الحلال
شفت موسمكم لآلئ  *   *    *  تعمي عين الإحتمال
وشفتج تروحين مني  *   *    *  وآني رايح بالخيال