يبني ربّيتك

على جروحي الغميجه وناطريتك

نام يبني

سمّ الله سور الزهره

ماأكَصد يروحي وفززيتك

من تريد امزاحي يبني

سلَمت بيدك يروحي هروش كَلبي ولاعبيتك

وما يكفيني اعله صدري

من ألوليلك وضمّك

يبني ردتك وسط كَلبي تعيش

وكَليبي الحنين يصير بيتك

آنه يبني

اتفرهدت مني السنين وفرهديتك

وانته يبني

دمعه بعيوني وبجيت

شكَد بجيت ومابجيتك

ومن جنت بحشاي يبني

آنه من سبَاح كَلبي

اعصرت يوليدي ورويتك

يبني من حلكَي اكَطعت

لكَمة الخبزه اوكليتك

ويبلن هدومي اعله متني

ورّكَع العّتكَ ويكشف لون هدمي

وآنه اكَصلك من شكَى سنيني الجديد ولبّسيتك

يبني واذكر من جنت جاهل وسبّحك عالشريعه

كَبل ماينكَطع نفسك

ينكطع نفسي لون بالماي علّيتك يروحي وغططيتك

سنين انطرك يبني تكبر

وبشكَه روحي وسهر ذيج الليالي السود كَوّه وكبّريتك

ومن صلب عودك

تذكرت بصباك اوصيّت امك

عفيه يبني شهم ماتنسى وصيتك

يبني بيّض وجهي باجر

من أشوف اجدامك بركب الكرام أتخط مشيتك

هيه دنيا وقذره يبني

وروّض الروح لكرها

مثل مامنعيت منك ثديي يبني وروضيّتك

ونصرة عراقك تضل عندك امانه

وافدي روحك للوطن يبني وبعد رَخّص منيتك

هاي يبني كل وصيتي

وحسب حسابك لوّن يوليدي باجر ناشديتك

وحسب حسابك لوّن

يوليدي باجر ناشديتك