قصيدة للعراق

 

مناف الحسيني / السويد

بعد ما چنت اخوف صرت اخاف *** او لذت بچانو ايلوذون بيـه

ما همني الوكت ولكَلب ما ساف *** ولا رچفت چلاي اعله المنيـه

دربي بعيد والسچه امخالفه خلاف *** ودموع الحزن نزلة بديـه

لاتبچين يا حبيبه من الاوصاف *** على عناد العده لمشي اعله اديهـ

ما همني التشمت واليصيح اصياح *** ولاهمني النذل باع الثكَل بخفاف

ولا نبح الشماته ايرد عليـه *** انه جروح العراق ابخاطري اضعاف

ودموع اليتامه اتصل عليـه *** ودعنه الاهل الوان وصناف

بس نفس المصير احنه سويـه *** ماطول الجرح ينزف بل اچتاف

وماطول الكَلب يحمل قضيـه *** سفينتنه امينه وابد متخـاف

او ميهمنه الزمن لو بي رزيـه *** لچن فشله الزمان ايخلي الاچحاف

تكَص الروس طبقاً للهويـه *** عراقين احنه شيعه اوسنه اشراف

ابچدم واحد ندوس اعله الرديـه *** او نفسنه احنه النلاكَي الضيف بشفاف

ونكَله هلا بهاي المسيـه *** صعدنه على المعالي بشوفت الشاف

بحبال الامل كلنه سويـه *** سفينتنه امينه وأبد متخاف

وهي شمرت عصى الشاطي الهنيـه *** شمرت عصى الشاطي الهنيـه