عتاب الام ( مساجلة رقم 3)

قصيدة عن لسان حال أم تعاتب ابنها, بمشاركة عدد من  شعراء المهجر.

رفحاء 1993

کاظم الوائلي

بالتسعة احگك والسهر وسنين مهدك صدري

كبّرتك ابـ وَّن الگلب ورجاك تِحشِم كُبري

 

كبرتك أو لوليت ألك وانته الضوة البعيوني

وسنين مهدك صدري تم من بعَدَك آنه اشلوني

منك فلا طيبي گطع ماحسَبـِِت بضنوني

رِدتك لـ زلات الوكت يبني أو تچيّة العمري

بالتسعة احگك والسهر وسنين مهدك صدري

 خالد العبودي (شنافية- ديوانية)

 ردتك لزلات الوكت منَك أشم أعذيبي

من تيبَس أهروش العمر يبني أو يبين شيبي

يـ وليدي تدري اشحسَبـِت ضعنك يحط بگليبي

ما تلگي بيه غير اليسر واتنومس آني بعسري

بالتسعة احگك والسهر وسنين مهدك صدري

كاظم الوائلي (شنافية- ديوانية)

 ما تلگة بيه غير اليسر يالحالمه ابخنيابَك

وهنا يمن ضاع العمر يا زهرتي بغيابك

مره احتضِن بيدي المهد مره التحِف بثيابك

ويهزني شوگك يالولد مَل الصبر من صبري

بالتسعة احگك والسهر وسنين مهدك صدري

 منعم الجابري (ناصرية)

ويهزني شوگك يالولد وكبت صبر بآلآمي

والعمر گوطر يالضنى بغفله وعد بيامي

لا سِمع عندي او لابَصَر ما وچد الجدامي

والشافني بهذا الوضع يحتار يبني بأمري

بالتسعة احگك والسهر وسنين مهدك صدري

 شريف الحسناوي(ناصرية)

 والشافني بهذا الوضع حَن أو عليَّ اتحسَر

والحيل ناحِل يالولد وبگومتي أتعثر

هجرَك كِسَر مني الظلع كَسِر الظلع ما يجبَر

وخلافك أنوي الياكِتر ياخيمتي وكل ستري

بالتسعة احگك والسهر وسنين مهدك صدري

أبو عزيز الجابري(ناصرية)

 يا خيمتي أبفيّك أچن لو صُفنَت الباحورة

عين اعلى دربك شابحة والثانية اعلى الصورة

عد راسي ردّتك يالولد لو حِضرَت الغرغورة

ونته التشيل أجنازتي وبيدك تحفرة الـ گبري

بالتسعة احگك والسهر وسنين مهدك صدري

مبارك الخيگاني (ناصرية)