القصيدة

أِجة العيد

کاظم الوائلي

أجة العيد وسِماك مدلهِمة اغيوم

وممنوعة عليك الفرحة لـلدوم

طِحِت مثل السَبع بين المخانـيث

وعليك اتكالبت دُونيّة الگوم

اِجو من كل كتر طلاّبة احقـوق

وتشفوا بيك من شافوك مالـوم

نسوا يوم الچنِت تاج اعلى كل راس

ونسوك انتة الچنت حمّال الهموم

يا مسكين هسة اتشمتوا بـيك

وخَلوا عِزّتـك معروضة للـسوم

كل منبوذ منه اتـبرََت الگاع

اجة وگام اعلى ناسك ينفث اسموم

اشو ترجع ورة صاير يابو الـخير

بعد ماقدمت للعالم انـجوم

اولادك بعد ما چانوا اسياد

وواحدهم عگب ما چان مخدوم

صفوا خدّام سـخرة بأيد الانذال

وسكنوا بالگفارى بطرگ الـهدوم

صمنة وگلنة تفرج يـوم عالناس

وذا هيچي الفرج چا المن انصوم

اظن طلعت صدک دعوات (الحسين)

من ذبحوا رضيعة ومات مـظلوم

گضّيت العمر ثورات وحروب

وعليك العالم بقواته ملـموم

بسّك ياوطن يا بو الحضارات

خلص عمره الشـعب بجروحة مسگوم

بسََّك للغريب اتطـيب الجروح

ونتة اِمن الجرح ما تگدر اتگوم

بسَك.. بس نـفخ.... بسَك.. شعارات

كافي أِمن الزماط المانفع يوم

من دون الامم تبني انتصارات

ونتة ابكل حرب تاليك مهزوم

چا وين النـفط والماي والخير

وين الچان للـ ـعازات مـضموم

وين أرض الخلافة و دار الاسلام

وهذا ابن الفرات ايبات مهضوم

دشوف ازغر دول صارلههْ الف شان

وبن بابل يعـيش ابدار مهدوم

غِنَت منك أمـم ونتة اعلى هالحال

وردت بالغدر غربانههْ اتـحوم

بعد ما شبعوا الجيران نبذوك

مثل خبز الدخن ماكول مذموم

 

Google


 في بنت الرافدينفي الويب

 


 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com