الك منّك طويلة اشكد مسافات

كريم خلف جبر

الك منّك طويلة اشكد مسافات

ولا بيهن ابد يعراك لوفات

مشيت ومـن جزاني الشـوف رديت

رسـمتك عالارض وحسبت خطـوات

وياخيط الكلب شـكبانك احزان

كوم بكوم بين الكوم طركات

شيوصلني وكل للـروح شـبرين

بعدنه جم بعد مل وجزه وفات

ولا اوصل اظل محتار برجاك

زاعلت الفرح ومن الزعل مات

وكول اشلون يالون الاوصفك بيه

ولو لونك حمار وبيه جويات

ولو عافوك ربعك بس يتيهون

لان انت الوحيد البيك آيات

مدفونه بتراب الشوك يعراك

من بان وبنت يابو السلالات

فرق مابين حالك ذهب ينسام

ولا بالسوم شيل هواي لنكات

لجن هانت وكلّك خل يزعلون

ولا يهمّك شماته هواي شمّات

يبو وجه الفليح يصبح الخير

ويرد بالخير مصباحك تحيات

يبو خلك السمه الماخبصته الريح

اشما مرت عليك تصير صفنات

يبركان البحر معروف من تهيج

مو بركان كاع يصير خفتات

لون تدري الامم جا فكرت زين

وكلهم ياأمم عيدوا الحسابات

دشوفوا هناك ضجه وغاد تفجير

ولا بيهم يحل هاي النزاعات

اذا رادوا سلم خلهم يسلمون

عليك وتنتهي كل الخلافات

عزفنه على الكلب باوتار الكلوب

نشيدك موطني تغني الحمامات

اظل اشعر وسولف بيك للدوم

ولا عوفّك ابد يازين لحظات

واذا جان الشعر ميضمّد جروح

يظل مثل الفراغ ابّين جلمات

واشوف الشعر لم الليل سهران

يكلي هناك ودني بحضنه أنبات

وكول الله مهيّوب ويهابوك

صكر ميلوحك البالكاع هيهات

تظل محبس تدور ابين الكلوب

مو بجفوف كلبي يصيح لا بات