القصيدة

تراتيل الغريب

کاظم الوائلي

الجزء الاول

اوّج عمري شمس وتشوف دربك

وشِد بجناحك اهمومي الثجـيله

يطيراسمعنی امشّي اعليك ربّـك

توّصلّي الرسالة ابكل وسـيله

====

يطير اوگف اريد ابغربتـّي انخاك

لوالدتي يطير اتوصِّل الـروح

يطاير خلّي بس للخير مسـعاك

واريدك عون ليّ بشَل الجـروح

يطاير عالدرب چم دوب اتـناك

ويظل جفني عليك اشكثر مشبوح

يطاير ماردت رفگان ويـاك

اصير آني رفيجك وين مـتروح

دخليني يطير اشطوط لـَ ظمـاك

ويّظل عِشّـك ابگلبي دوم مفـتوح

سُباگات صفني بريش جنـحك

يطاير وارحم الروح العلـيله

اوّج عمري شمس وتشوف دربك

وشِد بجناحك اهمومي الثجـيله

====

 غريب وكالحمامة ابين الـ..صگور

وكل لحظة اموتن الف مـرة

انگلب قدّاح گلبي وصار كافـور

اوصبح هندس عگب ماچان گمرة

مو سنتين مرَّن چنهن ادهـور

يطير اوداعتك كل سنة ابعـشرة

وكل واحد يوّن بالغربة معـذور

بچويات الفراگ أنقبل عـذرة

ليالي الغربة بيهة النوم محـذور

(بجويريد) لِهبن نار كبـرة

هنيالك يطاير غُمَض جفـنك

وانه امچلچل عليََّ النوم حـيله

اوّج عمري شمس وتشوف دربك

وشد بجناحك اهمومي الثـجيله

====

 أنه وية ابلادي مثل السچة والريل

يطير اشلون گلّي أخلافة ارتـاح

ُصفت گشاية روحي امناحرة السيل

وسرة شوگي سفينة ابغير مـلاّح

غريج ابََّحَر من الونّة والويـل

والغرگان ابد مينفعة الـ..... صياح

ثجيلة همومي ما تنرفع بالشـيل

جبل عالي اعلى گلبي شلون ينزاح

عليََّ انكسر خاطر نجمة اسهـيل

وزعل ضيَّ الگمر من يومه ما لآح

يطاير ناري بردت يوم شفـتك

مو غيرك ابد ماينحچـيله

اوّج عمري شمس وتشوف دربك

وشد بجناحك اهمومي الثجـيله

====

يطاير لو تِعِد چم جرح بيـة

وحگـك تِمل وتيّهْ بالحسـاب

هدف للرامي وينيشن علـية

وما يخطي الوكت لو رمى الِنشّاب

من رمياته راواني المـنّية

عفى وكتي ابد ما يخطي الـ صواب

يطاير شفت مثلي بهالـبرّية

من سنتين جرحي او لسَّة ما طـاب

يطاير ادري بس لله الشچـيّة

واللآيذ ابسِد الباري ماخـاب

بس آني غريب او موش مـثلَك

وذا بيرغي اتمايل من يشـيله

اوّج عمري شمس وتشوف دربك

وشد بجناحك اهمومي الثجـيله

====

اوّج عمري شمس وتشوف دربـك

وِشد بجناحك اهمومي الثجـيله

 

Google


 في بنت الرافدينفي الويب

 


 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

© حقوق الطبع و النشر محفوظة لموقع بنت الرافدين
Copyright © 2000 bentalrafedain web site. All rights reserved.
 info@bentalrafedain.com