|
|
 |
 |
 |
 |
تراتيل الغريب کاظم الوائلي
الجزء الثاني اوّج عمري شمس وتشوف دربك وشد بجناحك اهمومي الثجـيله يطيراسمعنی امشّي اعليك ربّـك توّصلّي الرسالة ابكل وسـيله ===== سيف الغربة ماينگحُم چتـال شلون اتواجه اوياه وآني گنـاي غميجة اجروحة والهَم دوُهَن البال ثجيلة اولا معين الـشال ويـّاي فوگ جروحي وكتي اچمالة هم عال واخذ مني العزيز او فرهَد الـراي عليَّ امرادف اللوعات تـنهال ولا واحد رحمني وطيَّب الـداي يطاير ما يرف اعليَّه گـلـبك مصيوب آنه من الغربة چـيلـه اوّج عمري شمس وتشوف دربـك وشد بجناحك اهمومي الثجـيله ==== بساتين الكلايف دورّتـهة ولگيت اهمومي منثورة على الگاع لچن هالغربة ابد ماحسبتّـهة ولاحسبِّت أهِلَّن دمعـة أوداع يطير الدنيا خير اتصورتّـهة أثاري اتشّيخ الواوي اعلى الـ..سباع لعِد غيري الگصايب شـمّرتهة واللسان الشـماتة مَدِته أذراع دِفِت حنّة الآه و چوّرتـهة ونواعير المحنّة افترّن أبـساع يطاير خلّي من عمري اعلى عمرك شسوي ابعمُر آهاته طويلـه اوّج عمري شمس وتشوف دربك وشِد بجناحك اهمومي الثجـيله ==== ثِبت فكري ابذكر والدتي ونـشَد عگب ما چان مني الفكر مسـلوب عسى ما مر عليَّ اليوم الاسـود مو بيدي يطير الصار مكـتوب ايام الهجر مو سهلة تـنعَد كل يوم الِيُمر أبميّة محـسوب شبابي او حيلي من الغربة أنـهد وسماري انگلب لونَة وصارمشحوب باب الفرح ليش بوجهي تِنسـد حسافة انكرِه وآنه الچنِت محـبوب يطاير هم يمر مثلي اعلى فكـرك ونصيبي شِفِت بالدنيا مـثيله اوّج عمري شمس وتشـوف دربك وشِد بجناحك اهمومي الثـجيله ==== بالغربة وقهرهه اصبحِت موعـود وعلى رحم الولادة انكـتب ونّـي نگص عمر الشباب و غربـتي اتزود تبيَّن باگت امن أيام سـنـّي شبابي الراح ما ظِن يحِن ويعـود ركب ريل الزمان أو بَعَد عنّـي رِحِت للفرحة شايل حِزمـة أورود لگيت الفرحة حيل اتخاف منـي وتراتيل المناحـة ردَّن أردود يعزّن مو فرح سمعَن وِجـنّي يطاير طِلبة هاي اطلبهة منَّـك أريد اتراب گبري انته التهـيله ==== اوّج عمري شمس وتشوف دربـك وِشد بجناحك اهمومي الثجـيله
|
|
| ||||||||||||||||||||||||||||||||||||||||||||||||||||||||||||||||||||||||
|
© حقوق الطبع و النشر محفوظة لموقع بنت الرافدين Copyright © 2000 bentalrafedain web site. All rights reserved. info@bentalrafedain.com | ||||||||||||||||||||||||||||||||||||||||||||||||||||||||||||||||||||||||||||
