ـ مشتاكَـ  لا والله .. ولا حاسبكم احباب

بس حملي كسر ظهري..وإلتـّجيت عالباب..

إنفتح باب الجرح والحوش..وباب أسراري من صدري

إعصار وجرف كل عمري

وإنفـتحـت بروحـي أبواب وأبواب..

أول ـ دست كاشيه مكسوره

لمن جِـنـه نزحف جانت إتطكَـطكَـَ

إيه ياحوشنه الضـيكَـ

يامن جان كل  الكون ..

طبـّكَـناه بلف ياعلي.. و كل كاشية من فد لون

لسه بحوشنه يم قاطع الدوره ..على البسـر

أوراق الكهرباء والـي والحـّراس والتليفون

والرازونه..لسّـه إمشـرعه عالكون..كل الكون

وكل ـ ناكل تباوينه بزون..

لسّـه بحوشنه إمصـّلى عتيكَـ وباريه وـعون فافون 

وطيارة ورق مكَطوعه وجعاب

ودعابل ملحه وإبطالة سفن آب..

أنا الناسي الطفوله وسافر وشاب

ورجع للبيت ..نفسه البيت.. شنهو إستجد بي ..؟

..بس عش الغراب..

حتى الصور عالحيطان ـحفظت ملامحهه ..

إنمحت.. ذابت ..وغابت  ضمن من غاب..

لكَيت بحوشنه إمرايه على الكاشي

شفت بيهه وجه محتار.. ـ مفهوم ..

لا راجع ولا ـشي..

شفت وجهي ..لا مو وجهي

شفت عيون تعبانه وتجاعيد وسـر وشيب وتراب

نفخت إبحسره..كل قوتي..

بس ـراح منها..غير التراب..

..بعد بـيَّ محبه ..وـمش احباب

بعد بـيَّّ لعب..و صحابي متغربين..

لو أموات..والباقين شِيّـاب..

جنـه اطفال متعلكَين بالبسـرعلى حيطان غرفتنه..

بصـوَرنه وإحنه طلاب..

بالمدرسه..من أربعطعش ـدون

إبكَـهوه بشـارع السـعـدون

وإحنه شـباب

صورنه الحمره ..وإحنه أوجوه ممنوعه

وصورنه الخاكي ...وإحنه جنود

مشروره ملابسنه على الأسلاك والرايات مرفوعه

 صورنه الزركَـه وإحنه أشجار مكَـطوعه

ونأّدي التحيه إلمنجل الحطاب

وعمرنه إيدور بينه ..إيدور دولاب 

لو ذل وحرب ..

لو مدري شيسّـمونه  ..

لو إرهاب..

..ياحـوش الطفـوله الـعرفناهه

ولا شاهد علينه إيكَول عشناهه

الشمس حركَت سطحنه و..جير..

من مرزيبنه المشروم ينزل جير

 ودم متخـثر بريش العصافير

على شِبّـاك غرفتنه و ستايرنه

المخـتنكَه بجكَـــايرنه

بأثر إيدي على الشباك من كنت إنتظر..و ارسم مشاوير..

بتاريخ إمتحان الهندسة والجبر مـكـتوب بطباشير

ينزل جير..على بصـت ورديه

بكَـشر زهدي وجنحان الصراصير    

.. لا لوحه  ولا منظر طـبيعي ولا تصـاوير

بحيطـان الغـرف.. جـير وبسامير...